The Digital Collection of Sources

Corpus Orationum

Moeller, Eugenius OSB – Clément, Ioannes Maria – Coppieters ‘t Wallant, Bertrandus: Corpus orationum.
Brepols, Turnhout 1993–2004. (Corpus Christianorum Series Latina 160 A–M)

2001	Deus qui pluis ... alimenta praestentur.
	Deus, qui pluis super iustos et iniustos, nostris etiam offensionibus per haec sacramenta relaxatis, exspectata, quaesumus, imbrium munera largiaris, quibus et salus nobis et alimenta praestentur.
2002	Deus qui populis ... aeterna pastorum.
	Deus, qui populis tuis indulgentia consulis et amore dominaris, da spiritum sapientiae, quibus dedisti regimen disciplinae, ut de profectu sanctarum ovium fiant gaudia aeterna pastorum.
2003	Deus qui populo ... mereamur in caelis.
	Deus, qui populo tuo aeternae salutis beatum Martinum ministrum concessisti, praesta, quaesumus, ut, quem doctorem vitae habuimus in terris, intercessorem semper habere mereamur in caelis.
2004	Deus qui populo ... dignetur in caelis.
	Deus, qui populo tuo aeternae salutis beatum Martinum ministrum concessisti, praesta, quaesumus, ut, qui exsecutor mandatorum tuorum exstitit in terris, intercessor noster semper esse dignetur in caelis.
2005	Deus qui populo ... vivere valeat.
	Deus, qui populo tuo pastores praeesse voluisti, famulum tuum episcopum nostrum illum, quem praeesse et prodesse ecclesiae tuae iussisti, da, quaesumus, ut, incessanter recta monendo et operando, subditorum suorum mentes in tui amoris desiderio excitet et secundum te ad utilitatem sui provectus et aliorum vivere valeat.
2006	Deus qui populo ... gubernante perveniant.
	Deus, qui populo tuo plenae praestitisti redemptionis effectum, ut non solum unigeniti tui nativitate corporea sed etiam crucis eius patibulo salvaretur, huius, quaesumus, fidei famulis tuis tribue firmitatem, ut usque ad promissum gloriae tuae praemium, ipso quoque gubernante, perveniant.
2007	Deus qui populo ... adversitate defendi.
	Deus, qui populo tuo sanctae Mildrithae festivitatem celebrare tribuisti, concede propitius eius nos interventu a peccatorum nostrorum nexibus solvi et ab omni iugiter adversitate defendi.
2008	Deus qui populo ... laude laetemur.
	Deus, qui populo tuo sanctum dedisti Servatium praedicatorem, concede, quaesumus, ut tanti pontificis intercessione et tuae pietatis defensione ab omnibus ubique liberemur adversis et tranquilla prosperitate in tua laude laetemur.
2009	Deus qui populos ... gaudia consequamur.
	Deus, qui populos Pictorum et Britonum per doctrinam sancti Niniani episcopi et confessoris tui ad tuae fidei notitiam convertisti, concede propitius, ut, cuius eruditione veritatis tuae luce perfundimur, eius intercessione caelestis vitae gaudia consequamur.
2010	Deus qui populum ... virtute prosterne.
	Deus, qui populum tuum de hostis callidi servitute liberasti, preces eius misericorditer respice et adversantes ei tua virtute prosterne.
2011	Deus qui populum ... protectione conserva.
	Deus, qui populum tuum in deserto quadraginta annis pane caelesti satiasti et, illis sitientibus, fontem limpidissimum de petra produxisti, nos, spiritalibus escis corporis et sanguinis domini nostri Iesu Christi satiatos, sempiterna protectione conserva.
2012	Deus qui populum ... beneficia sentiamus.
	Deus, qui populum tuum, sacro Iordane flumine transacto, terram tuae fecisti promissionis intrare, concede, quaesumus, ut et nos quoque, maiestatis tuae revelato mysterio, divina semper beneficia sentiamus.
2013	Deus qui populum ... ad veniam.
	Deus, qui populum tuum sic corripis delinquentem, ut benigna consolatione non deseras da, quaesumus, ut indignatio, debita reis, precantibus transferatur ad veniam.
2014	Deus qui populum ... perpetuo gratulemur.
	Deus, qui populum tuum tuae fecisti redemptionis participem, concede nobis, quaesumus, ut de resurrectione dominica in perpetuo gratulemur.
2015	Deus qui post ... pietate devotum.
	Deus, qui post baptismi sacramentum secundam ablutionem peccatorum eleemosynis indidisti, respice propitius super famulum tuum illum, cuius operibus tibi gratiae referuntur; fac eum praemio beatum, quem fecisti pietate devotum.
2016	Deus qui post ... largire culparum.
	Deus, qui post baptismi sacramentum secundam peccatorum purgationem eleemosynis indidisti, postulationes nostras benignus exaudi et pro earum largitione famulo tuo illi cunctarum propitius indulgentiam largire culparum.
2017a	Deus qui praeclaro ... muniamur adversis.
	Deus, qui praeclaro salutiferae crucis honore hodiernae nobis festivitatis gaudia dicasti, tribue, ut vitalis signi tuitione ab omnibus semper muniamur adversis.
2017b	Deus qui praeclara ... muniamur adversis.
	Deus, qui praeclara salutiferae crucis inventione hodiernae nobis festivitatis gaudia dedicasti, tribue, ut vitalis ligni tuitione ab omnibus muniamur adversis.
2018	Deus qui praecursorem ... mundi formidare.
	Deus, qui praecursorem filii tui tanto munere dedicasti, ut pro ipso etiam capite plecti mereretur, da nobis ex eius imitatione veritatis fortes testes exsistere et nullas adversitates mundi formidare.
2019	Deus qui praedicando ... tempestate bellorum.
	Deus, qui praedicando aeterni regni evangelium romanum imperium praeparasti, praetende famulis tuis illis, principibus nostris, arma caelestia, ut pax ecclesiarum nulla turbetur tempestate bellorum.
2020	Deus qui praefecisti ... ingredi mereamur.
	Deus, qui praefecisti Moysen et Aaron duces populo tuo et in columna nubis ignisque verus ei ductor exstitisti, da, quaesumus, nobis quoque electione gratiae tuae pium pontificem, ut, praeceptis tuis eius doctrina parentes, terram repromissionis ingredi mereamur.
2021	Deus qui praesentem ... precibus adiuvetur.
	Deus, qui praesentem diem beatae Fidis virginis martyrio facis esse sollemnem, praesta ecclesiae tuae, ut, cuius meritis gloriatur, eius precibus adiuvetur.
2022	Deus qui praesentem ... intercessionibus consolari.
	Deus, qui praesentem diem beati Zenonis pontificis tui glorioso excessu fecisti sollemnem, praesta ipsius nos apud te continuis adiuvari suffragiis et magnificis iugiter intercessionibus consolari.
2023	Deus qui praesentem ... caelestibus inhaerere.
	Deus, qui praesentem diem beatissimae Barbarae virginis et martyris tuae martyrio consecrasti, tribue nobis, quaesumus, ut eius discamus exemplis et terrena despicere et caelestibus inhaerere.
2024	Deus qui praesentem ... non teneri.
	Deus, qui praesentem diem honorabilem nobis in almi tui Syri glorioso transitu praestitisti, da nobis tanti intercessione pontificis praesentis vitae fluctibus non teneri.
2025	Deus qui praesentem ... et pacis.
	Deus, qui praesentem diem honorabilem nobis in beati Ioannis nativitate fecisti, da populis tuis spiritalium gratiam gaudiorum et omnium fidelium mentes dirige in viam salutis et pacis.
2026	Deus qui praesentis ... celebramus nativitatem.
	Deus, qui praesentis annua sollemnitatis gaudia in sancti confessoris tui atque pontificis Swithuni commemoratione populis Anglorum tribuisti hodierna luce, da nobis ad illam pervenire beatitudinem, quam ipse percepit, cuius olympicam celebramus nativitatem.
2027	Deus qui praesentium ... passa naufragium.
	Deus, qui praesentium hominum vitam agnoscis diversarum necessitatum passionibus subiacere, exaudi desideria supplicantium, suscipe vota credentium. Si carorum salutem aut cordis agit morbus aut corporis, manus medica dolorem maesti, pestem pellat aegroti. Si iudicis aut ira vexat aut odium, adsit potentia mitigatura praelatum, liberatura subiectum. Si ad litem publicam discordes funesta intentio vocat, dissidentium animos pax amica praeveniat. Si terreni itineris subeunda vexatio est, angelum decerne custodem. Abigat daemones, praedam bestiae, errorem viae, casum foveae, insidiam furis, vim latronis. Si adire maria navigaturus exoptat, tu invisibilis gubernator beneficio sentiendus ingredere, ut nec mentem in peccatum cupiditas lucro praecipitata dimergat nec navem in profundum tempestas vento excitata dissolvat. Tunc enim felicem substantiam pensabit qu(a)estum, si innocentia non fuerit passa naufragium.
2028	Deus qui praevenis ... formidine liberemur.
	Deus, qui praevenis vota poscentium, tribue, quaesumus, ut et corporeis non destituamur alimentis et ab hostium formidine liberemur.
2029	Deus qui pro ... benignus inspira.
	Deus, qui pro animarum expiatione nostrarum sacri ieiunii instituta mandasti, fragilitati nostrae adiumenta concede et affectum caelestium mandatorum benignus inspira.
2030	Deus qui pro ... omnibus misereris.
	Deus, qui pro magnitudine tua per universa diffunderis et ubique tamen adsistis, discretius omnium voluntates qualitatibus, locis, temporibus atque personis, votorum omnium capax, propitiatus exaudi, dum ad cunctos adspicis, foves, omnibus misereris.
2031a	Deus qui pro ... mente famulemur.
	Deus, qui pro nobis filium tuum crucis patibulum subire voluisti, ut inimici a nobis expelleres potestatem, concede nobis famulis tuis, ut, antiqui hostis insidias tanti virtute mysterii superantes, sincerissima tibi perpetuo mente famulemur.
2031b	Deus qui pro ... resistere valeamus.
	Deus, qui pro nobis filium tuum crucis patibulum subire voluisti, ut inimici a nobis expelleres potestatem, concede nobis famulis tuis, ut antiqui hostis temptamentis, tua gratia protegente, resistere valeamus.
2032	Deus qui pro ... gratiam consequamur.
	Deus, qui pro nobis filium tuum crucis patibulum subire voluisti, ut inimici a nobis expelleres potestatem, concede nobis famulis tuis, ut resurrectionis gratiam consequamur.
2033	Deus qui pro ... interioribus fecundemur.
	Deus, qui pro nostrorum fructibus animorum prodire facis sufficientiam corporalem, ne exterioribus mereamur egere subsidiis, praesta, quaesumus, ut donis interioribus fecundemur.
2034	Deus qui pro ... contagia vetustatis.
	Deus, qui pro redemptione nostra accepisti sanguinem Christi, solve opera diaboli et omnes laqueos disrumpe peccati, ut creaturam regenerationis nulla polluant contagia vetustatis.
2035	Deus qui pro ... electos collocet.
	Deus, qui pro salute generis humani crucis patibulum pertulisti et sanguinem tuum pro redemptione nostra fudisti, preces nostras placatus et benignus suscipere dignare, ut hoc sacrificium, quod tuae gratiae offero, sereno vultu digneris respicere, et misericordiam tuam mihi concede, ut, cum me de corpore exire iusseris, pars iniqua in me non habeat potestatem sed angelus tuus me inter sanctos et electos collocet.
2036	Deus qui pro ... plena remissio.
	Deus, qui pro salute mundi passus es et de corde tuo aquam et sanguinem per lanceam militis emanare fecisti, concede propitius, ut sacratissimi corporis tui veneranda perfossio peccatorum nostrorum sit plena remissio.
2037	Deus qui pro ... aequalis absolvat.
	Deus, qui pro salute mundi sacrificium paschale fecisti, propitiare supplicationibus nostris, ut, interpellans pro nobis, pontifex summus, quos per id, quod nostri est similis, reconciliat, per id, quod tibi est aequalis, absolvat.
2038a	Deus qui proditoris ... virtute confirma.
	Deus, qui proditoris apostatae ruinam, ne apostolorum tuorum numerus sacratus perfectione careret, beati Matthiae electione supplesti, praesentia munera sanctifica et per ea nos gratiae tuae virtute confirma.
2038b	Deus qui proditoris ... devotione laetamur.
	Deus, qui proditoris tui ruinam, ne apostolorum tuorum numerus sacratus perfectione careret, beati apostoli tui Matthiae electione supplesti, praesta, quaesumus, ut eius protegamur meritis, in cuius festivitate annua devotione laetamur.
2039	Deus qui profundo ... benigne largitor.
	Deus, qui profundo consilio prospiciendo mortalibus sancta instituisti ieiunia, quibus corda languentium salubriter curarentur, tu animam nostram corpusque castifica, corporis animaeque salvator, aeternae felicitatis benigne largitor.
2040	Deus qui propter ... comitamur officio.
	Deus, qui propter ecclesiae tuae gubernacula disponenda sic eius principes sublimasti, ut minimos quosque non deseras, praesta, quaesumus, ut apostolicae fidei doctrinaeque vestigia vel longe sequamur imitando, quae licet infirmo comitamur officio.
2041a	Deus qui providentia tua caelestia simul et terrena moderaris propitiare romanis ... pugnante frangatur.
	Deus, qui providentia tua caelestia simul et terrena moderaris, propitiare romanis rebus et regibus, ut omnis hostium fortitudo, te pro nobis pugnante, frangatur.
2041b	Deus qui providentia tua caelestia simul et terrena moderaris qui misisti ... pugnante frangatur.
	Deus, qui providentia tua caelestia simul et terrena moderaris, qui misisti unigenitum filium tuum in mundum, ut per incarnationem suam credentibus gaudium afferret et pacem, concede, quaesumus, ut populus tuus, infestatione infidelium turbatus, per incarnationem domini nostri Iesu Christi de triumpho gaudium adipisci mereatur et omnis hostium nostrorum fortitudo, te pro nobis pugnante, frangatur.
2042	Deus qui prudentem ... non habeant.
	Deus, qui prudentem sinceramque concordiam tuorum cordibus inesse voluisti, da nobis legitimae dilectionis tenere mensuram, ut, qui a iustae pacis puritate dissentiunt, in nobis tamen, quod merito debeant lacerare, non habeant.
2043	Deus qui refrigerium ... meritis adiuvemur.
	Deus, qui refrigerium iustis et gehennam impiis praeparasti cuiusque auxilio beatus Laurentius, in ferrea crate distentus, aestuantis incendii flammas edaces, contempto persecutore, devicit, concede propitius, ut eius orationibus sive meritis adiuvemur.
2044	Deus qui regio ... aeternaliter repleri.
	Deus, qui regio semine beatae Annae mundum gratia, caelum gloria replesti, da nobis in eiusdem filiae fructu ventris benedictione spiritualiter refici et aeternaliter repleri.
2045	Deus qui regnis ... virtute victores.
	Deus, qui regnis omnibus aeterno dominaris imperio, inclina ad preces humilitatis nostrae aures misericordiae tuae et romani regni adesto principibus, ut, tua tranquillitate clementes, tua sint semper virtute victores.
2046	Deus qui regnorum ... brachio comprimantur.
	Deus, qui regnorum omnium regumque es dominator, supplicationes nostras clementer exaudi et famuli tui illius regis eiusque exercitus tibi subditum protege principatum, ut, tua virtute muniti, omnibus sint hostibus fortiores et, qui in sua feritate confidunt, potentiae tuae brachio comprimantur.
2047	Deus qui remedia ... suffragiis consequamur.
	Deus, qui remedia salutis humanae in praesentis mysterii sollemnitate posuisti, da nobis, ut, sicut haec apostolorum tuorum praedicatione cognovimus, ita eorum suffragiis consequamur.
2048	Deus qui renatis ... defensione cognoscant.
	Deus, qui renatis baptismate mortem adimis et vitam tribuis sempiternam, concede, quaesumus, ut, quorum nunc regenerationis sacrae diem celebramus octavum, ita corpora eorum animasque custodias, ut gratiam se catholicae fidei percepisse pietatis tuae defensione cognoscant.
2049	Deus qui renatis ... gratiam largiaris.
	Deus, qui renatis fonte baptismatis delictorum indulgentiam tribuisti, praesta, misericors, ut recolentibus huius nativitatis insignia plenam adoptionis gratiam largiaris.
2050	Deus qui renatis ... priventur promissis.
	Deus, qui renatis per aquam et spiritu sancto caelestis regni pandis introitum, auge super famulos tuos gratiam, quam dedisti, ut, qui ab omnibus sunt purgati peccatis, a nullis priventur promissis.
2051	Deus qui renuntiantibus ... in opere.
	Deus, qui renuntiantibus saeculo mansionem paras in caelo, dilata sanctae huius congregationis temporale habitaculum caelestibus bonis, ut fraternae teneantur compagine caritatis, unanimes continentiae praecepta custodiant, sobrii, simplices et quieti gratis sibi datam gratiam fuisse cognoscant; concordet illorum vita cum nomine, professio sentiatur in opere.
2052a	Deus qui restaurationem condicionis humanae mirabilius operaris quam substantiam ... nativitas reformavit.
	Deus, qui restaurationem condicionis humanae mirabilius operaris, quam substantiam condidisti, tribue, quaesumus, ut simul perficiatur in nobis et, quod creavit Verbi tui divina generatio, et, quod eius, hominis facti, gloriosa nativitas reformavit.
2052b	Deus qui restaurationem condicionis humanae mirabiliter operaris tribue quaesumus ... nativitas reformavit.
	Deus, qui restaurationem condicionis humanae mirabiliter operaris, tribue, quaesumus, ut simul perficiatur in nobis, quod Verbi tui creavit dignatio, et, quod eius, hominis facti, gloriosa nativitas reformavit.
2053	Deus qui resurgens ... efficiat promptiores.
	Deus, qui, resurgens a mortuis, passione cassam, potentiorem te tuis discipulis reddidisti, concede propitius, ut nos quoque maiestati tuae hoc paschale sacrificium conciliet et ad gratiam tuam promerendam in bonis operibus efficiat promptiores.
2054	Deus qui sacerdotis ... consequamur beneficia.
	Deus, qui sacerdotis tui excellentissimi Cuthberti vitam omni gloria apostolica decorasti, praesta, quaesumus, ut, qui glorificae translationis suae festa celebramus, per ipsius suffragia tua semper consequamur beneficia.
2055	Deus qui sacrae ... aequitate praecipitur.
	Deus, qui sacrae legis omnia constituta in tua et proximi dilectione posuisti, da nobis horum propitius efficientiam mandatorum, quia impossibile sibi nullus excusat, quod tanta brevitate concluditur, tanta aequitate praecipitur.
2056	Deus qui sacramenti ... vinculis absolvi.
	Deus, qui sacramenti tui veneranda perceptione nos satiasti, tribue, quaesumus, beato Hieronymo confessore tuo interveniente, nobis per haec a peccatorum nostrorum vinculis absolvi.
2057	Deus qui sacramento ... corda diffunde.
	Deus, qui sacramento festivitatis hodiernae universam ecclesiam tuam in omni gente et natione sanctificas, in totam mundi latitudinem spiritus tui sancti dona defunde et, quod inter ipsa evangelicae praedicationis exordia operata est divina dignatio, nunc quoque per credentium corda diffunde.
2058	Deus qui sacrandorum ... omnibus mereantur.
	Deus, qui sacrandorum tibi auctor es munerum, ad sanctificationem loci huius propitius adesse dignare, ut, qui haec in honorem tui nominis condiderunt, protectorem te habere in omnibus mereantur.
2059	Deus qui sacrandorum ... auxilium sentiatur.
	Deus, qui sacrandorum tibi auctor es munerum, effunde super hanc orationis domum benedictionem tuam, ut ab omnibus invocantibus nomen tuum defensionis tuae auxilium sentiatur.
2060	Deus qui sacratissimam ... munimine protegamur.
	Deus, qui sacratissimam virginem Mariam, unigeniti tui matrem, mutuae consolationis gratia beatam Elizabeth visitare fecisti, concede propitius nobis famulis tuis, ut ex eius visitationibus assidue consolemur et a cunctis adversitatibus tuo munimine protegamur.
2061	Deus qui sacratissimis ... mereamur absolvi.
	Deus, qui sacratissimis virginibus tuis Katherinae et Margaretae martyrii palmam et beatissimae Mariae Magdalenae criminum veniam concessisti, concede propitius, ut, earum intervenientibus meritis et precibus, et castitatis gratia decorari et a peccatorum nostrorum nexibus mereamur absolvi.
2062	Deus qui sacratissimum ... in caelis.
	Deus, qui sacratissimum decus primitivae Anglorum ecclesiae praeconem veritatis sanctum pontificem Augustinum mirifice rutilare dedisti, tribue, quaesumus, ut, cuius annuam sollemnitatem hodierna die celebramus iti terris, de eiusdem patrociniis gaudere mereamur in caelis.
2063	Deus qui saeculorum ... devotio perseveret.
	Deus, qui saeculorum omnium cursum ac momenta temporum regis, exaudi nos propitius et concede, ut famulo tuo illi, cuius hodie natalem genuinum celebramus consecratione mysterii, longaevam largiaris aetatem, quatenus fidei eius augmento multis annorum curriculis haec sollemnitatis devotio perseveret.
2064	Deus qui sanare ... facilius mereamur.
	Deus, qui, sanare omnibus modis peccata populi tui cupiens, observantiam ieiuniorum sanitatem ieiunantium esse dixisti, da, ut ieiunium nostrum sit salvatio animarum et humiliatio corporum veniamque obtineat omnium delictorum atque ita exhomologesis haec populo tuo prosit, ut, pro universae ecclesiae membris et pro totius mundi corpore supplicantes, exaudiamur ac, dum pro omnibus preces effundimus, salutem viventium et requiem defunctorum impetrare facilius mereamur.
2065	Deus qui sanctae ... consequi mereamur.
	Deus, qui sanctae martyri tuae Eulaliae pro poena gloriam, pro morte vitam, pro infirmitate virtutem, pro passione coronam tribuisti, praesta, ut, sicut illa exsultat in gloria, sic nos de tua misericordia gratulemur et in aeternum veniam, te donante, consequi mereamur.
2066	Deus qui sanctae ... concedente locupletemur.
	Deus, qui sanctae virginis tuae Dorotheae fidem ita exuberantis constantiae dono glorificas, ut, catasta imposita, et vultu placida et animo ostenderetur iucunda, tu nobis spiritalem confer laetitiam, qua repleti atque muniti, et delictorum sordibus careamus et pacis abundantia, te concedente, locupletemur.
2067	Deus qui sanctam ... periculis liberemur.
	Deus, qui sanctam diei huius sollemnitatem venerabilem nobis pro depositione beatae Radegundis ecclesiae tuae consecrasti, suscipe propitius, ipsa interveniente, orationem nostram et tribue nobis per haec sancta mysteria, quae sumpsimus, misericordiam tuam, ut, his suffragantibus libaminibus, simul cum sanctae Radegundis praesidiis, ab omnibus vitae huius periculis liberemur.
2068	Deus qui sanctam ... virtutum sentiamus.
	Deus, qui sanctam huius diei sollemnitatem pro commemoratione sancti Lamberti martyris tui atque pontificis fecisti, adesto familiae tuae precibus, ut, qui eius merita in , praesenti festivitate recolimus, patrocinia in augmento virtutum sentiamus.
2069	Deus qui sanctam ... placere mereamur.
	Deus, qui sanctam martyrem tuam Christinam, caelesti igne succensam, lumen omnibus oblatione proprii corporis voluisti imitabilem demonstrare, concede nobis, ut, sicut illa, superando spiritalium nequitiarum bella, nomini tuo claruit, ita et nos, devictis vitiorum criminibus, perfecta cordium puritate tibi semper placere mereamur.
2070	Deus qui sanctam ... obtinere suffragiis.
	Deus, qui sanctam nobis diei huius sollemnitatem praedicandi ac venerabilis sacerdotis tui depositione Martini episcopi praestare dignatus es, tribue, quaesumus, ut, quod nostris obtinere precibus non possumus, ipsius mereamur obtinere suffragiis.
2071a	Deus qui sanctam ... auxilio sublevemur.
	Deus, qui sanctam nobis huius diei sollemnitatem inhonorem sanctorum confessorum tuorum atque pontificum Medardi et Gildardi consecrasti, adesto familiae tuae precibus et dona, ut, quorum festa celebramus, eorum merito et auxilio sublevemur.
2071b	Deus qui sanctam nobis huius diei sollemnitatem pro beatarum virginum ... intercessionibus adiuvemur.
	Deus, qui sanctam nobis huius diei sollemnitatem pro beatarum virginum martyrumque tuarum gloriosa passione fecisti, adesto familiae tuae precibus et da, ut, quarum hodie festa celebramus, earum meritis et intercessionibus adiuvemur.
2071c	Deus qui sanctam nobis huius diei sollemnitatem pro commemoratione ... intercessionibus adiuvemur.
	Deus, qui sanctam nobis huius diei sollemnitatem pro commemoratione beati martyris tui illius vel passione fecisti, adesto familiae tuae precibus et da, ut, cuius hodie festa celebramus, eius meritis et intercessionibus adiuvemur.
2071d	Deus qui sanctam ... intercessione quas timemus culpas
	Deus, qui sanctam nobis sollemnitatem huius diei beatissimi martyris tui illius passione venerari fecisti, adesto familiae tuae precibus, ut, cuius hodie festa celebramus, eius meritis <et> intercessione, quas timemus, culpas evadere possimus.
2072	Deus qui sancti ... obsequiis placeamus.
	Deus, qui sancti martyris tui Symphoriani nobis suffragia dedisti, da nobis, ut illius instruamur fide, cuius patrocinio adiuvamur, ut, dum tibi in eius sollemnitate hostiam laudis offerimus, pietati tuae nostris obsequiis placeamus.
2073a	Deus qui sanctis ... sollemnitate gaudere.
	Deus, qui sanctis martyribus ad sempiternam gloriam veniendi copiosum munus gratiae contulisti, da nobis famulis tuis nostrorum veniam peccatorum, ut, sanctorum tuorum intercedentibus meritis, ab omnibus mereamur adversitatibus liberari, quatenus ad eorum nos facias gaudia aeterna perungere, de quorum nos virtute tribuis cottidiana sollemnitate gaudere.
2073b	Deus qui sanctis ... adversitatibus liberari.
	Deus, qui sanctis tuis Abdon et Sennen ad hanc gloriam veniendi copiosum munus gratiae contulisti, da famulis tuis suorum veniam peccatorum, ut, sanctorum tuorum intercedentibus meritis, ab omnibus mereantur adversitatibus liberari.
2074	Deus qui sanctis ... gaudia beatorum.
	Deus, qui sanctis martyribus tuis Crispino et Crispiniano coronam martyrii praestitisti, concede, quaesumus, ut eorum intercessione veniam consequamur delictorum et aeterna gaudia beatorum.
2075	Deus qui sanctis ... precibus adiuvemur.
	Deus, qui sanctis tuis aeternae beatitudinis praemia contulisti, concede propitius, ut, qui peccatorum nostrorum pondere premimur, eorum apud te precibus adiuvemur.
