Ecce, domine, festo cathedrae confessoris tui Martini sanctissimi uberius gratulamur, dum hunc diem, quo ipse in sacerdotium adscitus est, prona devotione excolimus. Is quippe, dum catervas aufugeret hominum, praesul effectus est populorum, ut, qui iam motus carnis compresserat in deserto, evectu gratiae utilius in populo perficeretur salvando, quo pacis, cuius in deserto avidus fuerat adsecutor, post largius exsisteret praerogator.
Ex hoc igitur tuam, pie deus, exoramus clementiam, ut, quidquid doctrinae eius promanavit ex lumine, te opitulante, nos impleamus in caritate.