2076	Deus qui sanctis ... reddamur innoxii.
	Deus, qui sanctis tuis Acaunensibus pro tuitione christiani nominis persecutionis audaciam sustulisti eorumque animum ad adipiscendam dignitatis tuae martyrio perfulgentem gratiam incitasti, exaudi supplices tuos et praesta, ut, sicut illi tuo munere meruerunt beatifice coronari, ita eorum suffragiis ab omni colluvione peccati, te auxiliante, reddamur innoxii.
2077	Deus qui sanctis ... imitari mereamur.
	Deus, qui sanctis tuis in confessione tui nominis virtutem atque victoriam contulisti, tribue, quaesumus, ut, dum beati sacerdotis et martyris tui Xysti merita veneramur, studia ?eius imitari mereamur.
2078	Deus qui sanctis ... perducat aeternam.
	Deus, qui sanctis tuis dedisti piae confessionis inter tormenta virtutem, largire fidelibus populis inter huius mundi temptamenta constantiam veritatis, ut, sicut illos sanctus spiritus roborando sempiternam provexit ad gloriam, sic istos iugiter tua gratia gubernando ad misericordiam perducat aeternam.
2079	Deus qui sanctis ... veniam largiaris.
	Deus, qui sanctis tuis martyribus Quirico et Iulittae vincendi solatium et immensam vincentibus gloriam aeternam concedis et laceratas carnes eorum tamquam odorem bonum suavitatis assumis, tribue, quaesumus, ut, sicut eis coronam martyrii praestitisti, ita nobis peccatorum nostrorum veniam largiaris.
2080	Deus qui sanctis ... spiritalibus praeparare.
	Deus, qui sanctis tuis Servando et Germano tantam gratiam in passione dedisti, ut insigniter apertum fidei vincerent hostem, qui primum spiritaliter in se bella sui corporis devicissent, praebe nobis auxilium de tua pietate firmissimum, quo muniti atque praecincti, et rebellantem spiritui carnem valeamus compescere et nos ipsos intrepidos studeamus bellis spiritalibus praeparare.
2081	Deus qui sanctis ... recordatione veneramur.
	Deus, qui sanctis virginibus palmam largiris in caelestibus, praesta, quaesumus ut precibus sanctae Edburgae muniamur, cuius merita sollemni recordatione veneramur.
2082	Deus qui sanctissimi ... aeternae felicitatis.
	Deus, qui sanctissimi sacerdotis tui Bedae templum cordis sancti spiritus illustratione irradiasti, concede nobis, quaesumus, illius obtinentibus meritis, gaudenter pervenire ad gaudia aeternae felicitatis.
2083	Deus qui sancto ... invenire mercedem.
	Deus, qui sancto ac beatissimo martyri tuo illi id muneris contulisti, ut, qui propter te peregit illatae passionis liberaliter cursum, huius multitudinis mereretur occursum, praesta nobis, ut eius suffragio offerentium vota suscipias et requiem defunctis impertias, donans omnibus nobis ita tui martyris imitari fidem, ut consimilem a te post transitum mereamur invenire mercedem.
2084	Deus qui sancto ... gloriam visionis.
	Deus, qui sancto martyri tuo illi tantum ardorem tuae dulcedinis contulisti, ut non cederet poenalibus flammis, habitans in eo, tuae dilectio caritatis, praesta nobis, ut, pacis bono adcincti, careamus scandalis, expiemur delictis et aeternae semper praestolemur gloriam visionis.
2085	Deus qui sanctorum ... precibus assequamur.
	Deus, qui sanctorum martyrum tuorum Cantianorum gloriosi fecisti palmam florere certaminis, da nobis, quaesumus, hostis nostri fortia superare temptamina, ut, quod nostris meritis non valemus accipere, ipsorum, quorum natalicia celebramus, precibus assequamur.
2086	Deus qui sanctorum ... pervenire mereamur.
	Deus, qui sanctorum martyrum tuorum Kiliani et sociorum eius mentibus virtutem constantiae in passione adspirasti, concede propitius, ut, sicuti illi, devicto persecutore, coronari a te meruerunt, ita nos eorum interventione tua semper protectione defendi et ad aeternae beatitudinis gaudia pervenire mereamur.
2087	Deus qui sanctorum ... corde curramus.
	Deus, qui sanctorum tuorum dirigis gressus, amove a nobis iniquitatis viam et nostri tua lege miserere, ut, non obliti iudicia tua, viam mandatorum tuorum dilatato corde curramus.
2088	Deus qui sanctorum ... provocemur exemplis.
	Deus, qui sanctorum tuorum Quirici et Iulittae cordibus flammam tuae dilectionis accendis, da cordibus nostris eandem fidei caritatisque virtutem, ut, quorum gaudemus triumphis, provocemur exemplis.
2089	Deus qui sancto ... persecutoribus supplicavit.
	Deus, qui sancto Stephano martyri tuo et principatum in ministerio et principem in martyrio locum contulisti, dum nobis sancti diei huius festivitatem pro eius vel commemoratione vel passione donasti, exaudi, quaesumus, supplices familiae tuae preces; nobis eius peculiare praesidium tribue, cuius pro inimicis ac peccatoribus preces piissimus acceptasti; tribue etiam, ut pro nobis intercessor exsistat, qui pro suis persecutoribus supplicavit.
2090a	Deus qui sanctorum ... precibus mereamur.
	Deus, qui sanctorum Thebaeorum martyrum beatissimae legionis Mauricii, Exsuperii, Candidi, Victoris, Innocentii et Vitalis et eorundem sociorum gloriosi fecisti palmam florere certaminis eorumque natalicia digne nos celebrare concedis, da nobis, quaesumus, nostrorum veniam delictorum et, quod meritis non praesumimus, ipsorum assequi precibus mereamur.
2090b	Deus qui sanctorum ... mortis pretio vexisti ad caelos et pii fecisti palma florere certaminis da populo tuo ut pura mente in laudum tuarum debitis dono
	Deus, qui sanctorum Thebaeorum martyrum Mauricii, Exsuperii, Candidi, Victoris et Innocentii et Vitalis sociorumque beatissimam legionem vitali<s> mortis pretio vexisti ad caelos et pii fecisti palma florere certaminis, da populo tuo, ut pura mente in laudum tuarum debitis dono resplendeat divinitatis.
2090c	Deus qui hunc ... divinitatis
	Deus, qui hunc diem passione Thebaeorum martyrum consecrasti et beatissimam legionem vitalis mortis praemio evexisti ad caelos et pii fecisti palma florere certaminis, ut purae nostrae mentis laude <dono> divinitatis splendeamus, concede.
2091	Deus qui sanctorum ... ubique protege.
	Deus, qui sanctorum tuorum libenter suscipis voluntates, intercedente beato Cuthberto, familiam tuam miserationis tuae dextera semper et ubique protege.
2092	Deus qui sanctorum ... pietate censeamur.
	Deus, qui sanctorum tuorum meritis ecclesiam tuam, toto orbe diffusam, decorasti, praesta, quaesumus, ut intercessione beatissimi pontificis tui Aidani in sorte iustorum tua optanda pietate censeamur.
2093	Deus qui sanctorum ... auxilio muniamur.
	Deus, qui sanctorum tuorum splendor es mirabilis, maiestatem tuam suppliciter exoramus, ut supplicationes nostras et hostias, quas in honorem et venerationem dei genitricis Mariae sanctorumque apostolorum, martyrum, consessorum ac virginum atque omnium electorum tuorum tuae pietati devote offerimus, clemens ac benignus accipias; et tribue, ut, qui eorum merita recolendo veneramur, eorum intercessione protectionis tuae semper auxilio muniamur.
2094	Deus qui sanctos ... propitiatus indulge.
	Deus, qui sanctos tuos in placita tibi oblatione adsciscis, dum eis pro te moriendi ardorem contribuis, in oblatis tibi sacrificiis respice et sanctorum tuorum sollemnia excolentibus propitiatus indulge.
2095	Deus qui sanctum ... patrocinia sentiamus.
	Deus, qui sanctum Albanum martyrii corona decorare voluisti, praesta, quaesumus, ut, quemadmodum devotam ipsius passionis agimus memoriam, eius sublimia apud te patrocinia sentiamus.
2096	Deus qui sanctum ... iugem perseverantiam.
	Deus, qui sanctum corpus protomartyris Stephani tuis fidelibus ad suffragia revelare dignatus es, da nobis per eius intercessionem nostrorum peccaminum remissionem et in tuo sancto servitio iugem perseverantiam.
2097	Deus qui sanctum ... quantocius festinemus.
	Deus, qui sanctum patricium Scotorum apostolum tua providentia elegisti, ut Hibernenses gentes, in tenebris et in errore gentilitatis errantes, ad lumen verum dei scientiae reduceret et per lavacrum regenerationis filios excelsi dei efficeret, tribue nobis, quaesumus, eius piis intercessionibus, ut ad ea, quae recta sunt, quantocius festinemus.
2098	Deus qui scis ... et prodesse.
	Deus, qui scis genus humanum nulla sua virtute posse subsistere, concede propitius, ut famulus tuus ille, quem populo tuo voluisti praeferri, ita tuo fulciatur adiutorio, quatenus, quibus potuit praeesse, valeat et prodesse.
2099	Deus qui Scotorum ... in caelis.
	Deus, qui Scotorum populo beatum Paladeum pontificem primum apostolum et doctorem catholicae fidei mirabilem providisti, concede propitius, ut, quem doctorem vitae habuimus in terris, intercessorem apud te semper habeamus in caelis.
2100	Deus qui semper ... gloriosa passio.
	Deus, qui semper es gloriosus in sanctis tuis, qui, ut mundi fortia quaeque confundas, in minimis quoque virtutem tuae potentiae demonstras, suscipe hanc oblationem, quam tibi pro commemoratione beatissimae virginis et martyris tuae Fidis offerimus, et praesta, ut apud te nos eius adiuvet oratio, cuius tibi placuit sancta vita et gloriosa passio.
2101	Deus qui sensus ... aptemur remediis.
	Deus, qui sensus nostros terrenis actionibus perspicis retardari, concede, quaesumus, ut tuo potius munere tuis aptemur remediis.
2102	Deus qui si ... nos praeveni.
	Deus, qui, si velles, redderes, quod meremur; prius deficimus, quam merita supplicia perferamus; quaesumus, absolve nostros placatus errores et, ut possimus ad tua praecepta converti, copiosa propitiatione nos praeveni.
2103	Deus qui sic ... devote orare.
	Deus, qui sic delectaris abstinentia carnis, cum sancta inspexeris desideria cordis, ut tibi munda exhibeamus ieiunia, fac nos proximos seminis diligere et pro adversitantibus nobis devote orare.
2104	Deus qui sic ... criminibus expiemur.
	Deus, qui sic dilexisti mundum, ut filium tuum unigenitum dares pro mundo, tu haec libamina, tibi benedicenda, assume et nobis tuae benedictionis dona largire, ut, qui ob mysterium incarnationis suae hic tibi sacrificia veneranda litamus, horum sacrificiorum propitiatione ab omnibus criminibus expiemur.
2105	Deus qui sic ... munditia coalescat.
	Deus, qui sic virginitatem diligis, ut tamen virginitatem oderis, in qua non fuerit integritas caritatis, dato nobis sic obtinere munditiam carnis, ut repleri possimus abundantia pacis, quo tuarum virginum obtentu, et pax in nobis vera permaneat et castitatis munditia coalescat.
2106	Deus qui sine ... miserearis invenias.
	Deus, qui sine principio fecisti aeterna principiis, perpetua condidisti sine condicione perpetuus, tu, fusis ex affectu mentis, precibus imploramus, ut, concessa nobis in praesenti saeculo yenia, dignos misericordiae aeternae nos facias illudque nobis, dum misereris, indulgeas, unde in nobis, propter quod semper miserearis, invenias.
2107	Deus qui sine ... cooperari digneris.
	Deus, qui sine testimonio bonitatis tuae nullum tempus relinquis, beato Geraldo supplicante, precamur, ut, qui hunc tibi nostris diebus placuisse per signa testaris, honorem, quem illi in tuo nomine supplices exhibemus, nobis in bonum cooperari digneris.
2108a	Deus qui singulari ... aeterna concede.
	Deus, qui singulari corporis tui hostia totius mundi solvisti delicta, hac oblatione placatus, maculas scelerum nostrorum absterge et omnium christianorum vivorum et defunctorum peccata dimitte eisque praemia aeterna concede.
2108b	Deus qui singulari ... percepisse remedia.
	Deus, qui singulari corporis tui hostia totius mundi solvisti delicta, pacem nobis tribue, hostes remove, aeris temperiem bonam et copiam fructuum concede, inimicis nostris caritatem largire et nos ab eorum insidiis potenter eripe, incredulos converte, omnium christianorum vivorum et mortuorum peccata remitte, ut se gratulentur a tua clementia percepisse remedia.
2109	Deus qui singulis ... crescamus accessu.
	Deus, qui singulis quibusque competenter aptanda temporibus sempiterno cernis intuitu, da nobis, quaesumus, ut cum rerum vicissitudine mundanarum ad bona quoque perpetua piae devotionis crescamus accessu.
2110a	Deus qui sollemnitate paschali caelestia ... proficiat sempiternam.
	Deus, qui sollemnitate paschali caelestia mundo remedia benignus operaris, annuae festivitatis huius dona prosequere, ut observantia temporalis ad vitam proficiat sempiternam.
2110b	Deus qui sollemnitate ... perveniamus aeternam.
	Deus, qui sollemnitate paschali caelestia mundo remedia benignus operaris, annuae festivitatis huius nobis dona prosequere, ut per observantiam temporalem ad vitam perveniamus aeternam.
2111	Deus qui sollemnitate paschali mundo ... proficiat sempiternam.
	Deus, qui sollemnitate paschali mundo remedia contulisti, populum tuum, quaesumus, caelesti dono prosequere, ut et perfectam libertatem consequi mereatur et ad vitam proficiat sempiternam.
2112	Deus qui solus ... bonitate privari.
	Deus, qui solus es bonus et sine quo nullus est bonus, iube nos, quaesumus, tales fieri, qui a tua non mereamur bonitate privari.
2113a	Deus qui spe<m> ... salutis aeternae beatae Mariae virginitate fecunda humano generi praemia praestitisti tribue quaesumus ut ipsam pro nobis apud te intercedere sentiamus per quam meruimus auctorem vitae
	Deus, qui spe<m> salutis aeternae beatae Mariae virginitate fecunda humano generi praemia praestitisti, tribue, quaesumus, ut ipsam pro nobis apud te intercedere sentiamus, per quam meruimus auctorem vitae nostrae suscipere.
2113b	Deus qui salutis ... vitae suscipere.
	Deus, qui salutis aeternae beatae Mariae virginitate fecunda humano generi praemia praestitisti, tribue, quaesumus, ut ipsam pro nobis intercedere sentiamus, per quam meruimus auctorem vitae suscipere.
2114	Deus qui sperantibus ... invenire mereamur.
	Deus, qui sperantibus in te misereri potius eligis, quam irasci, da nobis digne flere mala, quae fecimus, ut tuae consolationis gratiam invenire mereamur.
2115	Deus qui sperantibus ... esse salvandum.
	Deus, qui sperantibus in te misereri potius eligis quam irasci, et paenitentes etiam sub vitae huius termino non relinquis, Threspice propitius super me famulum tuum, remissionem milii omnium peccatorum tota cordis intentione poscentem, qui conversum peccatorem non longo temporum spatio differendum sed mox, ut ingemuisset, dixisti esse salvandum.
2116	Deus qui sperantibus ... offensione gradiantur.
	Deus, qui sperantibus in te misericordiam semper impendis et nusquam es servientibus tibi longinquus, concede famulis tuis et suis omnibus prosperum iter, ut, te protectore et duce, per iustitiae callem sine offensione gradiantur.
2117	Deus qui Stephanum ... multiplicet nutrimenta.
	Deus, qui Stephanum, plenum gratia et virtute, levitici ordinis ministerio per apostolorum tuorum electionem vel impositionem manuum consecrasti, tu praesta nobis, ut, qui adsciti sumus in sortem tuae vocationis, simus filii pacis tenoremque retineamus perfectae dilectionis, quo gratia tua, quae in Stephano martyre verae praedicationis iecit fundamina, in nobis sincerae pacis et caritatis multiplicet nutrimenta.
2118	Deus qui sub ... hostibus fortiores.
	Deus, qui sub tuae maiestatis arbitrio omnium regnorum contines potestatem, romani imperii propitiare principibus, ut, qui tua exspectant protectione defendi, omnibus sint hostibus fortiores.
2119	Deus qui subiectas ... adversitate superari.
	Deus, qui subiectas tibi glorificas potestates, suscipe propitius oblationes nostras et romanis vires adde principibus, ut, qui se dextera tua expetunt protegi, nulla possint adversitate superari.
2120	Deus qui superbis ... dona subiecti.
	Deus, qui superbis resistis et gratiam praestas humilibus, auge in nobis verae humilitatis virtutem, cuius in se formam fidelibus unigenitus tuus exhibuit, ut numquam indignationem tuam provocemus, elati, sed potius semper pietatis tuae capiamus dona, subiecti.
2121	Deus qui supplicum ... assistere mereantur.
	Deus, qui supplicum tuorum vota per caritatis officia suscipere dignaris, da famulis tuis in tua proficere dilectione et in tua laetari protectione, ut tibi secura mente deserviant et in tua pace semper assistere mereantur.
2123	Deus qui tanta ... vinculo amplectamur.
	Deus, qui tanta pace et dilectione hunc mundum dilexisti, ut per unigenitum filium tuum cuncta terrestria caelestibus sociares miseratione gratuita, quae caecitate primi hominis facta fuerant inter se dissidentia, da nobis, ut, qui obscuritate nostrorum criminum a proximi dilectione avertimur, te in nobis perpetualiter lucente, ita in nominis tui dulcedine solidemur, quatenus et amicos in te et inimicos propter te alternae dilectionis vinculo amplectamur.
2124	Deus qui tanta ... invenire sepulcrum.
	Deus, qui tanta severitate iudicii tui ultor fuisti in persecutoribus beatissimi martyris Tirsi, ut eorum defuncta corpora terra recusaret suscipere, quam ferocitas eorum viri iusti sanguine cruentasset, tu pius ac benignus, offerentium obsequiis delibutus, sepultorum spiritibus aeterna refrigeria praebe, ut ita praedicti martyris tui suffragio habeant fideles animae defunctorum praemium, sicut per eum corpora damnatorum meruerunt invenire sepulcrum.
2125	Deus qui tantae ... mentibus serviamus.
	Deus, qui tantae pietatis es, ut supplicantium preces indulgentia omni praevenias et id, quod petendum est a te, iam nosti prius, quam rogeris, exaudi preces populi tui atque omnibus nobis misericordiae et securitatis tuae munus indulge, ut, omni sublata formidine, liberis tibi mentibus serviamus.
2126	Deus qui tantam ... ex voto.
	Deus, qui tantam famulae tuae Agathae contulisti constantiam, ut nullis suasionibus cederet, quo semetipsam petulco adversantis concubitu macularet, quique, eius meritis celsiorem gloriam virtutis accumulans, cives suos a voracis ignis combustionibus liberas, tu ecclesiam tuam donis spiritalibus auge, ut et virginitate praepolleat et nullis inimici propulsetur temptationibus ad ruinam sed, carens incendiis voluptatum horrendis, in te ardeat desiderio et obsequiali coalescat ex voto.
2127	Deus qui te ... percipiam remissionem.
	Deus, qui te praecipis a peccatoribus exorari tibique sacrificium contriti cordis offerri, hoc sacrificium, quod indignis manibus meis offerro, acceptare dignare et, ut ipse tibi hostia et sacrificium esse merear, miseratus concede, quo per ministerii huius exhibitionem omnium peccatorum percipiam remissionem.
2128a	Deus qui te rectis ... quibus habitare digneris.
	Deus, qui te rectis ac sinceris manere pectoribus asseris, da nobis tua gratia tales exsistere, in quibus habitare digneris.
2128b	Deus qui te sinceris ... quibus habitare digneris.
	Deus, qui te sinceris asseris manere pectoribus, da nobis tua gratia tales exsistere, in quibus habitare digneris.
2129	Deus qui temporalis ... precibus adiuvemur.
	Deus, qui temporalis mortis angustias aeternae vitae iucunditate compensas, tribue nobis, quaesumus, ut, qui gloriosi Thomae martyris tui atque pontificis passionem veneramur, eius apud te meritis et precibus adiuvemur.
2130	Deus qui terram ... indesinenter assistat.
	Deus, qui terram Israel gloriosa filii tui nativitate decorasti et ipsam per passionem et sanguinem eiusdem redemisti, animam famuli tui illius et animas famulorum famularumque tuarum a diaboli compede liberare digneris terramque sanctam iam redimere non deseras, ut, quorum corda incredulitas tenebrosa mirabiliter constringit, haec praesens oblatio tua benignissima pietate dissolvat spemque salutis habentibus manus tua defensatrix indesinenter assistat.
2131	Deus qui totam ... dilectione posuisti insere in cordibus nostris utriusque devotionis effectum ut numquam ab invicem sint divisi qui tua fuerint
	Deus, qui totam legis prophetarumque doctrinam in tua nobis et <proximi> dilectione posuisti, insere in cordibus nostris utriusque devotionis effectum, ut numquam ab invicem sint divisi, qui tua fuerint pace coniuncti.
2132	Deus qui transtulisti ... tranquillo tuearis.
	Deus, qui transtulisti patres nostros per mare rubrum et transvexisti per aquam nimiam, laudem tui nominis decantantes, supplices deprecamur, ut in hac navi famulos tuos, repulsis adversitatibus, portu semper optabili cursuque tranquillo tuearis.
2133a	Deus qui tres ... pervenire mereantur.
	Deus, qui tres magos orientales, Gaspar, Melchior et Balthasar, ad filii tui domini nostri Iesu Christi cunabula, ut eum mysticis adorarent muneribus, stella duce et vero lumine praemio sine impedimento duxisti et reduxisti, concede famulis tuis in hoc itinere, quod peracturi sunt, per ipsorum trium regum pias intercessiones et merita pacem et prosperitatem ac sanitatem, quatenus, ipso vero sole, vera stella et vero lumine ducente, ad loca optata sine offensione et impedimento pervenire mereantur.
2133b	Deus qui tres ... redire valeant.
	Deus, qui tres magos orientales, Gaspar, Melchior et Balthasar, ad tua cunabula, ut te mysticis venerarentur muneribus, sine impedimento, stella duce, duxisti, concede propitius, ut per horum trium regum pias intercessiones et merita famulo tuo illi et famulis tuis tribuas, ut in itinere, quo ituri sunt, celeritate, laetitia, gratia et pace, te ipso sole vero, vera stella, vera luminis luce, ad loca destinata in pace et salute et, negotio peracto, cum omni prosperitate sani et salvi redire valeant.
2134	Deus qui tres ... meritoque reddamus.
	Deus, qui tres pueros de camino ignis, non solum illaesos sed etiam tuis laudibus conclamantes, liberasti, quaesumus, ut nos, peccatorum nexibus obvolutos, velut de voragine ignis eripias, ut, criminum flammas operumque carnalium incendia superantes, hymnum, tibi debitum, iure meritoque reddamus.
2135a	Deus qui tribulatos ... delectetur exsultare iudiciis.
	Deus, qui tribulatos corde sanas et maestificatos actu iustificas, ad hanc propitius hostiam dignanter attende, quam tibi pro servi tui illius offerimus liberatione; tu et hanc benignus accepta et illius, pro quo offerimus, sana discrimina, tribulationis eius attende miseriam et angustiarum illius submove pressuram, ut, exutus omnibus, quae patitur, malis, in tuis semper delectetur exsultare iudiciis.
2135b	Deus qui tribulatos ... delectemur exsultare iudiciis.
	Deus, qui tribulatos corde sanas et maestificatos actu laetificas, ad hanc propitius hostiam dignanter attende et, qua totius mundi voluisti relaxare delicta, pro tribulatione nostra illam clementer assume cunctaque crimina nostra solve, tribulationem nostram adime, miserias pelle, angustias et pressuras amove, ut, exuti, quae patimur, malis, in tuis semper delectemur exsultare iudiciis.
2136	Deus qui tribus ... flamma vitiorum.
	Deus, qui tribus pueris mitigasti flammas ignium, concede propitius, ut nos famulos tuos non exurat flamma vitiorum.
2137	Deus qui tuae ... innocentiam imitemur.
	Deus, qui tuae ineffabilis magnitudine pietatis beatum Iustum, aetate parvulum, magnum fide atque virtute fecisti, tribue, quaesumus, ut, qui eius memoriam agimus, vitae quoque innocentiam imitemur.
2138	Deus qui tuam ... decimas exhiberent.
	Deus, qui tuam servantibus legem multimodam donas pacem, praesta famulis tuis, ut, qui, praecepto tuo oboedientes, decimas rerum honorant ex propriis, complementum pacis et caritatis accipiant, ut in eo cum omni turba fidelium perenniter vivant, ex quo provocati sunt, ut has tuis altaribus decimas exhiberent.
2139a	Deus qui tuorum ... sed iuvare.
	Deus, qui tuorum corda fidelium per eleemosynam dixisti posse mundari, praesta, quaesumus, huius consortiis sacramenti, ut ad conscientiae suae fructum non gravare studeant miseros sed iuvare.
2139b	Deus qui tuorum ... propitiatio maiestatis.
	Deus, qui tuorum corda fidelium per eleemosynam dixisti posse mundari, praesta, quaesumus, ut per hanc huius quoque consortio sacramenti nostrorum fiat plene purgatio peccatorum et tuae propitiatio maiestatis.
2139c	Deus qui tuorum ... ubique dirigatur.
	Deus, qui tuorum corda fidelium per eleemosynam dixisti posse mundari, praesta, quaesumus, ut haec oblatio, quam tibi offerimus pro incolumitate famulorum famularumque tuarum illarum, eleemosynas nobis largientium, eis proficiat ad salutem, quatenus eorum vita tua providentia inter adversa et prospera ubique dirigatur.
2139d	Deus qui tuorum ... sorte iustorum.
	Deus, qui tuorum corda fidelium per eleemosynam dixisti posse mundari, da famulis et famulabus tuis, qui ad hunc locum sanctum vel pauperibus sua bona dederunt, per huius sacramenti mysterium, ut, percipientes hoc munere veniam peccatorum, in tuorum censeantur sorte iustorum.
2140	Deus qui tuorum ... strenuos habeamus.
	Deus, qui tuorum martyrum sollicitus custos et amplificus remunerator exsistis, hanc plebem, martyrum agonibus congaudentem, intende clemens et da singulis, quod poscunt, qui sanctis tribuisti de hoste triumphare, ut, quos per carnis mortem tibi placuisse meminimus, patronos apud te semper strenuos habeamus.
2141	Deus qui tuos ... mereamur adipisci.
	Deus, qui tuos athletas gloria caelesti remuneras, concede propitius, ut, qui de beatorum martyrum tuorum Eustachii ac sociorum eius gaudemus triumphis, per eorum intercessionem sempiterna gaudia mereamur adipisci.
2142	Deus qui tuum ... perenniter exsultare.
	Deus, qui tuum in humanitate unigenitum, divina claritate transformatum, sanctis apostolis demonstrasti, fac nos, quaesumus, tua gratia largiente, in caelesti regno de eius claritatis visione perenniter exsultare.
2143	Deus qui tuum ... fidelibus praestans.
	Deus, qui tuum Thomam egregium praedicis architectum et in foro non dedignas ambulare venalium, tu nos ex illis lapidibus effice vivis, a quibus illa visio pacis instauratur caelestis, qualiter, candore castitatis niveo renitentes, sanctorum, qui nos in domino iam praecesserunt, possimus esse in participatione aequales, ut, qui pro peccatoribus ab illa sublimi sede descendisti ad terram, precibus nostris placatus assistas, omnibus requiem defunctis fidelibus praestans.
2144	Deus qui unanimes ... esse concordes.
	Deus, qui unanimes nos in domo tua praecipis habitare, dissensionum causas placatus depelle nostrarum, ut, competentibus adiuti subsidiis, te largiente, possimus esse concordes.
2145	Deus qui unanimitatem ... amare factorem.
	Deus, qui unanimitatem amplecteris et in corde pacifico requiescis, da, quaesumus, puram omnibus pacem; da cunctis mutuam caritatem; tribue fidelia oscula, sincera colloquia, ut nec publicis quidquam inimicitiis liceat nec secretis atque odisse nesciat fratrem, qui te suum coeperit amare factorem.
2146	Deus qui unicum ... perpetua liberemur.
	Deus, qui unicum filium tuum pro omnibus nobis in mortem crucis sponte dedisti, concede omnibus recte credentibus, ut per eandem mortem a morte perpetua liberemur.
2147	Deus qui unigeniti ... aeterna mereamur.
	Deus, qui unigeniti filii tui baptismo fluenta sanctificare voluisti aquarum, da, ut, renati aqua et spiritu, pervenire ad gaudia aeterna mereamur.
2148	Deus qui unigeniti ... protectione gaudere.
	Deus, qui unigeniti filii tui pretioso sanguine vivificae crucis vexillum sanctificari voluisti, concede, quaesumus, eos, qui eiusdem sanctae crucis gaudent honore, tua quoque ubique protectione gaudere.
2149	Deus qui unigeniti ... nexibus liberentur.
	Deus, qui unigeniti tui domini nostri Iesu Christi pretioso sanguine humanum genus redimere dignatus es, concede propitius, ut, qui ad adorandam vivificam crucem adveniunt, a peccatorum suorum nexibus liberentur.
2150	Deus qui unigeniti ... aequanimiter tolerare.
	Deus, qui unigeniti tui patientia antiqui hostis contrivisti proterviam, da nobis, quae idem pie pro nobis pertulit, digne recolere sicque exemplo eius nobis adversantia aequanimiter tolerare.
2151	Deus qui unigenitum ... mereamur videre.
	Deus, qui unigenitum tuum, devicta ab eo iam morte mortisque auctore, primum beatae Mariae Magdalenae vivum exhibuisti, tu clementiae tuae dono ita nos ad amorem tuum accende, quatenus, sollerti instantia eum, quem praediximus unigenitum tuum, amando, laeti in sua maiestate mereamur videre.
2152	Deus qui unigenitum ... pertingere mereamur.
	Deus, qui unigenitum filium tuum dominum nostrum Iesum Christum gloriosissimo regi Edwardo in forma visibili demonstrasti, tribue, quaesumus, ut eius meritis et precibus ad aeternam ipsius domini nostri Iesu Christi visionem pertingere mereamur.
2153	Deus qui unigenitum ... invictissima salus.
	Deus, qui unigenitum tuum per uterum virginis Mariae intactum in hunc mundum manifestare dignatus es, non desit famulis tuis pietatis tuae invictissima salus.
2154	Deus qui unigenitum ... confusione cernamus.
	Deus, qui unigenitum tuum, pro nobis in carne venturum ac de virgine nasciturum, propheticis vocibus promisisti et in novissimis temporibus, quae promiseras, adimplesti, praesta, quaesumus, ut, qui eum iam venisse mundumque redemisse credimus, fatemur et praedicamus rursumque venturum ad iudicium speramus, eius praesentiam, cum venerit, sine confusione cernamus.
2155a	Deus qui universam ... velut quibusdam floribus coronasti praesta omnipotens Deus ut sicut illis <dedisti
	Deus, qui universam ecclesiam tuam pretiosorum martyrum tuorum <virtutibus> velut quibusdam floribus coronasti, praesta, omnipotens Deus, ut, sicut illis <dedisti> palmam victoriae, ita nobis consortium tribuas et gloriam sempiternam.
2155b	Deus qui universam ... tribuas sempiternum.
	Deus, qui universam ecclesiam tuam pretiosorum martyrum tuorum virtutibus velut quibusdam floribus coronasti, ut per triumphos tuorum testium et sollemnitatum gloriam et devotionum exempla susciperes, sicut in hoc die, quo pro domino nostro Iesu Christo Infantium innocentiam extollis usque ad merita passionum, feliciter pro Christo mortui sunt sed felicius cum eodem in aeternitate victuri, qui ad hoc tantum per humanam infirmitatem nati sunt ad aerumnam, ut per dei gratiam nascerentur martyres ad coronam, praesta, omnipotens Deus, in hac sollemnitate diei huius, ut, sicut illis dedisti palmas victoriae, ita nobis quoque consortium tribuas sempiternum.
2156	Deus qui universorum ... facias praesentari.
	Deus, qui universorum creator et conditor es, qui cum sis tuorum beatitudo sanctorum, praesta nobis petentibus, ut spiritum fratris nostri, a corporis nexibus absolutum, in prima resurrectione facias praesentari.
2157a	Deus qui universum mundum beati ... exempla gradiamur.
	Deus, qui universum mundum beati Pauli apostoli praedicatione docuisti, da nobis, quaesumus, ut, qui eius hodie conversionem colimus, per eius ad te exempla gradiamur.
2157b	Deus qui universum mundum beatorum ... exempla gradiamur.
	Deus, qui universum mundum beatorum apostolorum tuorum praedicatione docuisti, da nobis, quaesumus, ut, quorum hodie divisionem colimus, per eorum ad te exempla gradiamur.
2158	Deus qui universum mundum sanctorum ... exempla gradiamur.
	Deus, qui universum mundum sanctorum doctorum praedicatione ad agnitionem veritatis convertisti, da nobis, quaesumus, ut, quorum te dictis agnovimus, per eorum ad te exempla gradiamur.
2159	Deus qui universum ... sociari perpetuis.
	Deus, qui universum orbem apostolis imbuendum commendasti, fac nos beati Barnabae apostoli tui commendari suffragiis et praemiis sociari perpetuis.
2160	Deus qui unum ... ad quietem.
	Deus, qui unum in Trinitate possides nomen, oblatas tibi in hoc tuorum trium martyrum festo, has oblationes assume, quo et offerentibus ad salutem et defunctis proficiant ad quietem.
2161	Deus qui ut ... gloriam concupiscat.
	Deus, qui, ut humanum genus ad confessionem tui nominis provocares, etiam in sexu fragili victoriam martyrii contulisti, praesta, quaesumus, ut ecclesia tua, hoc exemplo communita, nec pati pro te metuat et caelestis praemii gloriam concupiscat.
2162a	Deus qui vastatoris ... dextera conterantur.
	Deus, qui, vastatoris antiqui perfidiam virtute filii tui et sancti spiritus destruendo, dedisti nobis de captivitate victoriam, concede, quaesumus, ut, qui nos impetere moliuntur, potentiae tuae dextera conterantur.
2162b	Deus qui vastatoris ... dextera refrenentur.
	Deus, qui vastatoris antiqui perfidiam virtute filii tui et spiritus sancti dona distribuendo vicisti et dedisti nobis de captivitate victoriam, concede, quaesumus, ut, qui nos impetere moliuntur, tua etiam dextera refrenentur.
2163a	Deus qui venerabilem beati Hilarii confessoris tui atque pontificis festivitatem sollemniter recurrentem populo tuo dedicasti concede ... consequi mereamur.
	Deus, qui venerabilem beati Hilarii confessoris tui atque pontificis festivitatem, sollemniter recurrentem, populo tuo dedicasti, concede nobis, quaesumus, ut, quod in eius honore deposcimus, eo suffragante, consequi mereamur.
2163b	Deus qui venerabilem beati Hilarii confessoris tui atque pontificis festivitatem sollemniter recurrentem populo tuo dedicasti cuius ... consequi mereamur.
	Deus, qui venerabilem beati Hilarii confessoris tui atque pontificis festivitatem, sollemniter recurrentem, populo tuo dedicasti, cuius lingua in saeculo pro sanctae Trinitatis aequalitate sic tonuit, ut mundi huius principem miles tuus prosterneret et in caelestis regis aula victor intraret, te suppliciter votis uberrimis deprecamur, ut, qui eum inter adversas acies ita fecisti esse sollicitum, ut redderes inter bella securum, concede nobis, ut, quod in eius honore deposcimus, eo suffragante, consequi mereamur.
2163c	Adorabilem [populi] beatissimi ... dominum votis uberioribus deprecemur ut qui eum inter diversas acies ita fecit esse sollicitum ut redderet inter bella securum nobis concedere dignetur ut quod in eius honore deposcimus eo suffragante
	Adorabilem [populi] beatissimi Hilarii antistitis festivitatem, sollemniter recurrentem, cuius lingua in saeculo pro sanctae Trinitatis aequalitate sic tonuit, ut huius mundi principem miles Christi prosterneret et in caelestis regis aula victor intraret, <celebrantes>, dominum votis uberioribus deprecemur, ut, qui eum inter diversas acies ita fecit esse sollicitum, ut redderet inter bella securum, nobis concedere dignetur, ut, quod in eius honore deposcimus, eo suffragante, consequi mereamur.
2164	Deus qui venerabilem ... mereamur percipere.
	Deus, qui venerabilem nobis beati Pontii martyris tui passionem celebritate annua concedis venerari, praesta, quaesumus, ut, sicut ille, constanter pro tui nominis confessione agonizando, triumphale stadium divina largitate meruit percurrere, ita nos eiusdem patrociniis immortalitatis triumphum mereamur percipere.
2165	Deus qui veneranda ... transivit gloriam.
	Deus, qui veneranda beati Byrini confessoris tui atque pontificis sollemnitate huius diei nobis consecrasti gaudia praesta, ut supplicatio eius nobis obtineat veniam, cuius spiritus hodie ad perpetuam transivit gloriam.
2166	Deus qui violatae ... vetustate transire.
	Deus, qui violatae naturae per virginale decus adhibes medicinam, fac nos beatae Mariae semper virginis precibus et fermentum conceptae pravitatis abicere et in novitatis azyma de vetustate transire.
2167	Deus qui virginalem ... interesse festivitati.
	Deus, qui virginalem aulam beatae Mariae, in qua habitares, eligere dignatus es, da, quaesumus, ut, sua nos defensione munitos, iucundos faciat suae interesse festivitati.
2168	Deus qui virgineum ... virginitatis perveniret.
	Deus, qui virgineum florem per Mariae uterum renovasti, reddens nobis in matre virgine, quod per incontinentem perditum fuerat matrem, quam sequentes, sanctae virgines cum palma martyrii ad tuum usque thalamum pervenerunt, ex quibus est beata Agnes martyr, cuius hodie passionis sollemnitas agitur, quae nos ad laetitiam suae devotionis excitavit; vere est enim honorandus huius dies natalis, quae sic terrena generatione processit, ut ad divinitatis consortium per consecrationem virginitatis perveniret.
2169	Deus qui virginum ... lavacro protulisti.
	Deus, qui virginum votis placaris, qui in martyrum oblatione laetaris, dona nobis tibi offerre placentia, ut sanctae martyris et virginis tuae Christinae consequamur auxilia et tuae propitiationis arbitrio tales efficiamur in die iudicii, quales nos e lavacro protulisti.
2170	Deus qui <per> ... viscera misericordiae uberis atque multiplicis sic sanctos tuos coronas pro meritis ut discordantium animos eorum intercessione pacifices quaesumus per interventum sancti Saturnini antistitis et martyris tui ut pacificatam plebem huius festivitati collectam sic ab omni simultate separes ut perfectam tuo conspectui
	Deus, qui <per> viscera misericordiae uberis atque multiplicis sic sanctos tuos coronas pro meritis, ut discordantium animos eorum intercessione pacifices, quaesumus per interventum sancti Saturnini antistitis et martyris tui, ut pacificatam plebem, huius festivitati collectam, sic ab omni simultate separes, ut perfectam tuo conspectui habere digneris.
2171	Deus qui vivorum ... sanctitatis suscipiat.
	Deus, qui vivorum es salvator omnium, qui non vis mortem peccatoris nec laetaris in perditione morientium, te suppliciter deprecor, ut concedas mihi veniam delictorum, ut et admissa defleam et postmodum non admittam, ut, cum mihi extrema dies finisque vitae advenerit, emundatis delictis omnibus, me angelus sanctitatis suscipiat.
2172	Deus qui votivis ... vinculo praemunitum.
	Deus, qui votivis semper precibus delectaris, votum famuli tui illius locupleta fenore pacis, ut per hoc, id, quod offert, tuis oculis sit acceptum, per quod tuae pacis fuerit vinculo praemunitum.
2173	Deus qui vulnere ... fideli devotione.
	Deus, qui vulnere passionis et crucis nostrorum omnium vincula solvis, votivam hanc servorum tuorum suscipe precem in omnibus, pro quibus te poposcerint fideli devotione.
2174	Deus quo iuvante ... muniamur auxilio.
	Deus, quo iuvante, beatus Laurentius, ferrea crate liberatus, subiecto minime cessit incendio, nam flagrantibus membris coronam est martyrii consecutus, praesta, ut omnes, qui passionis eius merita veneramur, maiestatis tuae muniamur auxilio.
2175	Deus refugium nostrum ... efficaciter consequamur.
	Deus, refugium nostrum et virtus, adesto piis ecclesiae tuae precibus, auctor ipse pietatis, et praesta, ut, quod fideliter petimus, efficaciter consequamur.
2176a	Deus refugium pauperum ... faciat consolatos.
	Deus, refugium pauperum, spes humilium salusque miserorum, supplicationes populi tui clementer exaudi, ut, quos iustitia verberum fecit afflictos, abundantia remediorum faciat consolatos.
2176b	Deus refugium pauperum ... obtinente faciat.
	Deus, refugium pauperum, spes humilium salusque miserorum, interveniente pro nobis beatissimo fundatore ecclesiae tuae Petro, supplicationes supplicum tuorum in die triduani huius ieiunii clementer exaudi et tranquillitatem a vitiis pariter et hostibus nostris concede temporibus, ut, quos iustitia flagellorum tuorum iuste facere potest esse afflictos, abundantia misericordiae tuae, ipso beato Petro obtinente, faciat.
2177	Deus regnorum omnium ... sint potentes.
	Deus, regnorum omnium et romani maxime protector imperii, da servis tuis regibus nostris illis triumphum virtutis tuae scienter excolere, ut, cuius constitutione sunt principes, eius semper munere sint potentes.
2178	Deus regnorum omnium ... correctionis utamur.
	Deus, regnorum omnium regumque dominator, qui nos et percutiendo sanas et ignoscendo conservas, praetende nobis misericordiam tuam, ut tranquillitate pacis, tua potestate firmata, ad remedia correctionis utamur.
2179	Deus regum corona ... percipiamus repromissam.
	Deus, regum corona et martyrum victoria, annue nos beati Olavi regis ac martyris apud te pia experiri patrocinia, ut per tuam, quam in eius glorificamus passione, magnificentiam coronam vitae diligentibus te percipiamus repromissam.
2180	Deus sanator noster ... patriam coronandos.
	Deus, sanator noster et medicus sempiterne, qui Cosmam et Damianum, inconcussos fide, insuperabiles in virtute fecisti, ut per suscepta vulnera vulneribus mederentur humanis, qui ante passionem ex terreno medicamine salutes operati essent in populis, hos, quaesumus, nostris infirmitatibus et custodes et medicos deputa. Per eos sanentur infirma; per eos non recrudescant sanata. Per hos corpora, per hos animae medicinam acquirant. Hii typicis animae aegritudinibus finem, hii patulis celerem impendant aegrimoniis sanitatem; hii putredines vulnerum orationibus desecent, hii manu precationis abdita vulneratorum expurgem. Hii virtutem invalidis, roborem fessis, victum egenis, subventionem viduis, defensionem orphanis, tuitionem largiantur pupillis. Hii miseriis humanis medelam illaturi occurrant, hii pressuris hominum concita levitigatione subveniant. Hii etiam sic nos a peccati morbo servent illaesos, ut ad caelestem perducant patriam coronandos.
2181	Deus sanctificatio atque ... retributione devotio.
	Deus, sanctificatio atque benedictio, a te haec assumatur oblatio et apud nos pergat in retributione devotio.
2182	Deus sanctificationum et ... claritatis exaudi.
	Deus sanctificationum et dominus caelestium virtutum, exaudi preces nostras et benedictam hanc plebem, domini nostri Iesu Christi sanguine redemptam, de sede sancta inaccessibilis claritatis exaudi.
2183a	Deus servientium tibi fortitudo regnorum propitius christianorum adesto ... sit potestas.
	Deus, servientium tibi fortitudo regnorum, propitius christianorum adesto semper principibus, ut, quorum tibi subiecta est humilitas, eorum ubique excellentior sit potestas.
2183b	Deus servientium tibi fortitudo regnorum propitius adesto christianorum ... sit potestas.
	Deus, servientium tibi fortitudo regnorum, propitius adesto christianorum principibus, qui per resurrectionem domini nostri Iesu Christi potestatem inferorum contrivisti et super inimicum pacis et veritatis triumphasti, praesta, quaesumus, ut populus tuus, huius virtutis auctorem laudans et confitens, de inimicorum suorum elisione laetetur et, quorum tibi subiecta est humilitas, eorum ubique excellentior sit potestas.
2184	Deus simultatum discussor ... obtinere triumphum.
	Deus, simultatum discussor, pacis quaesitor, cuius, ut pietatis esi disiuncta coniungere, ita amoris est casta pacifice alligare, tu nunc nos, domine, apostolorum tuorum dogmata obsequentes, pace necte, caritate orna, castitate sanctifica, ut, qui de beatae virginis Eulaliae passione meruimus habere exemplum, mereamur, devicta iracundia, obtinere triumphum.
2185	Deus spei lumen ... munere collaudare.
	Deus spei, lumen sincerum mentium luxque perfecta beatorum, qui vere es lumen ecclesiae tuae, da cordibus nostris et dignam tibi orationem persolvere et te semper praeconiorum munere collaudare.
2186a	Deus spes vera ... suavissimo accipias.
	Deus, spes vera credentium, Deus, gloria sempiterna sanctorum, pro cuius miseratione indulgentiam consequuntur peccatores, precamur te, domine, suppliciter, ut propitius respicias et sanctifices sacrificia ista et quasi incensum flagrans in odore suavissimo accipias.
2186b	Deus spes et ... suavissimo acceptes.
	Deus, spes et vita credentium, gloria sempiterna sanctorum, cuius indulgentiam consequuntur peccatores, respice propitius preces nostras, ut intercessione sanctorum Maximi et Philiberti sic tua indulgentia oblationem sanctifices et in odore suavissimo acceptes.
2187	Deus sub cuius ... salute laetemur.
	Deus, sub cuius nutibus vitae nostrae momenta decurrunt, suscipe preces et hostias famulorum famularumque tuarum, pro quibus misericordiam tuam, aegrotantibus, imploramus, ut, de quorum periculo metuimus, de eorum salute laetemur.
2188	Deus sub cuius ... a venia.
	Deus, sub cuius oculis omne cor trepidat et omnes conscientiae pavescunt, propitiare omnium doloribus gementium et cunctorum medere vulneribus, ut, sicut nemo nostrum liber a culpa est, ita nemo sit alienus a venia.
2189	Deus sub cuius ... ad veniam.
	Deus, sub cuius oculis omne cor trepidat et omnes conscientiae pavescunt, respice propitius ad preces gemitus mei et, qui me, nullis dignum meritis, in loco huius servitutis tuae sacris fecisti assistere altaribus, ita secundum multitudinem miserationum tuarum da mihi indulgentiam peccatorum meorum, ut mea fragilitas, quae per se proclivis est ad labendum, per te semper muniatur ad standum et, quae per se prona est ad offensam, per te semper reparetur ad veniam.
2190	Deus summa spes ... pietate succurre.
	Deus, summa spes nostrae redemptionis, qui in terra promissionis ante omnes terras nasci elegisti mortemque ibidem sustinuisti, libera propitius animam famuli tui illius de manibus daemonum et eandem terram de potestate paganorum, ut populus, qui in te non credit, per virtutem tuam emendationem habeat et illis omnibus, qui in te confidunt, pro tua magna pietate succurre.
2191	Deus summe cuius ... non ruinam.
	Deus summe, cuius sacrum pascha post biduum exspectamus, tu offerentibus et defunctis veniam largire propitius sicque inediam abstinentium dulcedine crucis tuae sustenta, quo humilitatis nostrae ieiunia statum semper habeant, non ruinam.
2192	Deus temporalis vitae ... pace consistat.
	Deus, temporalis vitae administrator, aeternae quoque auctor atque largitor, miserere supplici tuo regi nostro illi, coniugi et proli populoque, sibi subiecto, in tua proiectione et defensione fidenti, ut, per virtutem brachii tui omnibus sibi adversantibus superatis, in tuae tranquillitatis ac securitatis pace consistat.
2193	Deus tibi gratias ... dona deposcimus.
	Deus, tibi gratias agimus, per te mysteria sancta celebramus, a te sanctitatis dona deposcimus.
2194	Deus totius claritatis ... consequi mereantur.
	Deus, totius claritatis conditor et moderator, quem caelestia mirantur et terrena pavitant, inferna tremescunt, cui angelorum turmae et archangelorum exercitus militant, non uti mundum expugnes, quem ipse fecisti, sed ut subruas mundi peccata, quae diabolus adinvenit, quia ita dignatus es diligere hunc mundum, ut unigenitum tuum traderes pro nostra salute, cuius cruce redempti sumus, morte vivificati, passione salvati, resurrectione glorificati; per ipsum itaque te supplices invocamus, ut huic familiae tuae in omnibus adesse digneris; sicut adfuisti patribus nostris, sperantibus in tua misericordia, sic et his omnibus adesse dignare, ut sit in sensibus eorum timor devotionis tuae, in corde fides, in opere iustitia, in actu pietas, in lingua veritas, in moribus disciplina, ut digne recteque immortalitatis sibi praemium consequi mereantur.
2195	Deus totius conditor ... dignanter adscribi.
	Deus, totius conditor creaturae, famulos tuos, quos fonte renovasti baptismatis quosque gratiae tuae plenitudine solidasti, in adoptionis sorte facias dignanter adscribi.
2196	Deus tuorum gloria ... prospera concede.
	Deus, tuorum gloria iustorum, martyre tuo Hippolyto, quaesumus, pro nobis supplicante, omnia nobis prospera concede.
2197	Deus tuorum gloria ... sentiamus auxilium.
	Deus, tuorum gloria sacerdotum, praesta, quaesumus, ut sancti confessoris et episcopi tui Donati, cuius festa gerimus, sentiamus auxilium.
2198	Deus tuorum gloria ... intercessionem assiduam.
	Deus, tuorum gloria sacerdotum, qui beatum praesulem Ethelwoldum pontificali decorasti merito ei honore, tribue ex tua gratia eius supplicibus et tuam promereri clementiam et eius intercessionem assiduam.
2199	Deus une et ... opus obtineat.
	Deus une et immense, qui tam misericorditer lapsorum defectum reparas, quam potenter eorum, quae non erant, statum aedificas, da ecclesiae tuae sanctae catholicae et fidei plenitudinem, quam illi dedisti, perfecte tenere et his, qui per lapsum operis in illa succumbunt, ex miseratione reparationem adesse, quo aeternitatem per fidem acquirat et gloriae dignitatem per opus obtineat.
2200	Deus une et ... obitum mereamur.
	Deus une et trine, simplex et iuste, admirabilis et praeclare, quem societas illa trina et indivisa sanctorum tuorum Fructuosi, Agorii et Eulogii sic unita laudis voce inter flammas concelebrat, ut, quamlibet exusta ignibus membra deciderent, eorum tamen animae, divino flante spiritu, plus calerent, concede nobis tuorum martyrum intercessione, ut per cottidiana temporum incrementa tua in nostris cordibus dilectio coalescat, caritas ferveat ac legis tuae meditatio convalescat, ut, odiorum sopitis iurgiis, vigeat in nobis flamma divina et exstinguantur malae cupidinis nutrimenta, quo, sicut praedicti martyres, iniecti camino, suis te in passionibus laudaverunt, sic nos, te opitulante, ex omnium bonorum fructu tibi placere ante nostrum obitum mereamur.
2201	Deus universae bonitatis ... lucis claritatem.
	Deus, universae bonitatis auctor et egregiae virginitatis conservator, adesto nobis, quaesumus, sanctae virginis Ethelburgae sollemnitatem celebrantibus, et praesta, ut per eius intercessionem mereamur accipere praesentis vitae iucunditatem et sempiternae lucis claritatem.
2202	Deus universalis creaturae ... et tribue divinitatis tuae dignanter indulta ut qui munera tui honoris offerimus culpae nostrae debita non luamus deprecantes ut quicumque iunguntur ad osculum magis illigentur affectu teneatur hoc pectore quod
	Deus, universalis creaturae dominator ei conditor, quem agnoscere lux est, colere salus, desiderare corona est, suscipe humilitatis nostrae libenter <oblata> et tribue divinitatis tuae dignanter indulta, ut, qui munera tui honoris offerimus, culpae nostrae debita non luamus, deprecantes, ut, quicumque iunguntur ad osculum, magis illigentur affectu, teneatur hoc pectore, quod ore profertur.
2203a	Deus universalis machinae ... in cunctis.
	Deus, universalis machinae propagator, qui in sanctis spiritaliter, in matre vero virgine etiam corporaliter habitasti, quae, ditata tuae plenitudinis ubertate, mansuetudine florens, caritate vigens, pace gaudens, pietate praecellens, ab angelo gratia plena, ab Elisabeth benedicta, a gentibus merito praedicatur beata, cuius nobis fides mysterium, partus gaudium, vita provectum, discessus attulit hoc festivum, precamur supplices, ut pacem, quam in assumptione matris tunc praebuisti discipulis, in sollemnitate huius nunc largiaris in cunctis.
2203b	Deus universalis machinae ... Mariae virginis.
	Deus, universalis machinae propagator, qui dignatus es in sanctis habitare cordibus pacificis tuaque vero in matre etiam permansisti corporaliter, ut ita eam omnium efficeres credentium matrem sicque, ditatam ubertate tuae plenitudinis, digne illam in suo adornares exitu, ineffabiliter praedicandam. Insigne quoque ea, florens castitate atque mansuetudine, sicque ab angelo gratia audivit plena: “Adest dominus, inquit, tecum”. Ab Elisabeth iterum eiusdem domini mater indicitur benedicta in mulieribus. Certe singulariter dominum dignoscitur gestatura, angelis et cunctis gentibus pacem conceptum, cuius fides novum in saeculo edidit mysterium, suus partus attulit gaudium, vita concessit provectum, suus discessus hoc idoneum nobis attribuit festum. Tuis qui pacem in huius assumptione tunc praebuisti discipulis, nobis, quaesumus, largians in huius sollemnitate gaudium omnibus, cunctis simulque haereticorum scandalum longius propellatur ab ecclesiae membris. Ita vero, domine, tuam abundantissimam pietatem in hoc die exoramus, ut te bene colentibus cunctis digneris concedere abundantiam pacis per huius interventum Mariae virginis.
2204	Deus veniae largitor ... iubeas conscribi.
	Deus, veniae largitor et humanae salutis amator, quaesumus clementiam tuam, ut nomina famulorum famularumque tuarum, quae hic piae dilectionis officio pariter conscripsimus, in libro vitae miserationis tuae gratia iubeas conscribi.
2205	Deus veniae largitor ... pervenire concedas.
	Deus, veniae largitor et humanae salutis amator, quaesumus clementiam tuam, ut nostrae congregationis fratres, qui ex hoc saeculo transierunt, beato illo patrono nostro intercedente, ad perpetuae beatitudinis consortium pervenire concedas.
2206	Deus vera pietas ... iubeas collocari.
	Deus, vera pietas et pia veritas, invicta clementia et bonitas sempiterna, qui, nos a morte volens eripere, dominum nostrum Iesum Christum mortem fecisti subire, ut illius usque infernum descensus noster esset usque ad caelum adscensus, te suppliciter postulamus, ut anima famuli tui illius, quam de huius saeculi aerumnosa peregrinatione praecipisti vocari, universorum delictorum concessa remissione, in Abrahae gremio iubeas collocari.
2207	Deus verae beatitudinis ... quo ducunt.
	Deus, verae beatitudinis auctor atque largitor, dirige nos in eam, quam immaculati ambulant, viam, ut, testimonia legis tuae piis cordibus exquirentes, perseveremus et diligere, quod praecipiunt, et desiderare, quo ducunt.
2208	Deus victricis Agnes ... meritis virginem.
	Deus, victricis Agnes adiutor et praemium, exaudi nos illius interventu, cuius passionis natalem celebramus, cui tanti muneris gratiam contulisti, ut diabolum, qui per Evam humanum genus omne subverterat, tenera aetate Agnes contereret et sexu imbecili superaret, veritatis confessione prosterneret, evidenter ostendens, quod non solum perpetuae virginitatis martyr esset et virgo mansura sed agni immaculati sponsa fieri mereretur integre de nomine; assume ergo huius sacrificii immolationem gratanter, qui coronasti gloriosam pro tantis meritis virginem.
2209	Deus virtutum corona ... intercessione eius peccata nostra habeant finem et in futuro suis meritis mereamur
	Deus virtutum, corona martyrum, collator gratiarum, suscipe tantillae plebis precum obsequia, quae ob honorem virginis tuae Eulaliae tibi deferimus dedicanda. Tu enim eam ultra aetatem facis esse victricem, quam, nullis praecedentibus meritis, iam olim feceras tui nominis confessorem. Sit ergo, domine, eadem virgo sanctissima ante conspectum gloriae tuae nostrorum criminum et intercessor pariter et assertrix, ut et diluenda proponat et proposita precibus diluat, qualiter sic, confessionem delictorum nostrorum accipiens, ante te culpas singulorum ad emolumentum veniae asserat, ut intercessorem pro his, quae asseruerit, interponat. Sit in salvationem terrae, sit in defensionem patriae. Gubernet civem, eliminet hostem, subruat pestem, arceat famem, morbos dissicet, adversum omne repellat optataque perficiat. Sicque per eam fautorem te semper nostris precibus praebe, ut et his <diebus> intercessione eius peccata nostra habeant finem et in futuro suis meritis mereamur invenire quietem.
2210	Deus virtutum cuius ... nutrita custodias.
	Deus virtutum, cuius est totum, quod est optimum, insere pectoribus nostris amorem tui nominis et praesta, ut in nobis religionis augmento, quae sunt bona, nutrias, ac vigilanti studio, quae sunt nutrita, custodias.
2211	Deus vita credentium ... in honorem beati illius fiat domus orationis quod perfidorum fuerat ante latibulum et quia infidelium turba in isto loco conveniebat adversa populus tuus oblationibus suis te hic semper mereatur
	Deus, vita credentium et origo virtutum, reple, quaesumus, hoc templum tuae gloria maiestatis, <ut> in honorem beati illius fiat domus orationis, quod perfidorum fuerat ante latibulum, et, quia infidelium turba in isto loco conveniebat adversa, populus tuus oblationibus suis te hic semper mereatur invenire propitium.
2212	Deus vita credentium ... virtute divina.
	Deus, vita credentium, regio vivorum, exspectatio fidelium, resurrectio mortuorum, captivorum redemptio, aeternitas redemptorum, benignus indultor supplicantium, preces accipe suffragantium, intercessionibus mitigare confitentium, peccata dimitte et, quos redimere dignatus es humilitate corporea, protegere digneris virtute divina.
2213a	Deus vita fidelium ... semper abundantia repleantur.
	Deus, vita fidelium, gloria humilium, beatitudo iustorum, propitius suscipe supplicum preces, ut animae, quae promissiones tuas sitiunt, de tua semper abundantia repleantur.
2213b	Deus vita fidelium ... caritatis abundantia repleantur.
	Deus, vita fidelium, gloria humilium, beatitudo iustorum, propitius accipe supplicum preces, ut animae, quae promissiones tuas sitiunt, de tuae semper caritatis abundantia repleantur.
2214	Deus vita fidelium ... pervenire mereatur.
	Deus, vita fidelium, timentium te salvator et custos, qui famulum tuum illum ad hunc diem natalis sui genuinum, expleto anno, perducere dignatus es, gratiam in eo vitae provectioris augmenta et dies eius annorum numerositate multiplica, ut, te annuente, per felicem provectus aetatem, ad principatum caelestium gaudiorum pervenire mereatur.
2215a	Deus vita viventium spes morientium salus omnium in te sperantium praesta propitius ut animae famulorum ... luce laetentur.
	Deus, vita viventium, spes morientium, salus omnium in te sperantium, praesta propitius, ut animae famulorum famularumque tuarum, a nostrae mortalitatis tenebris absolutae, in perpetua cum sanctis tuis luce laetentur.
2215b	Deus vita viventium spes morientium salus omnium in te sperantium praesta propitius ut animae huius congregationis ... luce laetentur.
	Deus, vita viventium, spes morientium, salus omnium in te sperantium, praesta propitius, ut animae huius congregationis vel hic requiescentium, a nostrae mortalitatis tenebris absolutae, beato illo patrono nostro intercedente, in perpetua cum sanctis tuis luce laetentur.
2216	Devotas domine humilitatis ... fides aperiat.
	Devotas, domine, humilitatis nostrae preces et hostias misericordiae tuae praecedat auxilium et salutem, quam per Adam in paradiso ligni clauserat temerata praesumptio, ligni rursum fides aperiat.
2217	Devotionem meam domine ... habitare delectet.
	Devotionem meam, domine, dignanter intende et diuturnam mihi vitam cum tranquillitate concede talique in praesenti saeculo subsidio muni, ut paradisi me in futuro habitatorem efficias, et ita cor meum sanctificando benedic et benedicendo sanctifica, ut mecum iugiter immo in me te habitare delectet.
2218	Devotionem populi tui ... in mente.
	Devotionem populi tui, quaesumus, domine, benignus intende, ut, qui per abstinentiam macerantur in corpore, per fructum boni operis reficiantur in mente.
2219	Devotionem quaesumus domine ... pectus exhibeat.
	Devotionem, quaesumus, domine, nostrae mentis informa, ut cum oblationibus hostiarum purum tibi pectus exhibeat.
2220	Devotioni nostrae domine ... remedium salutare.
	Devotioni nostrae, domine, quaesumus, clementer adesto, ut, intercedente beato Donato martyre tuo atque pontifice, quod ad honorem tui nominis debito frequentamus obsequio, fiat nobis remedium salutare.
2221	Devotionis nostrae tibi ... mirabiliter operetur.
	Devotionis nostrae tibi, quaesumus, domine, hostia iugiter immoletur, quae et sacri peragat instituta mysterii et salutare tuum nobis mirabiliter operetur.
2222	Devotum tibi populum ... obtineat remissionem.
	Devotum tibi populum, benignissime deus, clementer exaudi, ut, qui pio affectu venerandam beatae Mariae Aegyptiacae recolit sollemnitatem, eius meritis apud te peccatorum obtineat remissionem.
2223	Dextera tua deus ... in memoriam.
	Dextera tua, deus, benedicat semper hanc domum et hos famulos, quos tuis reficis donis; da cottidie, clemens, munera larga per omnes, ut, satiati donis, referant tibi laudes perennes in memoriam.
2224	Dicata nomini tuo ... placiti relaxentur.
	Dicata nomini tuo munera, domine, sanctorum tuorum pro nobis satisfactio prosequatur, ut offensae nostrae per eos, qui tibi sunt placiti, relaxentur.
2225	Dicatae tibi domine ... profectibus innovemur.
	Dicatae tibi, domine, quaesumus, capiamus oblationis effectum, ut, a terrenae vetustatis conversatione mundati, caelestis vitae profectibus innovemur.
2226	Dicato sollemniter famulatu ... recipere consecrata.
	Dicato sollemniter famulatu, omnipotentiam tuam, domine, supplices imploramus, ut, concesso nobis sanctorum omnium patrocinio, oblationes populi tui clemens accipias et propitius benedicas. Praestes etiam prosperitatem vivis et quietem defunctis et, qui ad testimonium devotionis deferunt consecranda, ad remedium salutis mereantur recipere consecrata.
2227	Dies istos domine ... pro defunctis.
	Dies istos, domine, quos in laetitia celebramus, Christi tui resurrectio gloriosa depinxit nobisque in generatione perpetua celebrandos doctrina apostolica dereliquit. Adstantes ergo ante tuam maiestatem, clementissime pater, pascha legitimum frequentamus et, ut nobiscum sit sponsus aeternus, iugi obsecratione deposcimus. Eripe itaque nos et familiam tuam ab iniquitatibus cunctis, ab scandalo et diebus malignis. Praepara nobis mensam venerandi altaris, quam circumdemus velut suboles magnifici regis, ut, offerentes propitiatorium libamen pro nobis et famulis tuis, exaudiri apud te mereamur tam pro viventibus quam pro defunctis.
2228	Dies nostros domine ... redde fecundos.
	Dies nostros, domine, placatus intende et, quos praesenti cursu multiplicas, iustis operibus redde fecundos.
2229	Digna domine deus ... benedictionum tuarum.
	Digna, domine deus noster, laus debetur martyribus tuis, digna veneratio militibus certis, dignum obsequium impendi debet fidelibus amicis. Tres hodie voluerunt mori, ut viverent; voluerunt occidi, ut regnarent; voluerunt crucifigi, ut gehennae cruciatus evaderent et divitias regni caelestis perpetuo possiderent. O beatum consilium, quod inter tormenta et poenas non est mutatum sed sic Faustus, Ianuarius et Martialis toto animo et corde confortati sunt per spiritum sanctum, ut hodie vincerent diabolum, calcarent saeculum et mente et corpore sequerentur regem aeternum, quorum expetimus interventu, ut per ipsos praebeas te nobis, domine deus noster, propitium et infundas super nos multimodas misericordias benedictionum tuarum.
2230a	Digne nos tuo ... sensibus operetur.
	Digne nos tuo nomini, quaesumus, domine, famulari salutaris cibus et sacer potus instituat et renovationem condicionis humanae, quam mysterio continet, in nostris iugiter sensibus operetur.
2230b	Digne nos tuo ... sensibus offeratur.
	Digne nos tuo nomini, quaesumus, domine, famulari salutaris cibus et sacer potus efficiat, ut renovatio condicionis humanae, quam mysteria continent, in nostris iugiter sensibus offeratur.
2231	Dignus es domine ... audeat violare.
	Dignus es, domine deus noster, accipere virtutem et fortitudinem, quia tu creasti omnia et sine tua voluntate factum est nihil. Exaudi nos, supplicantes pro famulo tuo illo, sicut exaudire dignatus es Petrum in mari. Ita et per eius suffragia tuae dextera maiestatis ipsum putridissimum diabolum ab hoc corpore famuli tui expellere digneris, ut eum per tuum sanctum munimen er per tuum sanctum nomen et per sigillum sanctae crucis domini nostri Iesu Christi, quem ego indignus et peccator signo, amplius numquam audeat violare.
2232	Dilatetur omnipotens deus ... ex dono.
	Dilatetur, omnipotens deus, anima nostra in pacem tuam et caro obsequatur tibi per abstinentiae parsimoniam, ut utraque, tibi fideliter obsequendo, caritatis tuae remuneretur ex dono.
2233	Dimitte domine peccata ... clementer exaudias.
	Dimitte, domine, peccata nostra et tribue nobis misericordiam tuam, qua, oris nostri alloquio deprecatus, famuli tui illius humilitatem attendas, vincula solvas, delicta deleas, tribulationem inspicias, adversitatem repellas, effectumque petitioni nostrae largiens, clementer exaudias.
2234	Dirigat corda nostra ... non possumus.
	Dirigat corda nostra, domine, quaesumus, tuae miserationis operatio, quia tibi sine te placere non possumus.
2235a	Dirige deus viam ... cor directum.
	Dirige, deus, viam famuli tui nosque pro eo exaudi supplicantes habeat iter prosperum et in te, domine, cor directum.
2235b	Dirige quaesumus domine ... cor directum.
	Dirige, quaesumus, domine, viam famulorum tuorum in voluntate tua nosque propitius exaudi supplicantes, ut habeant iter prosperum et in te cor directum.
2236	Dirige domine famulum ... viam pacis.
	Dirige, domine, famulum tuum illum in via tua et custodi eum in omnibus viis tuis et angelus sanctus tuus caelestis comitetur cum eo ad dirigendos pedes eius in viam pacis.
2237	Dirige domine quaesumus ... moderante perveniat.
	Dirige, domine, quaesumus, ecclesiam tuam dispensatione caelesti, ut, quae ante mundi principium in tua semper est praesentia praeparata, usque ad plenitudinem gloriamque promissam, te moderante, perveniat.
2238	Dirigere dignare domine ... benedicendas assignet.
	Dirigere dignare, domine deus, in adiutorium nostrum Raphaelem archangelum et, quem tuae maiestati semper assistere credimus, tibi nostras exiguas preces benedicendas assignet.
2239	Discat ecclesia tua ... nosse praesentem.
	Discat ecclesia tua, deus, Infantium, quos hodie veneramur, exemplo sinceram tenere pietatem, quae prius vitam praestitit sempiternam, quam posse(n)t nosse praesentem.
2240a	Disrumpe domine vincula ... per gratiam.
	Disrumpe, domine, vincula peccatorum nostrorum, ut sacrificare tibi hostiam laudis absoluta libertate possimus; retribue, quae ante tribuisti, et salva nos per indulgentiam, quos salvare dignatus es per gratiam.
2240b	Disrumpe domine obsecro ... per gratiam.
	Disrumpe, domine, obsecro, vincula peccatorum meorum, ut sacrificare tibi hostiam laudis absoluta libertate praevaleam. Exstingue per hanc, deprecor, inimici insidias reluctantis. Reforma, quem retribueras tuae donum gratiae castitatis, et nunc salva per indulgentiam, quem dignatus es salvare per gratiam.
2241	Diversis oblationibus sacris ... resurrectionis admittat.
	Diversis oblationibus, sacris altaribus una tamen fidei devotione collatis, mutuae invicem sollicitudinis vota promamus, a domini pietate poscentes, ut corda omnium offerentium ad hostiam rationabilem et complacitae sibi sanctificationis emundet et quiescentium animas in sinu Abrahae collocare dignetur et in parte primae resurrectionis admittat.
2242	Diversis plebs tua ... aeterna contendat.
	Diversis plebs tua, domine, gubernata subsidiis, et praesentia pietatis tuae remedia capiat et futura, ut, transeuntium rerum necessaria consolatione fovente, fiducialius ad aeterna contendat.
2243	Divina libantes mysteria ... donis reficiamur.
	Divina libantes mysteria, quae pro huius sancti illius veneratione tuae obtulimus maiestati, praesta, quaesumus, ut per ea veniam mereamur peccatorum et caelestis gratiae donis reficiamur.
2244a	Divina libantes mysteria ... habere patrocinia.
	Divina libantes mysteria, quaesumus, domine, ut eorum nos ubique intercessio protegat, quorum hic sacra gaudemus habere patrocinia.
2244b	Divina libantes mysteria ... detulimus maiestati.
	Divina libantes mysteria, quaesumus, domine, ut beati Francisci intercessio nos ubique gloriosa protegat, cuius auxilio confisi, haec sacra tuae detulimus maiestati.
2245a	Divina libantes mysteria ... obtulimus maiestati.
	Divina libantes mysteria, quaesumus, domine, ut haec salutaria sacramenta illis proficiant ad prosperitatem et pacem, pro quorum dilectione haec tuae obtulimus maiestati.
2245b	Divina libantes mysteria ... populi assistere mereatur.
	Divina libantes mysteria, quaesumus, domine, ut haec salutaria sacramenta principi nostro proficiant ad prosperitatem et pacem, quatenus tibi secura mente deserviat et in tua semper protectione ad tutamentum christiani populi assistere mereatur.
2245c	Divina libantes mysteria ... semper assistere mereatur.
	Divina libantes mysteria, quaesumus, domine, ut haec salutaria sacramenta famulo tuo illi ad corporis et mentis medelam proficiant eumque a vitiis expurgent et a periculis omnibus exuant et per intercessionem sanctae dei genitricis Mariae in tua faciant proficere dilectione et laetari protectione, ut in tua pace semper assistere mereatur.
2246	Divina libantes sacramenta ... ad indulgentiam.
	Divina libantes sacramenta, concede, quaesumus, omnipotens deus, ut haec eadem nobis proficiant ad salutem et animabus, pro quibus tuam deprecamur clementiam, prosint ad indulgentiam.
2247	Divina nos quaesumus ... misericorditer protegant.
	Divina nos, quaesumus, domine, purificent sacramenta et famulum tuum abbatem nostrum cum subditis suis misericorditer protegant.
2248	Divinam misericordiam fratres ... corda confirmem.
	Divinam misericordiam, fratres carissimi, concordi oratione poscamus, ut haec salutifera sacramenta, nostris recepta visceribus, purificent animam corpusque sanctificent atque in spem caelestium viscera pariter et corda confirmem.
2249	Divini muneris largitate ... exsistere concedas.
	Divini muneris largitate refecti, quaesumus, domine deus noster, ut, quos tuis sacrificiis deservire voluisti, ipsos tibi hostiam viventem semper exsistere concedas.
2250	Divini muneris largitate ... participatione vivamus.
	Divini muneris largitate satiati, quaesumus, domine deus noster, ut in huius semper participatione vivamus.
2251	Divini muneris largitate ... tuearis eum.
	Divini muneris largitate satiati, quaesumus, domine, ut devotionem famuli tui illius confirmes in bonis et mittas ei auxilium de sancto et de Sion tuearis eum.
2252	Divini perceptio sacramenti ... dulcedinem epularum.
	Divini perceptio sacramenti famem, domine, quaesumus, a nobis repellat animarum et sancti Machuti intercessio ad caelestium nos perducat dulcedinem epularum.
2253	Divini quaesumus domine ... pios adiutores.
	Divini, quaesumus, domine, perceptio sacramenti beatorum apostolorum tuorum Petri et Pauli supplicationibus nos ab universis tueatur adversitatibus, ut, quos habuimus in fide doctores, in omni sentiamus necessitate pios adiutores.
2254	Divinis domine muneribus ... sentiamus effectum.
	Divinis, domine, muneribus satiati, quaesumus, ut beati Antonii confessoris tui meritis gloriosis salutaris victimae desideratum sentiamus effectum.
2255	Divinis domine repleti ... caelestibus institutis.
	Divinis, domine, repleti sacramentis, supplices deprecamur, ut beati pontificis Iuliani meritis nos dignos facias caelestibus institutis.
2256	Divinis quaesumus domine ... praemia consequamur.
	Divinis, quaesumus, domine, redempti mysteriis, ut beatae Brigidae virginis tuae suffragiis sublevemur et a praesentis vitae adversitatibus liberemur et aeternae beatitudinis praemia consequamur.
2257	Divinis sacramentis refecti ... interesse caelestibus.
	Divinis sacramentis refecti, quaesumus, domine deus noster, ut sanctorum martyrum tuorum Basilidis, Cyrini, Naboris et Nazarii intercessionibus gaudiis mereamur interesse caelestibus.
2258	Divino munere satiati ... valeamus mandatis.
	Divino munere satiati, maiestatem tuam supplices exoramus, omnipotens deus, ut intercessionibus sanctorum tuorum Sisinnii, Martyrii et Alexandri propriis careamus culpis et tuis inhaerere valeamus mandatis.
2259	Divino refecti libamine ... reperire laetitiam.
	Divino refecti libamine, quaesumus, domine deus noster, ut, intercedente beata Agnete virgine tua et martyre, praesentis nobis vitae subsidium et aeternae tribuas reperire laetitiam.
2260	Divinorum munerum domine ... auxilii patrocinia.
	Divinorum munerum, domine, sumpta mysteria nobis tuae, quaesumus, salvationis conferant munia et magnifici confessoris tui Martialis pii semper exhibeant auxilii patrocinia.
2261	Doce me domine ... tribue mihi.
	Doce me, domine, quaeso, patientiam ad sustinendum adversa, doce scientiam scripturarum, ut sic loquar, ne superbiam, sic taceam, ne torpescam; sic contine, ut non cadam, sic constringe, ut numquam demittas; malum omne evacuam a conscientia mea et eam tu reple, ne aliud recipiat; erraticum collige ad te et vinculo me tuae pietatis adstringe; tu, duc, quo placet et non dissolvas; tu vere es vita, attrahe me ad te et de mortis ianua revoca me; praecipitem esse non sinas me sed freno disciplinae tuae constringe me; quod animae meae est obvium, repelle a me et prosperum misericordiae bonitate largire in me; peccatum omne tolle a me et gratiam timoris et amoris tui tribue mihi.
2262	Dominator domine qui ... velociter prostrati.
	Dominator domine, qui superstites atque defunctos, sicut volueris, misericors tuum tenes in nutum, adesto precibus nostris, ut, sanctorum nominibus recensitis, illorum meritis adiuvemur atque haec sacrificia, quae tibi offerimus, et viventibus proficiant ad salutem et defunctis opitulentur ad requiem. Etenim, his illatis muneribus, princeps noster et universus exercitus illius in omnibus iugiter opem potiatur divinam, deprecantibus nobis, et, sicut olim Iosue, dum septies cum tubis moenia circuit Iericho, ruentibus muris, illico victoriam cepit de urbe, ita, domine omnipotens deus, orantes deposcimus, ut, si quid fortasse conati fuerint principes nostri contra iram, imperes, ut sub pedibus illius tabescant, velociter prostrati.
2263	Dominator et inspirator ... caelestibus regnis.
	Dominator et inspirator omnium munerum, Christe filius dei, qui apostolorum tuorum praedicatione universos terrarum situs illustras et evangeliorum amne quadrifluo rigas quique pro te mori posse martyribus tribuisti eosque pro ultronea morte coronas, respice in hac festivitate martyris tui sancti Matthaei apostoli et evangelistae tuorum fidelium vota eosque illaesos aevi facito periculosi transire naufragia, ut, qui illum una vocationis tuae voce dignum tibi fecisti ministrum, qui, regalem tuam sequens prosapiem, primus scriberet evangelium, facias nos in te sequendum idoneos et in timore nominis tui perfectos. Instrue, quaesumus, nos eius doctrinis, quem fore voluisti scriptorem primum evangelicae praedicationis. Reple nos eius meritis spiritali fervore, qui praeconia veritatis tuae eius voluisti audiri ex ore. Da nobis amorem tui, qui eidem dedisti gratiam spiritus sancti. Trahe nos ad te miserationibus consuetis, qui illum evangelistam fecisti ex publicanis operibus. Illumina nostri cordis arcana, qui illum, ad teloneum sedentem, vocasti gratia gratuita. Eius interventu nobis adesto placatus, qui tuus factus est in veritate discipulus. Exaudi illum pro nobis, qui apud illum, cum non egeres, prandis. Ipse ad te nostra tibi placitura deferat vota, cuius praedicatio in toto mundo facta est gloriosa. Non nostris nos patiaris puniri pro meritis, qui illum replesti muneribus sanctis. Suscipe in eius honorem nostrum obsequium, qui illum post tanta praeconia fecisti martyrem gloriosum, ut, qui poenam meremur ex propriis, in eius honorem tibi oblatis iustificemur obsequiis, qualiter, dum eius meritis vota famulantium suscipis, eius obtentu facias eidem obsequentes cum illo consortes in caelestibus regnis.
2264a	Domine adiutor et ... iubeas praesentari.
	Domine, adiutor et protector noster, (adiuva nos et) refloreat caro nostra vel vigore pudicitiae vel sanctimoniae novitate, ereptamque de manu tartari, in resurrectionis gaudium iubeas praesentari.
2264b	Domine adiutor meus ... gaudia comprehendat.
	Domine, adiutor meus et protector in tribulationibus, obsecro immensam potentiam et pietatem tuam, ut per auxilium gratiae tuae refloreat caro mea vigore pudicitiae et sanctimoniae novitate, ut, zona castitatis succincta, lorica fidei circumdata, in resurrectione iustorum aeterna gaudia comprehendat.
2265	Domine aeterne cui ... quam docetur.
	Domine aeterne, cui ita in sanctis apostolis tuis Iacobo et Ioanni placuit arcanum dispensationis implere, ut glorioso passionis exemplo apostolorum chorum ille praecederet, iste praemitteret atque ita inter utrumque grex consummaretur beatus, ut omnium devotionem ille praecederet, iste concluderet, miserere nostri et exaudi nos et praesta, ut possimus praedictorum martyrum tuorum apostolorumque vel illius exemplo fidem tenere, qua coronatur, vel istius magisterio caritatem discere, quam docetur.
2266	Domine Christe Iesu ... non negetur.
	Domine Christe Iesu, qui maiestate sublimis es et potestate subnixus, cum in virtute patris obsequeris iussionibus matris, ut et filium hominis ostenderis obsequiis et deum virtutibus approbaris, qui ad omnium gentium lavationem Iordanis alveum sanctificaturus intrasti, ut peccata nostra ablueres conscientiasque purgares, visita ecclesiam tuam et perfice omnium vota; pacem etiam non petentibus praesta, ut osculum, quod in labiis datur, in cordibus non negetur.
2267	Domine deus Abraham ... saecula saeculorum.
	Domine, deus Abraham, deus Isaac, deus Iacob, deus patriarcharum, prophetarum, apostolorum et martyrum omniumque sanctorum, sicut pro piissima misericordia tua dedisti eis voluntatem veniendi ad te, ita, clementissime pater, da servis tuis intellectum, virtutem et possibilitatem, ut tibi secundum voluntatem tuam serviamus; spiritus tuus bonus deducat nos in via recta; da incipientibus perfectionem, da parvulis intellectum, da currentibus adiutorium, da neglegentibus compunctionem, da tepidis spiritum ferventem, da perfectis bonam consummationem; loquatur os nostrum laudem tuam et per singulos dies benedicamus te et laudemus nomen tuum in aeterna saecula saeculorum.
2268	Domine deus cunctipotens ... virtutum percipere.
	Domine deus, cunctipotens pater, totius mundanae molis mirificus opifex, suscipe deprecationem servorum tuorum cum muneribus hostiarum, quae in sacratissima celebritate famulae tuae Etheldrethae tibi deferimus, et concede, ut per haec divina sacramenta cunctos carnales actus valeamus respuere atque omnium incrementa virtutum percipere.
2269	Domine deus de ... nos defende.
	Domine, deus de deo, lumen de lumine, qui humanum genus ex praecepto patris patibulo crucis proprio sanguine redimere dignatus es, te suppliciter exoramus, ut non secundum peccata nostra facias nobis, sed secundum misericordiam tuam salvos nos fac indignos famulos tuos; tu quoque exsurge in adiutorium nostrum et esto ibi turris fortitudinis et clipeus inexpugnabilis iustitiae a facie tam corporalis quam incorporalis inimici atque ab omni peccato et poena misericorditer nos libera et ab omni adversitate corporis et animae clementer nos defende.
2270	Domine deus dilectionis ... infunde pectoribus.
	Domine, deus dilectionis et pacis, in cuius dextera salus nostra est, praesta, ut ad te non ore tantum sed et corde vigilemus; timorem tui nominis nostris emitte visceribus et amorem infunde pectoribus.
2271	Domine deus Iesu ... credimus obsequela.
	Domine deus, Iesu Christi domini nostri ante cuncta principia genitor et in fine saeculi demonstrator, te supplices humili imploratione precamur, ut nobis, in hoc die sacrato virginis tuae illius collectis, nulla diabolicae fraudis illecebrosa irruptio subrepat, ut, quae, vim suae carnis vincendo, sexum meruit transgredi genitalem, nos quoque sua tibi faciat esse placibiles prece et, quae per carnis suae contemptum amori connexa est tuo, nos suo adsociet, te miserante, consortio, quaeve triumphalem palmam adepta est sui sanguinis effusione, pro nobis apud te suffragetur in iudicii futuri examine, ut nos debita non puniamur ex poena, qui eius suffragio nostraque te placari credimus obsequela.
2272	Domine deus incomprehensibilis ... vitae nostrae.
	Domine deus, incomprehensibilis, aeterne, perpetue, benedicte, qui dixisti: “Non veni vocare iustos sed peccatores ad paenitentiam” et, cum profectu nostro non egeas, gaudes tamen super uno peccatore, paenitentiam agente, magis quam super nonaginta novem iustos, qui non indigent paenitentia, quia tu es deus solus et praeter te non est alius, qui non vis mortem peccatoris sed ut convertatur et vivat, converte nos, Domine, ad te et convertamur, converte nos, deus, salutaris noster et averte iram tuam a nobis, ne perdas nos cum peccatis nostris, ne tradas bestiis animas confitentes tibi, ne derelinquas in finem, ne intres in iudicio cum servis tuis neque in ira furoris tui corripias nos, miserere nobis, Domine, miserere nobis, opera manuum tuarum sumus, non pereamus, memento congregationis tuae, quam creasti ab initio, dirige nos in viam rectam, doce nos facere voluntatem tuam, quia tu es deus noster, statue pedes in consummatione, ut, te adiuvante, vincamus antiqui hostis insidias, ut, liberi ab infestatione inimici, serviamus tibi in sanctitate et iustitia omnibus diebus vitae nostrae.
2273	Domine deus noster ... et colimus.
	Domine deus noster, concede propitius, ut, qui unigeniti tui sumpsimus corpus et sanguinem, ab infidelis discipuli reddamur caecitate divisi, qui Christum dominum nostrum verum deum hominemque fatemur et colimus.
2274	Domine deus noster ... voluntate subdamur.
	Domine deus noster, cuius est prima causa miserendi, qua nomen tuum timeamus et amemus, cordibus nostris miseratus infunde, ut, quae tibi non placent, refutantes, sincera tibi voluntate subdamur.
2275	Domine deus noster ... per horum patrocinia illorum quorum festivitas hodie colitur ut in te et per te
	Domine deus noster, Iesu Christe, splendor paternae gloriae et dies claritatis aeternae, gratias tibi agimus, quoniam accendere dignatus es duodecim apostolos tuos igne sancti spiritus tui, quasi duodecim horas diei, lumine solis illustratas, quibus dixisti: “Vos estis lux mundi” et iterum: “Nonne duodecim horae diei sunt? Si quis ergo ambulaverit in lumine diei, hic non offendit”, orire nobis, Domine deus noster, Iesu Christe, sol iustitiae, in cuius pennis est sanitas timentium te, ut ambulemus in luce, dum lucem habemus, ut simus filii lucis, qui illuminasti apostolos, quasi luminaria huic mundo, et alios sanctos, quasi tuos vel eorum vicarios, gratia spiritus sancti ac doctrina praeditos, discute a nobis tenebras ignorantiae et iustitiae tuae <lumen immitte> per horum patrocinia illorum, quorum festivitas hodie colitur, ut in te et per te semper maneamus.
2276	Domine deus noster ... pietate succurre.
	Domine deus noster, in cuius spiritalibus castris militat laudanda sobrietas, abstinentia fructuosa et casti pectoris opulenta frugalitas, ieiunantium vota clementer assume et fidelibus, postulatus, consueta pietate succurre.
2277	Domine deus noster ... aeternum laetemur.
	Domine deus noster, magne et omnipotens, qui sanas contritos corde eorumque alligas contritiones, tua te pietas nobis efficiat placabilem, quos condicio fragilitatis humanae constituit in maerore; exaudi, Domine, quia pius es, preces nostras et dimitte nobis cunctas offensiones; manus tuae fortitudine a cunctis angustiis liberemur, ut cum tuis sanctis hic et in aeternum laetemur.
2278a	Domine deus noster ... professione victoriam.
	Domine deus noster, multiplica super nos gratiam tuam et, quorum celebramus gloriosa certamina, tribue subsequi in sancta professione victoriam.
2278b	Domine deus noster ... professione laetitiam.
	Domine deus noster, multiplica super nos gratiam tuam et, quorum praevenimus gloriosa sollemnia, tribue subsequi in sancta professione laetitiam.
2279	Domine deus noster ... proderit occupari.
	Domine deus noster, per quem omnia et ex quo omnia et in quo omnia, plebi tuae, fideliter obsecranti, confer, largire, multiplica, quaecumque ad humani victus substantiam protulisti, ut mentes, a mundi sollicitudinibus relaxatas, cultui tuo tantum liceat adstringi et solum negotio, quod et hic et in aeternum proderit, occupari.
2280	Domine deus noster ... et pace.
	Domine deus noster, quaesumus, concede propitius, ut ecclesia tua iugiter et religione crescat et pace.
2281	Domine deus noster ... efficiant sacramentum.
	Domine deus noster, qui in his potius creaturis, quas ad fragilitatis nostrae praesidium condidisti, tuo quoque nomini munera iussisti dicanda constitui, tribue, quaesumus, ut et vitae nobis praesentis auxilium et aeternitatis efficiant sacramentum.
2282	Domine deus noster ... his sacrificiis iubeas sanctificari et sacrificantibus veniam dari ut ita per hanc oblationem placeris sicut in hoc quondam die effuso huius sanguine placatus es martyris quo oblata a nobis tibi victima singulari et offerentes ab his in quibus se gravari sentiunt liberentur pariter
	Domine deus noster, qui nos martyris tui illius et meritis regis et exemplo componis, rogamus te, ut <nos> his sacrificiis iubeas sanctificari et sacrificantibus veniam dari, ut ita per hanc oblationem placeris, sicut in hoc quondam die effuso huius sanguine placatus es martyris, quo oblata a nobis tibi victima singulari et offerentes ab his, in quibus se gravari sentiunt, liberentur pariter et defuncti.
2283	Domine deus noster ... munere capiamus.
	Domine deus noster, qui nos vegetare dignatus es caelestibus alimentis, suavitatem verbi tui penetralibus nostri cordis infunde, ut, quae temporali devotione percepimus, sempiterno munere capiamus.
2284	Domine deus noster ... placatus impende.
	Domine deus noster, qui salutaria et praevidis solus et tribuis, tu, quaesumus, et mentibus nostris largire semper affectum tuam misericordiam postulandi et, quae nobis sint utilia, placatus impende.
2285	Domine deus noster ... severitas contumaces.
	Domine deus noster, suscipe preces supplicum et famulorum tuorum orationes benignus exaudi; debemus deferre ad publicum crimina, si ad iudicium nolumus sustinere tormenta; debemus humiliari coram hominibus, si volumus coram angelis gloriari; debemus lugere in saeculo, si volumus regnare cum Christo; debemus honorem spernere temporalem, si obtinere volumus gloriam sempiternam. Timeamus deum occultum, in conscientia testem et publicum in examinatione censorem. Non ille quaerit pro ignorantia confessionem sed pro misericordia confessorem. Fratres carissimi, dominum deprecemur, ut sic absolvat pietas humiles, ut non puniat severitas contumaces.
2286	Domine deus noster ... gaudere perpetuis.
	Domine deus noster, tuis nos purifica sacramentis et, quorum nos tribuis interesse mysteriis, concede remediis gaudere perpetuis.
2287	Domine deus noster ... serviens augeatur.
	Domine deus noster, verax promissor, propitiare operi tuo et mihi famulo tuo, servienti tibi, tribue perseverantem in tua voluntate famulatum, ut diebus nostris et merito et numero populus, tibi serviens, augeatur.
2288	Domine deus omnipotens ... gaudio exsultationis.
	Domine deus omnipotens, Christe Iesu, rex gloriae, qui es pax certa et caritas sempiterna, quaesumus, nostra arcana splendore tuae pacis irradia nostramque conscientiam caritatis tuae dulcedine redde purissimam, ut pacifici te pacis auctorem exspectemus et in adversis huius mundi te semper custodem habeamus et protectorem, quatenus, tua custodia saepti, ita pacis studia certissime diligamus, ut, cum in gloria adventus tui aequus retributor adveneris, aeterno potiamur gaudio exsultationis.
2289	Domine deus omnipotens ... patrociniis sublevemur.
	Domine deus omnipotens, cui omnis devota constat virginitas, praesta, quaesumus, ut; qui beatae Margaretae virginis et martyris tuae veneranda sollemnia annua recursione colimus, eius apud te patrociniis sublevemur.
2290	Domine deus omnipotens ... ulterius recedamus.
	Domine deus omnipotens, cui virgo illa et martyr integritate iungitur et sanguine sociatur, praesta, quaesumus, nobis famulis tuis, ut, expiati a peccatis, tibi domino deo nostro sic adhaereamus, ne a te ulterius recedamus.
2291	Domine deus omnipotens ... beatitudinis gaudia.
	Domine deus, omnipotens pater, populi tui hostias et vota suscipias, quaesumus, et per Maioli merita nos transferas ad caelestis beatitudinis gaudia.
2292	Domine deus omnipotens ... gaudia conferant.
	Domine deus omnipotens, qui caelum sideribus depinxisti et mundum sanctorum locorum spatiis distinxisti, in quibus praecipue nomen tuum sanctum a nobis invocari et ad beneficia fidelibus tuis praestanda interpellari voluisti quique me famulum tuum illum non meis meritis sed dono tuae gratiae pontificali cathedra Exoniensium sublimasti, praesta, quaesumus, ut me et omnes oves tuas, quas pabulo doctrinae pascendas mihi commisisti, interveniente beato Petro apostolo tuo, ab omni adversitate protegas et gratiae tuae ubertate laetifices, pacem et salutem, vitam et requiem eis mecum concedas, tam his, qui versantur in corpore, quam illis, qui teguntur in funere, nec eis delicta mea, quibus te irritavi, officiant sed preces, tibi piissimo domino humiliter fusae, aeterna eis paradisi gaudia conferant.
2293	Domine deus omnipotens ... esse
	Domine deus omnipotens, qui corpore et sanguine Christi filii tui nos satiare dignatus es, praesta, quaesumus, ut, beatissimi confessoris tui Hieronymi, cuius in tuo nomine hodie sollemnia celebramus, adiuti subsidio, aeternis <inter>esse epulis mereamur.
2294	Domine deus omnipotens ... sempiternae salutis.
	Domine deus omnipotens, qui dedisti populo tuo manna in deserto ad satiandum, ita precibus beati Nicolai confessoris tui atque pontificis tribue nobis acquirere cibum sempiternae salutis.
2295	Domine deus omnipotens ... patrocinio gaudeamus.
	Domine deus omnipotens, qui nobis sanctorum intercessione succurris, da, quaesumus, ut sancti patricii confessoris tui atque pontificis et exsultemus meritis et patrocinio gaudeamus.
2296	Domine deus omnipotens ... a saeculi quatenus bonorum florente iustitia cuncta subacta tabescerent perfidorum nequitia [unde Domine ] te supplices deprecamur tibique devotis mentibus in hac die fundimus preces pro fideli famulo tuo principeque nostro illo atque pro universo exercitu illius <ut
	Domine deus omnipotens, qui per sapientiam inaestimabilem tuam ita disposuisti mundum, ut absque regibus et principibus nulla cum pace subsisterent climacter<ic>a saeculi, quatenus, bonorum florente iustitia, cuncta subacta tabescerent perfidorum nequitia, [unde, Domine, ] te supplices deprecamur tibique devotis mentibus in hac die fundimus preces pro fideli famulo tuo principeque nostro illo atque pro universo exercitu illius, <ut> ita eum, Domine, per dexteram virtutis tuae contra omnes adversarios semper esse iubeas cum triumphis victorem, sicut quondam auxiliatus es Moysen, dum, adversus inimicos suos dimicans, Hur brachia illius sustentavit usque ad vesperas illeque, lumina levans ad caelos, mox, te auxiliante, Domine, usque ad internicionem suos percussit atque prostravit adversarios. Proinde, Domine, subnexi deposcimus, ut taliter princeps noster, in cunctis tuo iugiter fultus auxilio, innumeros per annos feliciter vigeat in regno.
2297	Domine deus omnipotens ... cognoscimus baptizatos.
	Domine deus omnipotens, qui pro humani generis redemptione coaeternum tibi coaequalemque filium angelica annuntiatione per Mariae virginis uterum usque ad nos voluisti transmittere atque ante ipsius filii tui adventum Ioannem dignatus es destinare praeconem, ut per eius veridicam in deserto eremi praedicationem populus paenitens veternorum facinorum acciperet veniam, per novi autem hominis dei regnum evangelizantis divinae Trinitatis plenam mundus consequi mereretur ineffabilem gratiam, da nobis in hoc tempore adventus unigeniti tui eandem pacis gratiam, quam in praeteritis largire dignatus es saeculis, et illis nos in occursu fidei socies munerandos, quos, in fidei primordio a Ioanne in Iordane paenitentiae undis aquarum ablutos, a te postremo per filium in spirito sancto et in igne cognoscimus baptizatos.
2298	Domine deus omnipotens ... bona tua.
	Domine deus omnipotens, qui salvos facis sperantes in te, tu, clementissime, qui revocas errantes, tu, misericors, qui non despicis confitentes, tu, Domine pater, cum ceciderit iustus, manum opponis, tu, excelsus in caelis, habitaturum te promisisti in terris, ubi fuerint congregati in tuo nomine duo vel tres, esse in medio eorum, te, Domine, tenemus promissorem, ut des veniam paenitentibus, te inveniant omnes, qui quaerunt te, te enim perscrutatorem conscientiarum nostrarum scimus; ideo veniam petimus delictorum, tu, magnus dominus et laudabilis valde, te deprecamur et petimus, ut sis nobis propitius; tibi confitemur mala nostra, ut mereamur consequi bona tua.
2299a	Domine deus omnipotens ... munere praerogetur.
	Domine deus omnipotens, qui solus das pluviam super terram, solus eam mittis ab inferiore caelorum, dona servis tuis beneficium pluviale, ut, quod nostra facinora suspenderunt, tuo munere praerogetur.
2299b = 1279b	Omnipotens deus qui solus aquas ... munere prorogetur. (=CO 1279b)
	Omnipotens deus, qui solus aquas emittis e caelis, dona servis tuis beneficium pluviae salutaris, ut, quod facinore nostro suspenditur, tuo iam gratuito munere prorogetur.
2300	Domine deus omnium ... et meritis.
	Domine deus, omnium sanctorum splendor mirabilis, qui hunc diem beati apostoli tui illius martyrio consecrasti, da ecclesiae tuae digne de tanto gaudere apostolo, ut apud misericordiam tuam et exemplo eius iuvemur et meritis.
2301	Domine deus pater ... cuncta respiciunt.
	Domine deus, pater gloriae, fons bonorum, qui, licet ecclesiam tuam, toto orbe terrarum diffusam, largitate munerum ditare non desinas, sedem tamen beati apostoli tui Petri tanto propensius intueris, quanto sublimius esse voluisti, da mihi famulo tuo huius providentiae tuae dispositionibus exhibere congruenter officium, certus te universis ecclesiis collaturum, quidquid illi praestiteris, quam cuncta respiciunt.
2302	Domine deus pater ... laude laetentur.
	Domine deus, pater omnipotens, famulos, tuae maiestati subiectos, per unicum filium tuum in virtute sancti spiritus benedic et protege, ut, ab omni hoste securi, in tua iugiter laude laetentur.
2303	Domine deus patris ... munimine pergat.
	Domine, deus patris nostri Abrahae, deduc viam famuli tui illius in pace et illo caritatis tuae eum igne succende, quo pacificus ad destinata perveniat, per pacem cuncta disponat et ad desiderata, pacis tuae fultus munimine, pergat.
2304a	Domine deus qui ... moderatione serventur.
	Domine deus, qui ad hoc irasceris, ut subvenias, ad hoc minaris, ut parcas, lapsis manum porrige et laborantibus multiplici miseratione succurre et, qui per te redempti sunt, ad spem vitae aeternae tua moderatione serventur.
2304b	Domine deus qui ... sentiamus cessare.
	Domine deus, qui ad hoc irasceris, ut subvenias, ad hoc minaris, ut parcas, lapsis manum porrige, laborantibus multiplici miseratione succurre, ut gentem paganam, quam pro peccatis nostris super nos cognoscimus praevalere, te miserante, sentiamus cessare.
2305	Domine deus qui ... instruamur aeternis.
	Domine deus, qui, fragilitati nostrae quae congruant, et praevides solus et provides, praesta, ut et praesentibus fulciamur auxiliis et instruamur aeternis.
2306a	Domine deus qui ... esse correctos.
	Domine deus, qui in mysterio aquarum salutis tuae nobis sacramenta sanxisti, exaudi orationem populi tui et iube terrores inundantium cessare pluviarum flagellumque huius elementi ad effectum tui converte mysterii, ut, qui se regenerantibus aquis gaudent renatos, gaudeant his castigantibus esse correctos.
2306b	Domine deus qui ... incolumes attingamus.
	Domine deus, qui iri mysterio aquarum salutis tuae nobis sacramenta sanxisti, exaudi orationem nostram et iube praesentium sedatos esse fluctus aquarum, ut, profundo nobis in tuo nomine subiecto, tua dextera gubernante, litus incolumes attingamus.
2307	Domine deus qui ... populus augeatur.
	Domine deus, qui in regenerandis plebibus tuis ministerio uteris sacerdotum, tribue nobis perseverantem in tua voluntate famulatum, ut dono gratiae tuae in diebus nostris et merito et numero sacratus tibi populus augeatur.
2308	Domine deus qui ... pacis utamur.
	Domine deus, qui nos per ieiunia castigando sanas et ignoscendo conservas, praesta supplicibus tuis, ut et tranquillitatis optatae consolatione laetemur et ad correptionis effectum dono tuae pacis utamur.
2309	Domine deus qui ... ab omnibus.
	Domine deus, qui te a nobis indesinenter rogari vis et clementer tribuis, ut rogeris, qui das votum optanti et pie viventi nihil denegas, proroga, quod audias, ut perficias, quod acceptas. Da nobis, quod ames in nobis, ut digneris semper exaudiri pro nobis. Tribue vota fidelia, sancta desideria, prompta officia, grata eloquia, praeconia indefessa. Sint purae preces, petitiones commodae, supplicationes iustae, rogationes crebrae, laudes assiduae, ut ad salutem aeternam omnia praestes omnibus, dum invocatis ab omnibus.
2310	Domine deus virtutum ... inspiratione dirigantur.
	Domine deus virtutum, qui collapsa reparas et reparata conservas, auge populos, in tui nominis sanctificatione renovandos, ut omnes, qui diluuntur sacro baptismate, tua semper inspiratione dirigantur.
2311	Domine deus virtutum ... de triumpho.
	Domine deus virtutum, qui, transgressus occasum, transscendisti super caelos caelorum ad orientem, captiva spolia de captivitate duxisti, ut genus humanum, quod tua morte redimeras tuaque resurrectione vivificaveras, tua adscensione glorificares et promissione ditares, dona ecclesiae tuae et ad te perveniendi iter prosperum et cottidianum de dic in diem profectum, ut magnificentiae tuae reddat, quod tantam ei virtutem concesseris, ut obtineat, devicto hoste, et libertatem de tuo auxilio et gloriam de triumpho.
2312	Domine deus virtutum ... famulum tuum.
	Domine deus virtutum, suscipe has oblationes, quas tibi offerimus pro famulo tuo, et proice ab eo inimicos adversarios tuos Satanan et omnes subiectos suos daemones, ut amplius non habeant potestatem stare nec fatigare nec iniuriare famulum tuum. In te, Domine, speravimus; non confundamur in aeternum; in tua iustitia et fortitudine libera famulum tuum.
2313	Domine Iesu a ... concede sempiternam.
	Domine Iesu, a quo suum spiritum suscipi martyr Stephanus postulavit, tu, praesentis huius sollemnitatis placatus oblatione, et viventibus veniam et quiescentibus requiem concede sempiternam.
2314	Domine Iesu Christe ... suspiriis animarum nostrarum miserere nobis Domine miserere nobis erue nos a flagello irae tuae da pacem viventibus et da remedium paenitentibus et da requiem defunctis famulis tuis solve captivos sana infirmos illumina caecos mutus loquatur surdus audiat et da gubernationem viduis consolationem orphanis libera nos de peccato libera nos de diabolo malo ipsi semper gratias
	Domine Iesu Christe, fac super nos misericordiam tuam, audi gemitum, comple desiderium de lacrimis <et> suspiriis animarum nostrarum, miserere nobis, Domine, miserere nobis, erue nos a flagello irae tuae, da pacem viventibus et da remedium paenitentibus et da requiem defunctis famulis tuis, solve captivos, sana infirmos, illumina caecos, mutus loquatur, surdus audiat et da gubernationem viduis, consolationem orphanis, libera nos de peccato, libera nos de diabolo malo, ipsi semper gratias agamus illaesi.
2315	Domine Iesu Christe ... sero paenitentem.
	Domine Iesu Christe, fili dei vivi, qui pro redemptione nostra nasci et circumcidi voluisti, et a Iudaeis reprobari, a Iuda osculo tradi, capi et ligari et cum vinculis Annae, Caiphae, Herodi, Pilato offerri et coram eis illudi, colaphis, alapis, flagellis, arundine caedi, facie velari et sputo conspui, spinis coronari, falsis quoque testibus accusari, iudicari et, ut agnus innocens, tuam crucem ferendo, ad victimam duci, clavis perforari, felle et aceto potari atque in cruce morte turpissima condemnari ac lancea vulnerari, tu per has sacratissimas poenas ab omnibus peccatis et poenis nos libera et per sanctam crucem tuam illuc perduc nos, miseros peccatores, quo perduxisti tecum crucifixum latronem, sero paenitentem.
2316	Domine Iesu Christe ... praelargiatur medela.
	Domine Iesu Christe, filius dei vivi, qui tantam gratiam in virgine tua Eugenia contulisti, ut, sicut evidentia eius gesta declarant, quemcumque, in dolore positum, visitasset, et languoris ab eo pestis recederet et optata ad eum sanitas rediret, tu hoc sacrificium, tibi appositum, ita tuae visitationis benedictione sanctifica, ut ex eo sumentibus et criminum praestetur indulgentia et perpetuae salutis praelargiatur medela.
2317	Domine Iesu Christe ... tristitia liberari.
	Domine Iesu Christe, fons pietatis, qui, moriens in cruce, acerrimo dolori cordis tuae maestissimae genitricis multo plus fuisti compassus quam sororibus flentibus, quarum dilectione motus fuisti lacrimis, exaudi propitius preces nostras et praesta, ut, qui eiusdem matris tuae piissimae tristem cruciatum recolimus, meritis illius valeamus perpetua mentis et corporis salute gaudere ab omnique dolore et tristitia liberari.
2318	Domine Iesu Christe ... sine fine.
	Domine Iesu Christe, hanc hostiam vivam illustratione adventus tui sanctifica, ut, ex ea libantes, mundemur a crimine et tuam gratiam mereamur percipere sine fine.
2319	Domine Iesu Christe ... glorificandos attollas.
	Domine Iesu Christe, ineffabilis pulchritudo iustitiae, qui inter lilia pascis et candidissimis delectaris virginum choris, qui desponsatam tibi illam fortissimam virginem tanto caritatis amore iunxisti, ut eam tibi et virginem et martyrem consecrares, praesta, ut, sicut illa in paradiso tuo immarcescibilibus sanctimoniae tuae atque martyrii sertis coronata triumphat, ita nos assiduo eius patrocinio a colluvionibus peccatorum et illecebris carnalibus abstrahas ac defendas et sic tibi acceptos efficias, ut aeternae indulgentiae compotes reddas et pacis tuae muneribus glorificandos attollas.
2320	Domine Iesu Christe ... superare commenta.
	Domine Iesu Christe, pro cuius amore beatissima Eugenia et affectum parentum et copias oblita est facultatum, cum, relictis domo, parentibus, fratribus atque familiis, aufugiens, crinibus detonsis, te sequendo, adiungitur christianis, tuis cupiens sua colla subiugare praeceptis, tu ecclesiae tuae precibus adesto mitis atque placabilis, ut ad instar huius martyris tuae relinquamus saeculum, contemnamus vanarum illecebras voluptatum, affectus parentum atque curas rerum periturarum, ut, ad te diligendum, te sequendum teque fruendum nullis obicibus impediti, ita libentissime praesentis saeculi evincamus mala, sicut haec virgo fallentis Melantiae valuit superare commenta.
2321	Domine Iesu Christe ... diebus nostris.
	Domine Iesu Christe, propitius esto mihi peccatori, quia misericordia tua primus indigeo et pro consacerdotibus meis exorare praesumo, quia tu es immortalis et sine peccato. Tu solus dominus deus noster. Tu es benedictus, qui benedicis omnia. Tu es sanctus, qui sanctificas omnia. Universa nobis indulge indignis famulis tuis, quia peccatores sumus et indigni, quod praesumimus ad sanctum altare tuum invocare te, quia peccavimus coram te et coram angelis tuis, sed tribue nobis indulgentiam delictorum et confirma sanctam ecclesiam tuam in fide orthodoxa et doce nos facere voluntatem tuam omnibus diebus nostris.
2322	Domine Iesu Christe ... facias praenotari.
	Domine Iesu Christe, quem venturum esse credimus iudicem, qui iamdudum in primo adventu gloriae tuae propter nostra scelera humilis venire dignatus es, petimus, ut, dum adventus clementiae tuae secundus advenerit, nostra nomina, absterso peccato, cum sanctis tuis facias praenotari.
2323	Domine Iesu Christe ... infidelitas Iudaeorum.
	Domine Iesu Christe, qui beatissimo primoque martyri tuo Stephano post ictus lapidum concessisti praemium sempiternum, tu sereno vultu respice hoc sacrificium nostrum et praesta nobis famulis tuis, ut prece huius martyris tam viventibus quam defunctis donetur indulgentia criminum, per quem olim confutata est infidelitas Iudaeorum.
2324	Domine Iesu Christe ... patris mei”.
	Domine Iesu Christe, qui de caelis ad terram de sinu patris descendisti et in ligno crucis quinque plagas sustinuisti et sanguinem tuum pretiosum in remissionem peccatorum nostrorum effudisti, te suppliciter deprecamur, ut, in die iudicii ad dexteram tuam statuti, a te audire mereamur: “Venite, benedicti, in regnum patris mei”.
2325a	Domine Iesu Christe ... universus mundus in tenebras conversus est illam nobis lucem in anima et corpore nostro semper tribue per quam ad aeternam vitam
	Domine Iesu Christe, qui [dum] hora sexta pro redemptione mundi crucis adscendisti lignum, <dum> universus mundus in tenebras conversus est, illam nobis lucem in anima et corpore nostro semper tribue, per quam ad aeternam vitam pervenire mereamur.
2325b	Domine deus Iesu ... pervenire mereamur.
	Domine deus Iesu Christe, qui hora sexta pro redemptione mundi crucis lignum adscendisti, ut universus mundus, qui in tenebris erat, illuminaretur, te supplices deprecamur, ut illam lucem in anima et corpore nostro semper tribuas, per quam ad vitam aeternam pervenire mereamur.
2325c	Domine Iesu Christe ... pervenire mereamur.
	Domine Iesu Christe, qui pro mundi redemptione crucis lignum adscendisti, ut universus mundus, qui in tenebris erat, illuminaretur, illam, quaesumus, lucem in animas et corpora nostra semper infunde, per quam ad aeternam lucem pervenire mereamur.
2326	Domine Iesu Christe ... introire mereamur.
	Domine Iesu Christe, qui hora diei sexta pro redemptione mundi crucis patibulum adscendisti et sanguinem tuum pretiosum in remissionem peccatorum nostrorum fudisti, te humiliter deprecamur, ut per tuae passionis et vulnerum tuorum merita, post obitum nostrum paradisi ianuam gaudenter introire mereamur.
2327	Domine Iesu Christe ... impetrare defunctis.
	Domine Iesu Christe, qui es ineffabilis bonitas et invicta potestas, pro cuius nomine beatissimus Saturninus praesul et martyr, dum litari aris daemonicis renuit, ad Capitolium a turbis attrahitur furentisque tauri supplicio consecratur, tu eius meritis et offerentium suscipe vota et omnes in commune pro tua miseratione iustifica, quo, exauditi pro nobis, requiem etiam apud te mereamur impetrare defunctis.
2328	Domine Iesu Christe ... requiem transferantur.
	Domine Iesu Christe, qui es testis fidelis, primogenitus mortuorum, tu requiem dona spiritibus fidelium defunctorum, quo verus pontifex per hoc sacrificium populi delicta omittens sicut olim, te moriente, mortua corpora surrexerunt, ita nunc in hac resurrectionis tuae festivitate sepulti in aeternam requiem transferantur.
2329	Domine Iesu Christe ... gratuitae bonitatis.
	Domine Iesu Christe, qui, ex virgine natus, unicus virginum permanes sponsus, quarum tu coetui praebuisti ducatum ad caeli sedem, ubi caput illarum esse voluisti, assumendo matrem gloriosissimam Mariam virginem, te quaesumus et rogamus, ut obtentu illarum nigredine careamus omnium nostrorum facinorum. Divina namque illa et ineffabilis mansio, quae virginem hodie sumpsit, sic permansuros in ea nos dextera tuae virtutis censeat, ut laetos gnaviter lumen speciei tuae ibidem sine fine instituat. Nam si discreta donorum merita ibidem praerogant loca, summa et ineffabilia hodie adeptura noscitur virgo mater per te, Domine, cui adsunt possibilia universa. Tu es itaque, Domine, qui omnia ista disponis, qui etiam caelestia ac terrestria pretio pacificasti sacri livoris et filios dignatus es facere gratuitae bonitatis.
2330	Domine Iesu Christe ... felicitatis pervenire.
	Domine Iesu Christe, qui ex voluntate patris, cooperante spiritu sancto, super Lazarum flere compassione humili voluisti, concede nobis peccatoribus tibi, in carne passo, ac proximis nostris compati in hac vita tali lacrimarum rore, cum tantae humilitatis radice ac tantae caritatis fervore, ut post luctus et suspiria mereamur ad gloriam supernae felicitatis pervenire.
2331	Domine Iesu Christe ... munere obtinere.
	Domine Iesu Christe, qui illuminatione tua fecisti fidem laudari martyris tui illius, fac nos eius intercessione apud te commendari, ut, sicut ille, a te caritatis amore inflammatus, mundum blandientem evicit, comminantem contempsit, saevientem pertulit et sic ad caelum triumphator accessit, ita, eius intercessione placatus, facias nos et despicere saeculi huius errores et vincere atque indulgentiam peccatorum nostrorum apud te ex abundanti misericordiae tuae munere obtinere.
2332a	Domine Iesu Christe ... praestare digneris.
	Domine Iesu Christe, qui, in patibulo crucis suspensus, patrem ex forma servi, quam susceperas, ut quid te derelinqueret, acclamasti et, ut persecutoribus veniam tribueret, postulasti, tuam supplices imploramus clementiam, ut, quod tunc pro suscepta carnis humilitate a patre expetere videbaris, nunc, cum eodem connexa semper divinitatis potestate consistens, praestare digneris.
2332b	Domine Iesu Christe ... pietate conserves.
	Domine Iesu Christe, qui, in patibulo crucis suspensus, patrem ex forma servi, quam susceperas, iisdem fuisti verbis deprecatus et, ut quid te derelinqueret, cum ab eo non recederes, acclamasti et, ut iniquis ac sceleratis persecutoribus veniam tribueret, postulasti atque, ut spiritum tuum in suis gloriosis, tibi tantummodo cognitis, susciperet manibus, indicasti, [unde] nos exigui famuli tui, tuorum sermonum tramitem secuti, tuam supplices imploramus clementiam, ut, quod tunc pro susceptae carnis humilitate a patre expetere videbaris, nunc cum eodem connexa semper divinitatis potestate consistens praestare digneris, ut ecclesiam tuam catholicam, quam pretioso sanguine redemisti, numquam derelinquas nobisque indignis, in eandem concurrentibus et crucis tuae sollemnia celebrantibus, ut criminum indulgentiam concedas, precamur atque, ut animas nostras in conspectu tuo semper suscipias, custodias et benedicas, humillima prece deposcimus. Et, qui latronis, tecum in cruce pendentis, confessionem iustificare dignatus es, omnium recte in te credentium fidem augeas, multiplices et solita pietate conserves.
2333	Domine Iesu Christe ... esse digneris.
	Domine Iesu Christe, qui ita verbum caro factus es, ut et conceptionem tui virginalis uterus altissimi obumbratione susciperet et ad pariendum te porta materni corporis non pateret, sollemnitatis huius obsequia propitius suscipe ac nostrum quoque cor dignatus ingredere. Tibi soli sit pervium, cui soli id esse cupimus praeparatum, ut, cum nostrarum mentium puritatem bene placitam tibi ipse perfeceris, operis tui custos et perpetuus habitator esse digneris.
2334	Domine Iesu Christe ... electorum perducas.
	Domine Iesu Christe, qui mortalitatis hominem sic assumpsisti, ut mortem nostram consumeres, sic iugum legis in tua carne suscepisti, ut a nostra carne discuteres, sic circumcisus in carne corporis es, ut nos sine vulnere carnis in corde purgares atque utrique sexui proficeret circumcisio spiritualis, cum ex virginitate genitricis ipse vir tamquam sponsus procederes, et utrumque sexum in sacramento incarnationis amplecteres, suscipiens scilicet virum, natum ex femina Unde veneranda illa senectus, in Simeone atque Anna purgata iam aetas et defaecata sinceraque etiam in viro feminaque canities, te suscipiens, non destitit collaudare. Te quaesumus, ut, sacrum circumcisionis diem sollemnitate votiva nobis prosequentibus, orationes supplicum placatus exaudias et offerentium sacrificia sanctificanda suscipias atque spiritus quiescentium, quorum est facta commemoratio nominum, in requiem electorum perducas.
2335	Domine Iesu Christe ... coetibus aggregemur.
	Domine Iesu Christe, qui olim hunc mundum incarnationis tuae visitasti praesentia quemque venturum ad iudicium cum sanctis exspectat omnis anima christiana, tu nos in die adventus tui solita miseratione iustifica, ut, qui recurrentis anni festum incarnationis tuae hodierna die in laudibus inchoamus, veniente te ad iudicium, sanctorum coetibus aggregemur.
2336	Domine Iesu Christe ... malorum oppressione.
	Domine Iesu Christe, qui olim venisti occultus, cum apparueris manifestus, assiste propitius, liberaturus populum tuum ab impiorum imperio, a criminum iugo, ut tibi plebs tua serviat in aequitate, a quo liberatur ab omni malorum oppressione.
2337	Domine Iesu Christe ... gloria perfruamur.
	Domine Iesu Christe, qui sacratissimam virginem Mariam in matrem dignissimam elegisti, cuius benedictam animam in vita et in morte tua doloris gladius pertransivit, per passionem tuam amarissimam ac eiusdem matris tuae dilectissimae dolores et angustias nos, quaesumus, in vita et in morte misericorditer tueri digneris, quatenus, a cunctis cruciatibus et doloribus post mortem liberi, resurrectionis tuae gloria perfruamur.
2338	Domine Iesu Christe ... gloriam sempiternam.
	Domine Iesu Christe, qui temetipsum in cruce holocaustum immaculatum deo patri spontaneum obtulisti, quaesumus, ut eiusdem sacrificii, quod perfecimus, oblatio veneranda indulgentiam nobis obtineat et gloriam sempiternam.
2339	Domine Iesu Christe ... esse consortes.
	Domine Iesu Christe, qui vera es vita credentium, tibi pro defunctis fidelibus sacrificium istud offerimus, obsecrantes, ut regenerationis fonte purgatos et temptationibus mundi exemptos beatorum numero digneris inserere et, quos fecisti adoptionis participes, iubeas hereditatis tuae esse consortes.
2340	Domine Iesu Christe ... commodis potiamur.
	Domine Iesu Christe, qui vivificaturus occideris, qui resurrecturus sepeliris, dum morte tua mortuos solvis, dum poenam superas crucifixus, tu ad preces nostras illa, qua totum pateris, pietate converte et nostris iam calamitatibus finem pone sicque reddita nobis indulgentia miserere, ut, qui, adversante gravium culparum impressione, nos egisse sentimus, iterum te ad nos, misericordia parcente, conversum, redeunte quietis statu, et meliorum rerum commodis potiamur.
2341	Domine Iesu Christe ... benignus infundas.
	Domine Iesu Christe, rex aeterne, qui pulchritudinem animarum nostrarum omnimodis et concupiscis et perficis, praesta nobis, quaesumus, famulis tuis virginis et martyris tuae Marinae intercessu, ut et honorem et timorem, quo te veneremur et timeamus, in nobis pius ac benignus infundas.
2342	Domine Iesu Christe ... in caelis.
	Domine Iesu Christe, sanctarum cogitationum suspirator, qui servos tuos gloriosam matrem tuam honorare docuisti, concede propitius ipsius sollemni cum sacrificio laudem debita cum devotione celebrare in terris, ut eius intercessione regnando iubilare mereamur in caelis.
2343	Domine Iesu Christe ... nigredine careamus.
	Domine Iesu Christe, sanctorum claritas meritorum et vera beatificatarum felicitas animarum, dona, ut, qui tuae resurrectionis diem laetando colimus et litando, resurgere ipsi per gratiam tuam bene sancteque vivendo et paci tuae consentiendo ante nostrum obitum mereamur. Et, sicut tibi pro tantae festivitatis officio amictus in nobis candidos exhibemus, ita, per indulgentiam tuam dealbati supra Nivern atque mundati et geminae dilectionis dulcedine satiati, universi criminis nigredine careamus.
2344	Domine Iesu Christe ... congaudemus divisione.
	Domine Iesu Christe, tuarum pastor ovium, suscipe placatus hoc nostrae devotionis sacrificium, quod tuae offerimus maiestati in eorum recordatione, de quorum sollemniter hodierna congaudemus divisione.
2345	Domine Iesu Christe ... saeculis sempiternis.
	Domine Iesu Christe, unigenitus filius dei patris, qui, Lazarum suscitaturus, elevatis sursum oculis, patri tuo gratias agis, praesta nobis famulis tuis, ut eo fremitu spiritus, quo illum suscitasti ad vitam, ea quoque modificatione digneris haec oblata tibi sanctificare libamina, ut, percipientes gratiam corporis et sanguinis tui in visceribus nostris, habeamus partem tecum in saeculis sempiternis.
2346	Domine misericordiarum et ... misericordia tua.
	Domine misericordiarum et deus summae perfectaeque bonitatis, qui peccatorum propitiationem ieiuniis, orationibus et eleemosynis quaerendam et obtinendam esse monstrasti, respicere dignare ad hanc humilitatis nostrae confessionem, ut, qui inclinamur conscientia nostra, erigamur misericordia tua.
2347	Domine quem vocantem ... monita contendamus.
	Domine, quem, vocantem, sancti apostoli Iacobus et Ioannes fide integra sunt secuti et, quem sequentes, ex caritate integra sunt electi, ut mundi piscatores fierent, qui profundi retia reliquissent, auribus percipe, quaesumus, orationem nostram et tribue, ut, dum apostolicos triumphos admiramur et colimus, si assequi eorum facta non possumus, implere saltem monita contendamus.
2348	Domine qui ambulanti ... misericordiam tuam.
	Domine, qui, ambulanti de virtute in virtutem, sancto Stephano martyri tuo aperuisti caelos ad gloriam contemplationis, quos ei aperueras ad meritum sanctitatis, ut confessionis suae fructum caperet, ostende nobis suffragio eius misericordiam tuam.
2349	Domine qui beatissimis ... exaudire suffragiis.
	Domine, qui beatissimis apostolis tuis Iacobo et Ioanni gloriam martyrii bibitione tui calicis praedixisti, ut et confirmares responsionem, quam fides pura protulerat, et conferres virtutem, quam caritas devota praesumpserat, hanc eorum passionis memoriam ecclesiam tuam sollemniter celebrantem placatus intende. Prosit, quaesumus, commemoratio sanctorum beatissimorum ad obtinendum tuae miserationis auditum. Prosit apostolorum titulos recolere, ut maiestatis tuae aures oratio nostra valeat inclinare. Prosit supplicare patrociniis, ut digneris exaudire suffragiis.
2350	Domine qui beatissimos ... viperas conculcavit.
	Domine, qui beatissimos apostolos tuos Petrum et Paulum diverso tempore vocationis beneficio elegisti et uno die passionis merito coronasti, quorum admirabilis singulorum fides ante obitum mortis illatae unum fecit claves regni caelestis accipere, alium usque ad caelum tertium penetrare, cum ille, censor credentium constitutus, intromittendi illic probos et excludendi improbos ius teneret, hic, in excessu supra nubium raptus recessus, ineffabilia divinorum secreta verborum futurus gentium doctor hauriret, quodque ne alii sanctorum passi, hoc isti meruere passuri. Hos nobis, Domine, facito esse patronos, quos fecisti esse magistros, ut eorum obtentu veniae nostrae suffragia sentiamus, quorum in ducatu gratiae tuae instituta suscepimus. In Petro peccatorum nostrorum numerum amplificatae modus remissionis excedat; in Paulo viam obstructam perfidiae Christi sermo lumine nobis veritatis aperiat. In illo nobis praestetur nutantis saeculi fluctibus non dimergi; in isto antiqui serpentis morsibus non noceri, ut nec naufragio malorum perditi nec veneno vipereo sauciati, eodem auctore salvemur, quo ille undas superavit, hic viperas conculcavit.
2351	Domine qui per ... stabilis perseveret.
	Domine, qui per os David locutus es: “Vovete et reddite domino deo vestro”, te suppliciter exoramus, ut famulum tuum illum vigilanter custodias, tuearis ac defendas et oblationem, quam pro ipso tibi offerimus, interveniente sancto archangelo Michaele, clementer ac benigniter suscipias; accende igitur, Domine, cor famuli tui illius igne timoris tui vel desiderii tui, ut et sanctorum patriarcharum exempli imitator efficiatur et in boni operis testimonio firmus ac stabilis perseveret.
2352	Domine qui sanctis ... ad requiem.
	Domine, qui sanctis pro merito servitutis in caelo praemia excelsa donasti, ut laetarentur sancto conspectu tuo, perpetuae lucis gratia pateretur, praesta, ut sacerdotes tui, te credentes, simili dignatione respecti, per baptismum sacrationis corporum peccata deponant, ut ad laetitiam aeternam perveniant. Commemorationem facientes defunctorum fidelium, illis praeteritorum noxa laxentur et aeternae vitae praemia condonentur, ut et vivis haec oblatio prosit ad salutem et defunctis ad requiem.
2353	Domine qui virtute ... semper aequalis.
	Domine, qui virtute spiritus tui et eorum, qui veteris confusionis superbiae turrem aedificabant, proturbasti auditum et surgentis ecclesiae tuae novitatem, diffusis linguis, multiplicasti insignibus, ut, quod fuerat in condemnatione, esset in munere atque inde construere; fidem, unde destruxeras vanitatem, da super hunc familiae tuae supplicem coetum spiritus sancti tui, quem es pollicitus et largitus, adventum, qui in nobis et contrariae molitionis studia adversa dispergat et meritum sanctificationis accumulet. Sitque munerator in promissione, qui est promissus in munere, quo ecclesia tua, eius igne succensa, in ipso veram teneat fidem, a quo omnem percipit veritatem. Ipseque offerentium nomina caelestibus scribat in paginis ac requiem dignetur praestare defunctis, qui in unitate deitatis tecum permanet semper aequalis.
2354	Domine rex gloriae ... spiritus consoleris.
	Domine, rex gloriae, qui, patefactis prophetarum oraculis, tamquam elevatis aeternalibus portis, paternam repetis sedem, quia, dum tua deitas eo, quo numquam discessit, regreditur, humano generi caelorum aditus aperitur, dona, ut illic extendatur nostra intentio, quo praecessit nostra redemptio, nec inhaereamus captiva delectatione terrenis, qui te regnantem confitemur in caelis, quo, prece humilitatis nostrae placatus, ex illa maiestatis, qua resides, sede et viventes repleas donis et pausantium spiritus consoleris.
2355	Domine salvator noster ... evasisse tormentis.
	Domine, salvator noster, qui de fluctibus huius saeculi bonorum animas suscipere dignatus es, animam quoque famuli tui illius assumere dignare et eum ad portum aeternae quietis admitte, ut caelestibus fruatur bonis et gaudeat se malis evasisse tormentis.
2356	Domine sancte pater ... repausationis solatium.
	Domine, sancte pater, aeterne omnipotens deus, in cuius nomine beatae Eulaliae virginis ac martyris tuae sollemnia celebramus, quae, dum ad confessionem duceretur, non illam mortis timor intravit nec vultus pallor obsedit, non ira terruit comminantis, non dira vox, non cruenta manus, non etiam torvus adspectus a proposita passione submovit, tu nobis, martyris huius gaudentibus de triumpho, et ad te convertendi aditum praebe et sanctae conversationis tribuito dignitatem, concedens per hanc oblationem, a nobis tibi oblatam, et offerentibus perennis gratiae lucrum et defunctis aeternae repausationis solatium.
2357	Domine sancte pater ... benignus intende.
	Domine, sancte pater, omnipotens aeterne deus, creator humanae substantiae, qui Verbum tuum in virginis uterum venire voluisti, supplicantium tibi preces benignus intende.
2358	Domine sancte pater ... semper exhibeant.
	Domine, sancte pater, omnipotens aeterne deus, cuius spiritu totum corpus ecclesiae multiplicatur et regitur, conserva in nova familiae tuae progenie sanctificationis gratiam, quam dedisti, ut, corpore et mente renovati, puram tibi animam cum securitate pacis et purum pectus semper exhibeant.
2359	Domine sancte pater ... forma pastoris.
	Domine, sancte pater, omnipotens aeterne deus, da nobis gratia tuae dignationis augeri et mortalitatis conscientia trepidos pietatis eruditione confirma, ut, te omnia in omnibus operante, profectus gregis tui sit forma pastoris.
2360	Domine sancte pater ... ultione gaudere.
	Domine, sancte pater, omnipotens aeterne deus, da servis tuis hunc caritatis affectum, ut bona pro malis reddere tuo incitentur exemplo et de inimicis suis correctione magis cupiant quam ultione gaudere.
2361	Domine sancte pater ... exsultatione benedicant.
	Domine, sancte pater, omnipotens aeterne deus, de abundantia misericordiarum tuarum famulos et famulas tuas praesta locupletes, praesta securos, ut, confirmati benedictionibus tuis, abundent in omni gratiarum actione teque perpetua exsultatione benedicant.
2362	Domine sancte pater ... claritate conspicui.
	Domine, sancte pater, omnipotens aeterne deus, gratiae tuae in nobis dona prosequere et, quod possibilitas non habet fragilitatis humanae, tuo spiritu miseratus impende, ut, sacris altaribus servientes et fidei integritate fundati et mentis sint claritate conspicui.
2363	Domine sancte pater ... et regendos.
	Domine, sancte pater, omnipotens aeterne deus, oblationes familiae tuae propitiatus intende, ut haec piae devotionis obsequia et rectores sanctificent et regendos.
2364	Domine sancte pater ... propria redeamus.
	Domine, sancte pater, omnipotens aeterne deus, propitiare digneris supplicationibus nostris et mitte angelum tuum sanctum nobiscum, qui nos a cunctis adversitatibus protegat et in servitio sancti nominis tui ubique custodiat, ut nullus nos iri via nostra decipiat inimicus sed ut mereamur ab omni hoste triumphum et tuae miserationis semper subsidium, quatenus, tua iussa complentes, sospites ad propria redeamus.
2365	Domine sancte pater ... prosperitate restituas.
	Domine, sancte pater, omnipotens aeterne deus, qui, benedictionis tuae gratiam aegris infundendo corporibus, facturam tuam multiplici pietate custodis, ad invocationem nominis tui benignus assiste et hunc famulum tuum illum, liberatum ab aegritudine et sanitate donatum, dextera tua erigas, virtute confirmes, potestate tuearis et ecclesiae tuae sanctisque altaribus tuis cum omni desiderata prosperitate restituas.
2366a	Domine sancte pater omnipotens aeterne deus qui contulisti ... da ut coniunctio labiorum ... celeriter consequamur.
	Domine, sancte pater, omnipotens aeterne deus, qui contulisti fidelibus tuis remedium vitae post mortem, ut somnum esse sentiant, quibus paradisus patet, da, ut coniunctio labiorum copulum efficiatur animarum et ministerium osculi perpetuae proficiat caritati, et praesta, ut, quod in nomine electi tui Sigismundi pro infirmantibus petimus, celeriter consequamur.
2366b	Domine sancte pater omnipotens aeterne deus qui contulisti ... praesta quaesumus ut quod fideliter ... celeriter consequamur.
	Domine, sancte pater, omnipotens aeterne deus, qui contulisti fidelibus tuis remedium vitae post mortem, ut somnum esse sentiant, quibus paradisus patet, praesta, quaesumus, ut, quod fideliter in nomine electi tui Sigismundi pro infirmantibus petimus, celeriter consequamur.
2366c	Domine sancte pater ... qui contulisti fidelibus tuis remedium vitae post mortem et sanitatis donum post languoris taedium da ut haec celebrata mysteria famulo tuo illi proficiant et ministerium hoc omnibus cum gratiarum <actione
	Domine, sancte pater, <omnipotens aeterne deus>, qui contulisti fidelibus tuis remedium vitae post mortem et sanitatis donum post languoris taedium, da, ut haec celebrata mysteria famulo tuo illi proficiant et ministerium hoc omnibus cum gratiarum <actione> perpetua proficiat caritate, et praesta, ut, quod fideliter in no<mine electi tui Sigismundi pro infirmantibus petimus, celeriter consequamur>.
2367	Domine sancte pater ... deus qui dignaris infima et abiecta non despicis attolle quos suscitas et guberna quos erigis da mihi famulo tuo sufficientiam commissi moderaminis da ecclesiae tuae pacem cui me praeesse voluisti ut in uno eodemque spiritu sit tibi grata devotio et plebis
	Domine, sancte pater, omnipotens <aeterne> deus, qui dignaris infima et abiecta non despicis, attolle, quos suscitas, et guberna, quos erigis; da mihi, famulo tuo, sufficientiam commissi moderaminis; da ecclesiae tuae pacem, cui me praeesse voluisti, ut in uno eodemque spiritu sit tibi grata devotio et plebis et praesulis.
2368	Domine sancte pater ... spiritus sanctus.
	Domine, sancte pater, omnipotens aeterne deus, qui es ductor sanctorum et dirigis itinera iustorum, dirige angelum pacis nobiscum, qui nos ad loca destinata perducat. Sit nobis comitatus iucundus, ut nullus viae nostrae subripiat inimicus. Procul a nobis sit malignorum accessus et comes nobis dignetur esse spiritus sanctus.
2369	Domine sancte pater ... perfecta reparetur.
	Domine, sancte pater, omnipotens aeterne deus, qui fragilitatem condicionis nostrae, infusa virtutis tuae dignatione, confirmas, ut salutaribus remediis pietatis tuae corpora nostra et membra vegetentur, super hunc famulum tuum propitiatus intende, ut, omni necessitate corporea infirmitatis exclusa, gratia in eo pristinae sanitatis perfecta reparetur.
2370	Domine sancte pater ... ipse perfector.
	Domine, sancte pater, omnipotens aeterne deus, qui ine, nulla praeditum fiducia meritorum, ineffabilis gratiae munere familiae tuae praesidere tribuisti, attolle, quos suscitas, et guberna, quos erigis, ut, quorum auctor tu bonorum, sis ipse perfector.
2371	Domine sancte pater ... agere mereatur.
	Domine, sancte pater, omnipotens aeterne deus, respice super hunc famulum tuum, qui, ab infesta saeculi tempestate demersus, flebili lamentatione suos accusat excessus, ut fletus ac gemitus eius pie suscipias eumque de tenebris ad lumen revoces et medelam confitenti, salutem paenitenti et vulnerato auxilium sanitatis indulgeas. Nec ultra inimicus in eius habeat animam potestatem. Cuiusque confessionem libenter admittens, ecclesiae tuae purificatum restitue ac tuo altario repraesenta, ut, ad sacramentum reconciliationis admissum, una nobiscum nomini tuo gratias agere mereatur.
2372	Domine sancte pater ... amovere digneris.
	Domine, sancte pater, omnipotens aeterne deus, supplices te deprecamur, ut misericordiam tuam iugiter nobis concedas, sufficienter messium copias et fructuum omnium largiter tribuas, vineae quoque substantiam abundantem, arborum fetus, proventus omnium rerum atque ab his omnibus pestiferum sidus tempestatis, universas procellas et grandines amovere digneris.
2373	Domine sancte pater ... sit salus.
	Domine, sancte pater, omnipotens aeterne deus, te fideliter deprecamur, ut accipienti fratri nostro illi sacrosanctam hanc eucharistiam corporis et sanguinis domini nostri Iesu Christi filii tui tam corporis quam animae sit salus.
2374	Domine sancte pater ... interesse frequentationi.
	Domine, sancte pater, qui nobis ore filii tui, quidquid, orantes, te petituri simus, exaudiri nos promisisti, exaudi, quaesumus, preces nostras et fac nos dignos tuae interesse frequentationi.
2375	Domini ac dei ... sit eucharistia.
	Domini ac dei nostri sempiterni gloriam deprecemur, orantes, uti hoc sacrificium sua benedictione benedicat et sancti spiritus sui rore perfundat, ut accipientibus universis legitima sit eucharistia.
2376	Dominum deum nostrum ... profectum
	Dominum deum nostrum, fratres carissimi, in hac nostri humiliatione ieiunii supplices deprecemur, ut observantia, quam corporaliter exhibemus, mentibus etiam valeamus exercere sinceris et castigatio nostrorum corporum <ad> profectum militet animarum.
2377	Domum tuam domine ... mereantur accipere.
	Domum tuam, domine, quaesumus, propitiatus illustra et subditorum tibi fidelium corda purifica, ut, bene placitis inhaerendo, cuncta, quae bona sunt, mereantur accipere.
2378a	Domum tuam quaesumus ... habitatione praeclara.
	Domum tuam, quaesumus, domine, clementer ingredere et in tuorum tibi corda fidelium perpetuam constitue mansionem, ut, cuius aedificatione subsistit, huius fiat habitatione praeclara.
2378b	Domum tuam quaesumus ... construe mansionem.
	Domum tuam, quaesumus, domine, clementer ingredere et in tuorum cordibus fidelium perpetuam tibi construe mansionem.
2379	Domum tuam quaesumus ... possidere digneris.
	Domum tuam, quaesumus, domine, continuis auge subsidiis eamque de lapidibus vivis id est fidelibus tuis ita semper aedifica, ut eam in perpetuum possidere digneris.
2380	Dona domine virtutem ... acceptabile praeparemus.
	Dona, domine, virtutem populo tuo et effice nos templum spiritus sancti, ut tibi de corde puro holocaustum acceptabile praeparemus.
2381	Dona nobis domine ... nec referre.
	Dona nobis, domine deus noster, in custodienda pace tuum donum tuumque depositum custodire et sic in omnibus sequi, quam ipse iubeas et tribuis, caritatem, ut in aliquibus culpas noverimus odisse, non animas, finem optare criminis, non salutis; sic cunctis concordia sit amore, ut discordiam nec inferre ulli liceat nec referre.
2382	Dona nobis omnipotens ... donaria caritatis.
	Dona nobis, omnipotens deus, martyris tui illius celebrantibus festum, sincerae pacis et caritatis affectum, ut, qui in honorem eius tibi sacrificium deferimus laudis, nobis a te impetremus donaria caritatis.
2383	Dona nobis omnipotens ... paradiso reformet.
	Dona nobis, omnipotens pater, per mysterium crucis unigeniti tui, ut venenum serpentis antiqui, quod fideles nititur propinare, per illud medicamentum, quod Christi manavit latere, possit a fidelium pectoribus expurgari, quosque transgressio praecepti de paradiso expulit, confessio nominis Christi in paradiso reformet.
2384	Dona quaesumus omnipotens ... possidere caeleste.
	Dona, quaesumus, omnipotens deus, cunctae familiae tuae hanc voluntatem Christo filio tuo domino nostro venienti in operibus iustis apte occurrere, ut, eius dexterae sociati, regnum mereantur possidere caeleste.
2385	Donis caelestibus cum ... tibi referimus.
	Donis caelestibus cum sanctorum tuorum recordatione satiati, gratias tibi referimus.
2386a	Donis caelestibus da quaesumus domine libera mente servire ut munera quae deferimus et medelam ... et gloriam.
	Donis caelestibus da, quaesumus, domine, libera mente servire, ut munera, quae deferimus, et medelam nobis operentur et gloriam.
2386b	Donis caelestibus da quaesumus domine libera mente servire ut munera quae deferimus interveniente ... et gloriam.
	Donis caelestibus da, quaesumus, domine, libera mente servire, ut munera, quae deferimus, interveniente evangelista tuo Luca, et medelam nobis operentur et gloriam.
2387	Dono pacis ac ... ubertate multiplica.
	Dono pacis ac tuae dilectionis rogamus, deus, ut ieiunantium corda praemunias et huius oblationis nostrae libamina benedicas. Gratuita quoque nos sanctificatione perlustrans, et votivae abstinentiae hanc suscipe hostiam et corda nostra tuae semper caritatis ubertate multiplica.
2388	Donorum omnium deus ... excellentia gloriatur.
	Donorum omnium, deus, auctor et largitor, qui sanctorum virtute multiplici ecclesiae tuae sacrum corpus exornas, da eam in ipsorum defendi prece membrorum, de quorum excellentia gloriatur.
2389	Dulcedinem tui amoris ... periculis defendi.
	Dulcedinem tui amoris immitte, quaesumus, domine, mentibus nostris, ut, perceptione corporis et sanguinis tui laetificati, beati Taurini meritis mereamur semper ab omnibus periculis defendi.
2390	Ecce antistes verissimus ... et futuris.
	Ecce antistes verissimus et martyr tuus Babilas, incomparabili illo tuae, Christe, dilectionis affectu permotus, gliscit animo, exsultat voto ac laudationis iucundatur tripudio, quod, pro tuo nomine boiarum ponderibus illigatus pedibusque revinctus in rota, quasi luiturus, quod professus fuerat, iubetur urbe monstrari, quo potius plus inde sumeret gaudii, quod pro tuo nomine dignus esset contumeliam pati. Ob hoc in tanti martyris gloriosae celebritatis sollemnitate offerentes tibi, Christe, sacrificium humiliati cordis, et vivorum vota offerimus et sepultis requiem flagitamus, rogantes, ut, qui martyrem tuum liberum effecisti ab illatis suppliciis, et viventes et defunctos a tormentis eruas et praesentibus et futuris.
2391	Ecce domine de ... mereantur renasci.
	Ecce, domine, de te Caiphae pontificis vaticinium, ignarum sibi ipsi, in populis est prolatum, ut unus occumberet pro gente, ne cuncti pariter interirent, et tu singulare granum in terra morereris, ut seges plurima nasceretur; supplices te ipsum, qui pro mundi salute es hostia caesus, deprecamur, ut nobis de te ipso veniam dones, qui te ipsum obtulisti pro nobis, et hos, quos recitatio commemoravit ante sanctum altare, qui in pace iam tua ab his sunt vinculis corporeis translati, quaesumus, domine, ut te habeant ereptorem, quem per baptismum meruerunt redemptorem habere, sed, et si qui inter hos adstantes ad baptismi salutaris sacramenta praeparentur, quaesumus, domine deus noster, ut imbutos in fide, instructos in sensu, confirmatos in gratia, ad percipiendam plenitudinem gratiae tuae spiritus tui munere iubeas praeparari, ut sancti lavacri sonte desiderato mereantur renasci.
2392	Ecce domine dilecti ... expiationem sumpturis.
	Ecce, domine, dilecti tui Iuliani vel spiritalis coniugis suae Basilissae miraculorum insignia praedicantes, has hostias divinitati tuae benedicendas offerimus, qui, se tibi exhibentes in sacrificium verum, alios tibi exemplo suo in holocaustum veri sacrificii litaverunt, cum et per Iulianum, multorum monachorum millium patrem, et per Basilissam, sanctarum virginum choros tuentem, copiosam utriusque sexus, monachorum scilicet ac virginum, in caelestem gloriam susceperis congregationem. Ex hoc igitur immensam bonitatis tuae potentiam obsecramus, ut, qui per utrosque electa animarum munera suscepisti, per nos humiles tuos hanc hostiam, pro nostris peccatis oblatam, dignanter suscipias, impendens et benedictionem oblatis et expiationem sumpturis.
2393	Ecce domine festo ... in caritate.
	Ecce, domine, festo cathedrae confessoris tui Martini sanctissimi uberius gratulamur, dum hunc diem, quo ipse in sacerdotium adscitus est, prona devotione excolimus. Is quippe, dum catervas aufugeret hominum, praesul effectus est populorum, ut, qui iam motus carnis compresserat in deserto, evectu gratiae utilius in populo perficeretur salvando, quo pacis, cuius in deserto avidus fuerat adsecutor, post largius exsisteret praerogator. Ex hoc igitur tuam, pie deus, exoramus clementiam, ut, quidquid doctrinae eius promanavit ex lumine, te opitulante, nos impleamus in caritate.
2394	Ecce fratres carissimi ... omnium creatori.
	Ecce, fratres carissimi, sollemnitas nobis hodie claruit summi nuntii, quam olim quondam nostrorum meruit obtinere fides maiorum. Quia, cum sit ministerio eminens angelorum, non abhorrent animas aestuare nostrorum, ut fruantur potius illius intercessione suorumque et sociorum. Nam in condicione omnium creaturarum individua Trinitas, quae est una deitas, sempiterna maiestas, cum conderet angelorum agmina, quae primi operis lux est appellata, et eminentior angelus, cum praeferretur ceteris, superba turgidus voluntate, ruit profundior immanissima omni crudelitate. Cuius adversio, sicut auctori culpae applicavit interitum, ita permansuris in servitute donavit regnum beatitudinis indefessum, tantoque solidior aucta est fides manentium, quanto crudelior est facta damnatio delinquentium. Amissa claritate interiit, qui humilitatem servare nequivit, et sublimis in gloria pollet, qui in ministerio perfectior manet. Apostata etenim angelus, ab aeterna beatitudine proiectus, factus est humano generi insidians inimicus, ne locum, quem perdiderat gloria, humana potiretur fragilis glutinatio plasmae. Prius enim decepit, quam sexu fragilem vidit, et per illam letale virus rudi et incauto obtulit viro. Cuius protinus parens culpa iustae damnationis intulit poenam, a quo disseminata ex illis progenies obnixe maneret districta. Sed vicit pietas creatoris et callidi anguis suadelam decipulam et trangressoris admissa piacula. Redemit enim misericorditer, quem dudum culpa damnaverat condecenter; libero arbitrio heredem contulit caelo, quem olim fore beatum plasmaverat in paradiso. Nam, quia primus homo conditus, angelorum fuerat societate locandus, si non fuisset inoboediens factus. Post vero suadenti obtemperat et creatoris iussa relinquit, etiam consortium angelorum amisit. Quod quidem iam manet restauratum per dei patris omnipotentis verbum unicum, caro factum, in cuius incarnatione angeli gloriam cecinerunt et omnes bonae voluntatis consimili laude secum sociandos denuntiaverunt. Horum etenim militia angelorum Michael eminentior manet in officio actionum, ut, ordinatim dispositi, maneant in obsequio conditoris et vota deferam populi communi omnium creatori.
2395	Ecce Iesu his ... concedatur aeterna.
	Ecce, Iesu, his diebus salutaris abstinentiae mediatis, deferimus tibi hoc sacrificium nostrae redemptionis. Ob hoc te poscimus et rogamus, ut per huius sacrificii oblationem gratissimam et vivis donorum tribuantur spiritalium incrementa et defunctis fidelibus requies concedatur aeterna.
2396	Ecce Iesu mediator ... crimine libertatem.
	Ecce, Iesu, mediator dei et hominum, Christe, redemptor ac domine, hominem illum, quem cum patre et spiritu sancto unus deus sexto die ad tuam condidisti imaginem, sexta demum aetate per assumptam visitans carnem, reformationem mentis eidem tribuisti per evangelii veritatem. Proinde in hoc die tam pro condicione quam pro redemptione humani generis hanc tibi offerimus victimam sacrificii singularis, in quo ipse pro nostra salute ligno confixus es crucis, aceto potaris, lancea latere perfoderis, inferna moriens penetrans, resurgendo spolians. Pro quibus mysteriis ac miraculis hunc diem apud tuam clementiam sacrificiis commendantes, petimus a te, redemptore pio et domino, ut hodierni mysterii recordatus, spolians nos vetere homine cum actibus suis, induas illo, qui secundum deum creatus est in iustitia et sanctitate veritatis. Decidant in nobis carnalium libitus voluptatum et intereant exstinctae passiones variae vitiorum. Qui nobis te dedisti esse in munere, non nos sinas nobis ipsis esse ulterius in dolore, ut, in novitate vitae ambulantes, sicut tuo redempti sumus ex sanguine, ita, cruci tuae affixi perenniter, et perditionis ab inceps respuamus errorem et concessae dignitatis retineamus absque crimine libertatem.
2397	Ecclesia ecce tua ... obtinuisse solatia.
	Ecclesia ecce tua, deus omnipotens, quae te, ac si sparsa in toto mundi alveo, uno tamen agglomerata complexionis globo, pro omnibus, tam qui adsunt quam etiam qui corporis praesentia desunt, voce imprecatur unica et sacrificiorum oblata offert devotione cernua, ut et pro his, qui in hac casura degunt vitam, intercedente tanti antistitis prece, ne ullatenus dilabantur, impetretur auxilia et pro animabus pausantium, ut tartareo exuantur ab igne, gratuletur se aeterna obtinuisse solatia.
2398a	Ecclesia tua domine ... largitate donorum.
	Ecclesia tua, domine, caelesti gratia repleatur et crescat atque, ab omnibus vitiis expiata, percipiat sempiternae redemptionis augmentum, ut, quod in membris suis copiosa temporum prorogatione veneratur, spiritalium capiat largitate donorum.
2398b	Ecclesia tua domine ... redemptionis augmentum.
	Ecclesia tua, domine, caelesti gratia repleatur atque, ab omnibus vitiis expiata, percipiat sempiternae redemptionis augmentum.
2399	Ecclesia tua quaesumus ... quam precatur.
	Ecclesia tua, quaesumus, domine, quae pia celebritate ad beati Pantaleonis martyris tui concurrit sollemnia, a cunctis liberari adversis mereatur et ad eiusdem perveniat martyris societatem, quam precatur.
2400	Ecclesiae tuae domine ... transire mysterium.
	Ecclesiae tuae, domine, munera placatus assume, quae et misericors offerenda tribuisti et in nostrae salutis potenter efficis transire mysterium.
2401	Ecclesiae tuae domine ... virtute salutaria.
	Ecclesiae tuae, domine, munera sanctifica et concede, ut per eum, cuius veneramur sollemnia, nobis fiant tua virtute salutaria.
2402a	Ecclesiae tuae domine munera sanctifica et concede ut per haec veneranda ... refici mereamur.
	Ecclesiae tuae, domine, munera sanctifica et concede, ut per haec veneranda mysteria pane caelesti refici mereamur.
2402b	Ecclesiae tuae domine munera sanctifica et concede ut pane caelesti ... refici mereamur.
	Ecclesiae tuae, domine, munera sanctifica et concede, ut pane caelesti refici mereamur.
2402c	Ecclesiae tuae domine munera propitiatus ... refici mereamur.
	Ecclesiae tuae, domine, munera propitiatus sanctifica et concede, ut per haec veneranda commercia, intercedente beato Mauro confessore tuo atque abbate, pane caelesti refici mereamur.
2403	Ecclesiae tuae domine ... transfiguratus apparuit.
	Ecclesiae tuae, domine, quaesumus, tua benedictione dona sanctifica, nosque per haec a culpis expediens, illi configurari tribue, qui olim suis discipulis, gloriose transfiguratus, apparuit.
2404a	Ecclesiae tuae domine voces ... tibi serviat libertate.
	Ecclesiae tuae, domine, voces placatus admitte, ut, destructis adversantibus universis, secura tibi serviat libertate.
2404b	Ecclesiae tuae domine preces ... tibi serviat libertate.
	Ecclesiae tuae, domine, preces placatus admitte, ut, destitutis adversitatibus universis, secura tibi serviat libertate.
2405	Ecclesiae tuae quaesumus ... et sumitur.
	Ecclesiae tuae, quaesumus, domine, dona propitius intuere, quibus non iam aurum, thus et myrrha profertur, sed, (quod) iisdem muneribus declaratur, immolatur et sumitur.
2406	Ecclesiae tuae quaesumus ... dona concede.
	Ecclesiae tuae, quaesumus, domine, oblationem propitius intuere et, intercedente gloriosa virgine dei genitrice Maria, unitatis ac pacis semper eidem dona concede.
2407a	Ecclesiae tuae quaesumus domine preces et hostias apostolica ... ad veniam.
	Ecclesiae tuae, quaesumus, domine, preces et hostias apostolica commendet oratio, ut, quod pro illorum gloria celebramus, nobis prosit ad veniam.
2407b	Ecclesiae tuae quaesumus domine preces et hostias beati Petri ... ad veniam.
	Ecclesiae tuae, quaesumus, domine, preces et hostias beati Petri apostoli commendet oratio, ut, quod pro illius gloria celebramus, nobis prosit ad veniam.
2408	Ecclesiae tuae quaesumus ... tuam sentiamus.
	Ecclesiae tuae, quaesumus, domine, preces et hostias beatae Brigidae commendet oratio, ut, qui pro illius meritis maiestatem tuam indefessam atque exorabilem humiliter imploramus, eius precibus adiuti, misericordiam tuam sentiamus.
2409	Ecclesiae tuae quaesumus ... dona consequatur.
	Ecclesiae tuae, quaesumus, domine, preces exaudi, ut, quae de beati pontificis ac martyris tui Aelfegi sacra festivitate laetatur, et patrociniis ipsius muniatur et gratiae tuae dona consequatur.
2410	Ecclesiae tuae quaesumus ... mystice designantur.
	Ecclesiae tuae, quaesumus, domine, unitatis et pacis propitius dona concede, quae sub oblatis muneribus mystice designantur.
2411	Ecclesiae tuae quaesumus ... facias interire.
	Ecclesiae tuae, quaesumus, omnipotens deus, placatus intende conventum et misericordia tua nos, potius quam ira, praeveniat, quia, si iniquitates nostras observare volueris, nulla poterit creatura subsistere, sed admirabili pietate, qua nos fecisti, ignosce peccantibus, ut opera manuum tuarum non facias interire.
2412	Ecclesiam praesentis familiae ... patriae portionem.
	Ecclesiam praesentis familiae, quaesumus, omnipotens domine, ab hostium incursione potenter defende et per sacram sanctae illius, quam recolimus, nativitatem largire nobis supernae patriae portionem.
2413	Ecclesiam tuam deus ... mereatur aeternis.
	Ecclesiam tuam, deus, beati Antonii confessoris tui sollemnitas votiva laetificet, ut spiritalibus semper nutriatur auxiliis et gaudiis perfrui mereatur aeternis.
2414	Ecclesiam tuam domine ... aspera fortitudo.
	Ecclesiam tuam, domine, quaesumus, perpetuo guberna moderamine, ut adsit ei et in securitate cautela et inter aspera fortitudo.
2415	Ecclesiam tuam domine ... gubernante pastores.
	Ecclesiam tuam, domine, benignus illumina, ut et gregis tui proficiat ubique successus et grati fiant nomini tuo, te gubernante, pastores.
2416a	Ecclesiam tuam domine ... retributione promisit.
	Ecclesiam tuam, domine, benignus illustra, ut, apostolicis beati Ioannis evangelistae illuminata doctrinis, ad dona perveniat, quae de tua fidelibus retributione promisit.
2416b	Ecclesiam tuam quaesumus ... retributione promisit.
	Ecclesiam tuam, quaesumus, domine, benignus illustra, ut, apostoli tui Ioannis evangelistae illuminata doctrinis, ad dona perveniat, quae de tua sempiterna fidelibus retributione promisit.
2416c	Ecclesiam tuam domine ... perveniat sempiterna.
	Ecclesiam tuam, domine, benignus illustra, ut, beati Ioannis evangelistae illuminata doctrinis, ad dona perveniat sempiterna.
2417	Ecclesiam tuam domine ... exhibe gaudiis.
	Ecclesiam tuam, domine, in omni prosperitate custodi et, beati Barnabae apostoli suffultam patrociniis, supernis dignam exhibe gaudiis.
2418	Ecclesiam tuam domine ... munere gubernetur.
	Ecclesiam tuam, domine, miseratio continuata mundet et muniat et, quia sine te non potest salva consistere, tuo semper munere gubernetur.
2419a	Ecclesiam tuam domine ... percipiat claritatem.
	Ecclesiam tuam, domine, perpeti miseratione prosequere, ut, inter saeculi turbines constituta, et praesenti iucunditate respiret et aeternae beatitudinis percipiat claritatem.
2419b	Ecclesiam tuam domine ... dona percipiat.
	Ecclesiam tuam, domine, perpetua miseratione prosequere, ut, inter saeculi turbidines constituta, et praesenti iucunditate respiret et aeternae beatitudinis dona percipiat.
2419c	Famulum tuum illum ... dona percipiat.
	Famulum tuum illum, domine, quaesumus, perpetua miseratione prosequere, ut, inter saeculi turbines constitutus, et praesenti iucunditate respiret et aeternae beatitudinis dona percipiat.
2420	Ecclesiam tuam quaesumus ... passione illustrat.
	Ecclesiam tuam, quaesumus, domine, beati Barnabae apostoli tui commendet oratio et pro ea interventor exsistat, quam doctrina et passione illustrat.
2421a	Ecclesiam tuam quaesumus ... et doctrinis.
	Ecclesiam tuam, quaesumus, domine, gratia caelestis amplificet, quam beati Francisci illuminare voluisti meritis et doctrinis.
2421b	Ecclesiae tuae quaesumus ... et exemplis.
	Ecclesiae tuae, quaesumus, domine, dona gratia caelestis amplificet, quam beatae Osithae virginis et martyris tuae miraculis decorasti et gloriosis fecisti coruscare meritis et exemplis.
2421c	Ecclesiam tuam quaesumus ... patrocinio reviviscamur.
	Ecclesiam tuam, quaesumus, domine, gratia caelestis amplificet, quam beati Norberti confessoris tui atque pontificis gloriosis praedicationibus et vitae exemplis illuminasti; da nobis, contabescentibus, ut eius patrocinio reviviscamur.
2422	Ecclesiam tuam quaesumus ... tempore famuletur.
	Ecclesiam tuam, quaesumus, domine, proprio sanguine filii tui redemptam, iugibus defende praesidiis, ut insecutione paganorum depulsa, tibi omni tempore famuletur.
2423	Ecclesiam tuam quaesumus ... omnibus adiuvari.
	Ecclesiam tuam, quaesumus, domine, tua miseratione custodi et, quam beatissimus confessor et sacerdos tuus Hieronymus a cunctis, te praesidiante, purgavit haeresibus, ipsius orationibus non desinas momentis omnibus adiuvari.
2424	Effice nos domine ... pervenire caelestia.
	Effice nos, domine, filios pacis, quos fecisti esse filios tuae adoptionis, ut, pacifici viventes in terra, ad promissa mereamur pervenire caelestia.
2425	Efficiatur haec hostia ... mentibus immoletur.
	Efficiatur haec hostia, domine, quaesumus, sollemnibus grata ieiuniis et, ut tibi fiat acceptior, purificatis mentibus immoletur.
2426	Effunde domine benedictionem ... circumdatione liberari.
	Effunde, domine, benedictionem tuam super populum tuum, ut, filii tui resurrectione muniti, mereamur ab adversantium vitiorum circumdatione liberari.
2427	Effunde quaesumus domine ... exposcit.
	Effunde, quaesumus, domine, spiritum gratiae super familiam tuam et ab ea, quidquid diabolicae fraudis inrepit, quidquid terrenae labis incurrit, expelle, ut, interius exteriusque mundata, et puram tibi devotionem semper exhibeat et facilius possit assequi, quod rationabiliter et convenienter , exposcit.
2428	Effunde quaesumus domine ... caritate custodiat.
	Effunde, quaesumus, domine, super hanc singularem nostrae salutis medicinam tuae benedictionis abundantiam, quae illius participes ab omnibus peccatis absolvat et in ea, qua tibi venerandus martyr Aelfegus placuit, caritate custodiat.
2429	Eius tibi precibus ... festivitate immolanda.
	Eius tibi precibus, domine, quaesumus, grata reddatur oblatio, pro cuius est festivitate immolanda.
2430	Eminentissimum nobis omnipotens ... de propriis.
	Eminentissimum nobis, omnipotens deus, hunc diem venerabilem ac plena admiratione dignissimum sacerdotis tui Martini transitus consecravit, qui, exutus corpore, caelum, quod quaesivit ex opere, invenit ex munere; qui saeculum calcavit in vitiis, regnum tuum intravit in gaudiis, reddens tibi animam, qualem dederas, qualem feceras ex lavacro, qualem tibi placere dixeras ex praecepto; qui in pubescentis aetatis exordia iam tibi in adulescentia senescebat, prius se perfectione quam professione monstrando, ut ante rem sanctitatis impleret, quam speciem religionis assumeret; qui, in frigore pauperem vestiendo, amore tuo caluit, et tibi vincebat miles alienus et tibi militabat victor iam tuus, sic praeveniente gratia conscientiam, ut, dum non videretur elotus, probaretur assumptus. Dignus valde, cui te pro misericordia revelares, ut et tantum munus virtute cognosceret et virtus remunerata plus cresceret, cui, cooperante gratia tua, hoc fuerit instituere, quod curare, et per abundantem, quam per te faciebat, mirabilium suorum diversitatem magis familiare habuerit exemplis docere quam litteris. Qui, in se crucis tuae rigore suscepto, ita tibi verus cultor adsisteret, ut laudis tuae causas vitae meritis ampliaret; idoneus quippe, cui te per sacerdotii dignitatem ecclesiae spem, populorum salutem, singularem quoque virtutem committeres familiarem. Qui per arduum continentiae fastigium et amicum tuae gratiae blandimentum, futurorum praescius, noveras in eo mentem humilem, rem potentem. Hic igitur, deus, tuum prece populum salvet, qui tibi placuit opere, iustificetque peccatores in vita, qui iustificatus pervenit ad gloriam; Impetret, ut a te non puniamur de nostris, qui abs te meruit coronari de propriis.
2431	Emitte Christe filius ... tuae virtutis.
	Emitte, Christe filius dei, de sanctis caelis tuis copiam tuae benedictionis, quo et ieiunium nostrae devotionis gratum efficiatur in oculis tuis et haec libamina benedictione ditificentur tuae virtutis.
2432	Emitte domine spiritum ... feliciter occurramus.
	Emitte, domine, spiritum adoptionis, in quo clamemus tibi: “Abba, pater”, ut confiteamur, quoniam tu es unigeniti tui verus pater, et cognoscamus, quia nullus ei similis est inter filios dei, quem non tibi adoptio sed generatio consubstantialem neque gratia similem sed natura signat aequalem. Per huius enim fidei inviolabile mysterium custodiamus spei nostrae immutabile sacramentum. Ex hoc te quaesumus, ut cum nostris, qui iam e saeculo praecesserunt, qui etiam ipsius spiritus tui sancti dono renati sunt quorumque ante altare tuum mentionem cum tremore facimus, simul obviam in secundi adventus domini nostri claritate feliciter occurramus.
2433	Emmanuel nobiscum deus ... ex praemio.
	Emmanuel, nobiscum deus, Christe, filius dei, qui, cum ex virgine te nasciturum pronuntias, [quia] Mariam matrem creasti ut dominus, de qua natus es filius, da nobis, ut, qui cum illa a te vel per te creati sumus ex nihilo, simili, ut ea, credulitatis remuneremur ex praemio.
2434a	Emunda domine conscientias ... e terris.
	Emunda, domine, conscientias nostras fidei catholicae confessione sincera et cordis contritione continua, ut, sacris muneribus expiati, semper a te exaudiamur e caelis, cum pro nostris delictis ad te proclamamus e terris.
2434b	Emunda domine conscientias ... noster ...”
	Emunda, domine, conscientias nostras fidei catholicae confessione sincera et cordis contritione continua, ut semper a te exaudiamur e caelis, cum pro nostris delictis ad te proclamaverimus e terris: “pater noster ...”
2435	Enitentia tuarum domine ... possidere peccaminum.
	Enitentia tuarum, domine, martyrum Iustae et Rufinae sollemnia celebrantes, quae, mercimonio fictilium vasculorum contentae, ad beatae usque passionis meruerunt gloriam pervenire, te adclines oramus, ut per eas apud te nostra accipiatur oratio, quarum tu laetatus es de triumpho. Per eas evincamus cupiditatis incendia, per quas ipse tortoris evicisti tormenta ipsisque nos intercedentibus corrige, quarum te victorem ostendisti in passione, ut, quae tibi per gloriam meritorum effecta sunt vasa virtutum, unumquemque nostrum apud te obtineant vas suum absque contagione possidere peccaminum.
2436	Epularum divinarum communicatio ... prosint suffragia.
	Epularum divinarum communicatio sit nobis, domine, cordis et corporis purificatio, et, quorum nobis votiva sunt sollemnia, semper prosint suffragia.
2437	Epularum tuarum alimento ... sollemnia celebramus.
	Epularum tuarum alimento saginati, te humiliter rogamus, domine deus noster, ut beati martyris tui Stephani, Nicodemi, Gamalielis atque Abibon meritis ubique nos adiuves, quorum hodie revelationis sollemnia celebramus.
2438	Erectis sensibus et ... fiduciam referamus.
	Erectis sensibus et oculos cordis ad sublimia elevantes, quaesumus, ut, quae in precum vota detulimus, ad impetrandi fiduciam referamus.
2439	Erige nos domine ... gentium gaudeamus.
	Erige nos, domine deus noster, et alleva in misericordia tua, ut communione salutis et gaudio caritatis, dum ipsi salvari ex munere tuo cupimus, etiam fide et pace cunctarum gentium gaudeamus.
2440	Erige quaesumus domine ... desideria transeamus.
	Erige, quaesumus, domine, ad te corda nostra, ut a terrenis cupiditatibus in caelestia desideria transeamus.
2441	Eripe nos domine ... placere possimus.
	Eripe nos, domine, quaesumus, ab his, quae divinae sunt contraria voluntati, et, quia tui operis est omne, quod vivimus, praesta, ut tui famuli tibi placere possimus.
2442a	Erudi domine quaesumus ... defensione securum.
	Erudi, domine, quaesumus, populum tuum spiritalibus instrumentis et, quorum praestas sollemnia venerari, fac eorum et consideratione devotum et defensione securum.
2442b	Erudi quaesumus domine ... defensione securum.
	Erudi, quaesumus, domine, populum tuum spiritalibus instrumentis et, quorum praestas sollemnia praevenire, fac eorum et consideratione devotum et defensione securum.
2443	Erudi quaesumus domine ... luce concede.
	Erudi, quaesumus, domine, plebem tuam et, quae extrinsecus annua tribuis devotione venerari, interius assequi gratiae tuae luce concede.
2444	Erudiamur domine quaesumus ... praeventa laetitiam.
	Erudiamur, domine, quaesumus, his celebritatibus et iuvemur, quibus beati apostoli Andreae caelestem nobis tribuant martyria praeventa laetitiam.
2445a	Esto domine plebi tuae sanctificator et custos ut apostolicis munita ... secura deserviat.
	Esto, domine plebi tuae sanctificator et custos, ut, apostolicis munita praesidiis, et conversatione tibi placeat et secura deserviat.
2445b	Esto domine plebi tuae sanctificator et custos ut beatae Mariae ... secura deserviat.
	Esto, domine, plebi tuae sanctificator et custos, ut, beatae Mariae munita praesidiis, et conversatione tibi placeat et secura deserviat.
2445c	Esto domine quaesumus ... secura deserviat.
	Esto, domine, quaesumus, plebis tuae sanctificator et custos, ut, apostoli tui Thomae munita praesidiis, et conversatione tibi placeat et secura deserviat.
2445d	Esto domine plebi tuae sanctificator et custos ut apostoli tui Iacobi ... secura deserviat.
	Esto, domine, plebi tuae sanctificator et custos, ut, apostoli tui Iacobi munita praesidiis, et conversatione tibi placeat et secura deserviat.
2446	Esto domine propitius ... miseratus auxilio.
	Esto, domine, propitius plebi tuae et, quam tibi facis esse devotam, benigno refove miseratus auxilio.
2447a	Esto domine propitius ... aeterna contendere.
	Esto, domine, propitius plebi tuae et temporali consolatione non deseras, quam vis ad aeterna contendere.
2447b	Adesto domine propitius ... aeterna contendere.
	Adesto, domine, propitius plebi tuae et temporali consolatione non deseras, quam vis ad aeterna contendere.
2448a	Esto propitius domine ... largiaris auxilium.
	Esto propitius, domine, quaesumus, plebi tuae et, suffragantibus sanctis tuis, tribue nobis veniam peccatorum; concedas placatus et pacem, ut propitius largiaris auxilium.
2448b	Esto nobis propitius ... veniam peccatorum.
	Esto nobis propitius, domine, quaesumus, et, suffragantibus sanctis martyribus et confessoribus tuis, tribue nobis veniam peccatorum.
2449	Esto protector domine ... dona largire.
	Esto protector, domine, populi tui propitiatus et rector eique, deprecantibus sanctis tuis, remissionem tribue peccatorum; praesta vitae melioris effectum, temporalia benignus praebe solatia et aeternitatis promissa dona largire.
2450a	Esto quaesumus domine ... immortalitatis effectum.
	Esto, quaesumus, domine, propitius plebi tuae, ut, de die in diem, quae tibi non placent, respuentes, tuorum potius repleantur dilectionibus mandatorum et, mortalis vitae consolationibus gubernati, proficiant ad immortalitatis effectum.
2450b	Esto quaesumus domine ... delectationibus mandatorum.
	Esto, quaesumus, domine, propitius plebi tuae, ut, quae tibi non placent, respuentes, tuorum potius repleantur delectationibus mandatorum.
2451	Esurientes corpus tuum ... purificare correptum.
	Esurientes corpus tuum, domine, ac sanguinem sitientes, ut hoc nobis in remissionem peccatorum sumendum tribuas, deprecamur, quia nostra virtus et salus sit, si tamen non, quod indigni sumus, irascaris, sed facis vinci gaudio metum et cedere exsultationi terrorem. Nemo enim est in hoc numero concilioque fidelium, qui non accedere ad mensam tuam in hac gloriosa per totum mundum nocte desideret, ut, si firmus est, habeat custodiam, si infirmus est, medicinam. Sic igitur, quaesumus, apud te, domine, placitum sit cunctis donare, quod cupiunt, ut digneris parcere, quod praesumunt. Quis non optet illa carne animam suam tangere, pascere, confortare, in qua se per gratiam credat esse transfusum, quae corruptionem non vidit et vim mortis passione mortis absorbuit? Quis non ambiat propter te sumere de tuo, quod te videat propter nos assumpsisse de nostro? Indita hac ex pietate fiducia, ut, quod in defunctis dignatus est vivificare mortuum, in reis dignetur purificare correptum.
2452	Et nataliciis sanctorum ... perfruamur aeternis.
	Et nataliciis sanctorum, domine, et sacramenti munere vegetati, quaesumus, ut bonis, quibus per tuam gratiam nunc fovemur, perfruamur aeternis.
2453	Et refrigerare digneris ... omnium fidelium catholicorum orthodoxorum quorum commemorationem agimus quorum numerum et nomina tu solus domine cognoscis tribue indulgentiam peccatorum quia pius et misericors es deus noster ut si quae carnales maculae in eis de terrenis contagiis inhaeserunt miserationis tuae
	Et refrigerare digneris, domine, animas famulorum famulatumque tuarum et omnium monachorum, in monasterio sancti illius in Christo quiescentium vel qui in hoc loco in Christo requiescunt, <et animis> omnium fidelium catholicorum orthodoxorum, quorum commemorationem agimus, quorum numerum et nomina tu solus, domine, cognoscis, tribue indulgentiam peccatorum, quia pius et misericors es, deus noster, ut, si quae carnales maculae in eis de terrenis contagiis inhaeserunt, miserationis tuae venia deleantur.
2454	Et sacramentis tuis ... recordationibus exhibentur.
	Et sacramentis tuis, domine, et gaudiis optatae celebritatis expleti, quaesumus; eorum nobis precibus dent medelam, quorum recordationibus exhibentur.
2455	Et sanctorum tuorum ... aeterne deus.
	Et sanctorum tuorum exaltatione gaudentes et sacramenti tui perceptione satiati, gratias tibi referimus, domine, sancte pater, omnipotens aeterne deus.
2456	Exaltatio divina paterna ... obtinenda cognoscat.
	Exaltatio divina, paterna pietas, immensa maiestas, te supplices trementesque deprecamur pro famulo tuo illo, ut des ei, domine, mentem puram, caritatem perfectam, in actibus sinceritatem, in corde puritatem, in opere virtutem, in moribus disciplinam et, quae pro iustitiae tuae timore integra mente vel devotione pro ipso tibi offerimus, pietate tua obtinenda cognoscat.
2457	Exaltationem nostrae condicionis ... pietatis aptemur.
	Exaltationem nostrae condicionis respice, deus, ut, tua dignatione mundati, sacramentis magnae pietatis aptemur.
2458	Exaudi clementissime pater ... iubeas expediri.
	Exaudi, clementissime pater, deprecationem servi tui, pro pauperibus ancillis tuis, in partu nunc aut in posterum laborantibus, maiestati tuae devotissime supplicantis, ut, quemadmodum tua eas providentia concipere decrevisti, ita, ipsa benedictione tua praeambula, ad laudem tui sacri nominis, virgine gloriosa suffragante, celeriter iubeas expediri.
2459	Exaudi deus familiae ... dignatus es et da pacem in diebus nostris qui es auctor pacis
	Exaudi, deus, familiae tuae preces et suscipe vota fidelium, quorum suscipere peccata et <dimittere> dignatus es, et da pacem in diebus nostris, qui es auctor pacis et caritatis.
2460	Exaudi deus orationem ... propitiationis immensae.
	Exaudi, deus, orationem nostram et tua sancta, quae sumpsimus, non ad iudicium nobis provenire patiaris sed ad remedium propitiationis immensae.
2461	Exaudi domine deus ... patrocinia veneramur.
	Exaudi, domine deus, clementer in hac domo tua preces servorum tuorum, quatenus illorum meritis tuam consequamur gratiam, quorum hic patrocinia veneramur.
2462	Exaudi domine devotam ... propitiatus assume.
	Exaudi, domine, devotam tuae familiae precem et oblatum tibi hoc sacrificium in remissionem nostrorum peccaminum propitiatus assume.
2463	Exaudi domine offerentium ... regione vivorum.
	Exaudi, domine, offerentium preces, vota suscipe, peccata dimitte, tribue tuorum intercessione sanctorum caris quoque nostris, qui in Christo dormierunt, refrigerium in regione vivorum.
2464	Exaudi domine plebem ... praeveniens largiatur.
	Exaudi, domine, plebem tuam et, quod non habent merita supplicantium, tua nos semper gratia praeveniens largiatur.
2465a	Exaudi domine populum ... devotione servire.
	Exaudi, domine, populum tuum, cum sancti apostoli tui Andreae patrocinio supplicantem, ut tuo semper auxilio secura tibi possit devotione servire.
2465b	Exaudi quaesumus domine ... devotione servire.
	Exaudi, quaesumus, domine, populum tuum cum sanctorum apostolorum tuorum Petri et Pauli patrocinio supplicantem, ut, tuo auxilio servati, secura tibi possint devotione servire.
2466a	Exaudi domine populum tuum cum sanctorum tuorum tibi patrocinio supplicantem et ... reperire subsidium.
	Exaudi, domine, populum tuum, cum sanctorum tuorum tibi patrocinio supplicantem, et temporalis vitae nos tribue pace gaudere et aeternae reperire subsidium.
2466b	Exaudi domine populum tuum cum sanctorum tuorum tibi patrocinio supplicantem ut ... reperire subsidium.
	Exaudi, domine, populum tuum, cum sanctorum tuorum tibi patrocinio supplicantem, ut (et) temporalis vitae nos tribuas pace gaudere et aeternae reperire subsidium.
2466bis = 2466b	Exaudi domine populum tuum cum sanctorum tuorum tibi patrocinio supplicantem ut ... reperire subsidium. (=CO 2466b)
	Exaudi, domine populum tuum, cum sanctorum tuorum tibi partrocinio, supplicantem, ut (et) temporalis vitae nos tribuas pace gaudere et aeternae reperire subsidium.
2466c	Exaudi domine populum ... reperire subsidium.
	Exaudi, domine, populum tuum cum sanctorum tuorum confessurum Germani et Remigii episcoporum, quorum sollemnia celebramus, tibi patrocinio supplicantem, ut temporalis vitae nos tribuas pace gaudere et aeternae reperire subsidium. ( recensio prima ) Exaudi, domine, populum tuum et, sanctorum Remigii, Germani et Vedasti antistitum sollemnia celebrantes, temporalis vitae nos tribue pace gaudere et aeternum reperire subsidium. ( recensio altera )
2466d	Exaudi domine famulos ... reperire laetitiam.
	Exaudi, domine, famulos tuos, cum multiplici sanctorum tuorum tibi patrocinio supplicantes, et temporalis vitae eos tribue pace gaudere et perpetuam reperire laetitiam.
2467a	Exaudi domine populum ... gratia consequatur.
	Exaudi, domine, populum tuum, tota tibi mente subiectum, ut, corpore et mente protectus, quod pie credit, tua gratia consequatur.
2467b	Exaudi domine populum ... sperat obtineat.
	Exaudi, domine, populum tuum, tota tibi mente subiectum, et beati Martini pontificis supplicatione custodi, ut, corpore et corde protectus, quod pie credi(di)t, appetat et, quod iuste sperat, obtineat.
2468	Exaudi domine populum ... et futuris.
	Exaudi, domine, populum tuum, toto tibi corde subiectum, et intercessionibus beatissimorum martyrum tuorum Sisinnii, Martyrii et Alexandri a praesentibus defende periculis et futuris.
2469	Exaudi domine preces ... propitiatione laetifica.
	Exaudi, domine, preces nostras et celeri nos propitiatione laetifica.
2470a	Exaudi domine preces ... nostras placatus admitte.
	Exaudi, domine, preces nostras et, intervenientibus sanctis tuis, preces nostras placatus admitte.
2470b	Exaudi domine preces ... tuae placatus admitte.
	Exaudi, domine, preces nostras, quaesumus, et, interveniente sancto martyre tuo illo, eas ante conspectum maiestatis tuae placatus admitte.
2471	Exaudi domine preces ... liberari confidimus.
	Exaudi, domine, preces nostras et ne velis cum servis tuis adire iudicium, quia, sicut in nobis nulla iustitia reperitur, de qua praesumere valeamus, ita te fontem pietatis agnoscimus, a quo et a peccatis nostris nos ablui et a necessitatibus liberari confidimus.
2472a	Exaudi domine preces nostras et profectione famuli tui ... potiatur effectibus.
	Exaudi, domine, preces nostras et profectione famuli tui illius misericordiam tuam, qui semper es ubique, praetende, ut, ab omnibus adversitatibus tua opitulatione defensus, iustorum desideriorum potiatur effectibus.
2472b	Exaudi domine preces nostras et iter famuli tui ... potiatur effectibus.
	Exaudi, domine, preces nostras et iter famuli tui illius propitius comitare atque misericordiam tuam, sicut ubique es, ita ubique largire, quatenus ab omnibus adversitatibus tua opitulatione defensus, iustorum desideriorum potiatur effectibus.
2473a	Exaudi domine preces ... tuere praesidiis.
	Exaudi, domine, preces nostras et sanctorum martyrum nos tuere praesidiis.
2473b	Exaudi domine preces ... ubique praesidiis.
	Exaudi, domine, preces nostras et intercessione beati sacerdotis et confessoris tui Ambrosii nos tuere ubique praesidiis.
2473c	Exaudi domine preces ... ubique praesidio.
	Exaudi, domine, preces nostras et beati martyris tui illius nos tuere ubique praesidio.
2474	Exaudi domine preces ... foveamur auxiliis.
	Exaudi, domine, preces nostras et sanctorum tuorum, quorum festa sollemniter celebramus, continuis foveamur auxiliis.
2475	Exaudi domine preces ... professionis expugna.
	Exaudi, domine, preces nostras et, sicut profanas mundi caligines sancti spiritus luce evacuasti, sic hostes romani nominis et inimicos catholicae professionis expugna.
2476a	Exaudi domine preces ... concede sanctorum.
	Exaudi, domine, preces nostras et, ut digna sint munera, quae oculis tuae maiestatis offerimus, subsidium nobis tuorum concede sanctorum.
2476b	Exaudi domine preces ... pietatis impende.
	Exaudi, domine, preces nostras et, ut digna sint munera, quae oculis tuae maiestatis offerimus, subsidium nobis tuae pietatis impende.
2477	Exaudi domine preces ... semper devotos.
	Exaudi, domine, preces nostras et, ut tuis nos muneribus iugiter prosequaris, maiestati tuae fac semper devotos.
2478	Exaudi domine preces ... quae mundum vicit cum fragili <esset
	Exaudi, domine, preces nostras in die sollemnitatis magnifico sanctae virginis et martyris <illius>, quae mundum vicit, cum fragili <esset> sexu, et dona, eius apud te interventu placatus, ut cuncti, qui assistimus, eius memoriam frequentantes, pacis et caritatis vinculo colligemur.
2479	Exaudi domine preces ... absolve peccatis.
	Exaudi, domine, preces nostras, quas in sancti confessoris tui atque pontificis Marcelli sollemnitate deferimus, et, qui tibi digne meruit famulari, eius intercedentibus meritis, ab omnibus nos absolve peccatis.
2480a	Exaudi domine preces ... actibus adiuvet.
	Exaudi, domine, preces nostras, quas in sancti confessoris et sacerdotis episcopi tui Martini commemoratione deferimus, et praesta, ut, sicut ille in conspectu tuo, qui tibi digne meruit famulari, clarus semper exstitit, ita eius nos supplicatio in bonis actibus adiuvet.
2480b	Exaudi domine preces ... grata iustorum.
	Exaudi, domine, preces nostras, quas in sancti confessoris tui illius commemoratione deferimus, ut in conspectu tuo et, qui tibi digne meruit famulari, clarus semper exsistat et supplicatio nos adiuvet tibi grata iustorum.
2480c	Exaudi domine preces ... nostram adiuvet.
	Exaudi, domine, preces nostras, quas in sancti confessoris tui illius commemoratione deferimus; in conspectu tuo, qui tibi digne meruit famulari, clarus semper exsistens, supplicationem nostram adiuvet.
2481a	Exaudi domine preces nostras ut in omni natione ... testificatio veritatis.
	Exaudi, domine, preces nostras, ut in omni natione, quod Verbi tui promissum est evangelio, compleatur et plenitudo adoptionis obtineat, quod praedixit testificatio veritatis.
2481b	Exaudi domine preces nostras ut quod tui Verbi ... testificatio veritatis.
	Exaudi, domine, preces nostras, ut, quod tui Verbi sanctificatione promissum est, evangelico ubique compleatur effectu et plenitudo adoptionis obtineat, quod praedixit testificatio veritatis.
2482	Exaudi domine preces ... sempiterna concilient.
	Exaudi, domine, preces nostras, ut redemptionis nostrae sacrosancta commercia et vitae nobis conferant praesentis auxilium et gaudia sempiterna concilient.
2483	Exaudi domine preces ... defunctorum requie.
	Exaudi, domine, preces populi tui, ut iubeas suscipi, quae iussisti offerri, sintque haec munera acceptabilia in tuo conspectu pro omnium animarum emendatione et corporum sanitate, pro martyrum laude et pro defunctorum requie.
2484	Exaudi domine quaesumus ... fletibus supplicantium.
	Exaudi, domine, quaesumus, gemitum populi tui nec plus apud te valeat offensio delinquentium, quam miseratio tua, semper indulta fletibus supplicantium.
2485	Exaudi domine quaesumus ... pietatis averte.
	Exaudi, domine, quaesumus, populum tuum, de tua misericordia malorum suorum veniam supplicantem, et, quia potens es peccata dimittere, supplicia, quae nostris meremur operibus, potentia tuae pietatis averte.
2486	Exaudi domine quaesumus ... placatus intende.
	Exaudi, domine, quaesumus, preces nostras et, interveniente beato Marco confessore tuo atque pontifice, supplicationes nostras placatus intende.
2487a	Exaudi domine quaesumus ... protegatur adversis.
	Exaudi, domine, quaesumus, preces nostras, ut populus tuus, sub tantis patrociniis constitutus, et a suis offensionibus liberetur et ab omnibus protegatur adversis.
2487b	Exaudi domine preces ... tueatur adversis.
	Exaudi, domine, preces nostras, ut populus tuus, qui sub tantis sanctorum martyrum tuorum Nazarii et Celsi patrociniis est constitutus, et a suis offensionibus liberetur et ab omnibus tueatur adversis.
2488	Exaudi domine supplicum ... exhibeamus officiis.
	Exaudi, domine, supplicum preces et, devoto tibi pectore famulantes, perpetua defensione custodi, ut, nullis perturbationibus impediti, liberam servitutem tuis semper exhibeamus officiis.
2489	Exaudi domine supplicum ... reddat acceptas.
	Exaudi, domine, supplicum preces et, quas merita nostra destituunt, sanctorum tuorum commendatio reddat acceptas.
2490	Exaudi domine supplicum ... audeat violare.
	Exaudi, domine, supplicum preces, quas fundo ante conspectum divinae maiestatis tuae pro famulo tuo illo, qui diaboli laqueo obnoxius strictus tenetur; porrige, deus, dexteram tuam de supernis et libera famulum tuum a tenebris diaboli et a telis eius, ut eum numquam audeat violare.
2491	Exaudi domine supplicum ... virtute firmetur.
	Exaudi, domine, supplicum preces, ut, quod nostro gerendum est ministerio, tua potius virtute firmetur.
2492	Exaudi domine vocem ... fructibus glorietur.
	Exaudi, domine, vocem tibi supplicantis ecclesiae, quae, in modum vineae filii tui propagata cultoribus, firmis in te nititur stare radicibus, ut, a praesentis saeculi fluctibus aliena, pullulantis in se populi nativitate ditata, ubertatis suae fructibus glorietur.
2493	Exaudi me domine ... me suscipias.
	Exaudi me, domine, sancte pater, omnipotens aeterne deus, ut deprecatio mea ad te digna sit, ut, quando me exire de corpore iusseris, in me non habeat pars inimici ullam iniquitatem, sed infunde in me misericordiam tuam, ut angelus tuus Michael dignanter me perducat ante conspectum tuum et tu, quia pius et misericors es, delicta mea clementer dimittas et in tua gloria dignanter me suscipias.
2494	Exaudi me omnipotens ... spiritu replere.
	Exaudi me, omnipotens aeterne deus, et, qui dixisti: “Caro mea vere est cibus et sanguis meus vere est potus”, sanctifica hoc sacrificium in oblationem tui corporis, ut assumentes a terrenis desideriis et carnali cupiditate lasciviaque vel immunditia, temptatione quoque immundorum spirituum liberare digneris et sancto tuo spiritu replere.
2495	Exaudi nos bonorum ... est passione.
	Exaudi nos bonorum omnium dispensator, atque in electissimi tui Ioannis sollemnitate praesenti delictorum indulgentiam placatus attribue, cui, toto in virtutem sancti spiritus amore translato, Christus fuit causa moriendi, cui Christus fuerat causa nascendi. Ipse igitur nativitatis dominicae nuntius, ipse praecursor probatus est passione.
2496	Exaudi nos deus ... quae petimus.
	Exaudi nos, deus pater omnipotens, et praesta, quae petimus.
2497	Exaudi nos deus ... quod poscimus.
	Exaudi nos, deus pater omnipotens, et praesta, quaesumus, ut munera offerentium famulorum et famularum tuarum suscipere digneris; sanctifica, quod offertur tibi; praesta, quod poscimus.
2498	Exaudi nos deus ... esse doctrinis.
	Exaudi nos, deus salutaris noster, et apostolorum tuorum nos tuere praesidiis, quorum donasti fideles esse doctrinis.
2499	Exaudi nos deus ... gloriam consequamur.
	Exaudi nos, deus salutaris noster, et concede propitius, ut sanctorum tuorum meritis et precibus aeternitatis gloriam consequamur.
2500	Exaudi nos deus ... servitute famulemur.
	Exaudi nos, deus salutaris noster, et dies nostros in tua pace dispone, ut, a cunctis perturbationibus liberati, tranquilla tibi servitute famulemur.