The Digital Collection of Sources

Corpus Orationum

Moeller, Eugenius OSB – Clément, Ioannes Maria – Coppieters ‘t Wallant, Bertrandus: Corpus orationum.
Brepols, Turnhout 1993–2004. (Corpus Christianorum Series Latina 160 A–M)

1501	Deus qui conteris ... actione laudemus.
	Deus, qui conteris bella et impugnatores in te sperantium potentia tuae defensionis expugnas, auxiliare implorantibus misericordiam tuam, ut, omnium gentium feritate compressa, indefessa te gratiarum actione laudemus.
1502	Deus qui conteris ... superare valeant.
	Deus, qui conteris bella et impugnatores in te sperantium potentia tuae defensionis expugnas, auxiliare, quaesumus, famulo tuo illi regi nostro, coniugi, proli populoque sibi subiecto, pro quibus suppliciter misericordiam tuam imploramus, ut, te parcente, remissionem peccatorum accipiant et cuncta sibi adversantia, te adiuvante, superare valeant.
1503	Deus qui contritorum ... referamus laeti.
	Deus, qui contritorum non despicis gemitum et maerentium non spernis affectum, adesto precibus nostris, quas pietati tuae pro tribulatione nostra offerimus, implorantes, ut nos clementer suscipias et solo bonitatis tuae intuitu tribuas, ut, quidquid contra nos diabolicae atque humanae moliuntur adversitates, ad nihilum redigas et consilio misericordiae tuae allidas, quatenus, nullis adversitatibus laesi sed ab omni tribulatione et angustia liberati, gratias tibi in ecclesia tua referamus laeti.
1504	Deus qui coram ... fieri participes.
	Deus, qui coram matre agnus innocens mortem nostram subire dignatus es, concede nos, quaesumus, ipsius virginis precibus, resurrectionis tuae fieri participes.
1505	Deus qui creationem ... miserationis obtineat.
	Deus, qui creationem condicionis humanae diabolicis non es passus perire nequitiis, remedia tuae propitiationis exsequere, ut in eadem non praevaleat inimica subreptio sed redemptio tuae miserationis obtineat.
1506	Deus qui creaturae ... pietatis illustra.
	Deus, qui creaturae tuae misereri potius eligis quam irasci, cordis nostri infirma considera et tuae nos gratia pietatis illustra.
1507	Deus qui credentes ... benedictionis amittant.
	Deus, qui credentes in te fonte baptismatis innovasti, hanc renatis in Christo concede custodiam, ut nullo erroris incursu gratiam tuae benedictionis amittant.
1508	Deus qui credentes ... mereantur introitum.
	Deus, qui credentes in te populos gratiae tuae largitate multiplicas, respice propitius ad electionem tuam, ut, qui sacramento baptismatis sunt renati, regni caelestis mereantur introitum.
1509	Deus qui credentes ... esse securos.
	Deus, qui credentes in te populos nullis sinis noceri terroribus, dignare preces et hostias dicatae tibi plebis suscipere, ut pax, a tua pietate concessa, romanos fines ab omni hoste faciat esse securos.
1510	Deus qui culpa ... misericorditer averte.
	Deus, qui culpa offenderis, paenitentia placaris, afflictorum gemitus respice et mala, quae iuste inrogas, misericorditer averte.
1511	Deus qui culpa ... meremur averte.
	Deus, qui culpa offenderis, paenitentia placaris, preces populi supplicantis propitius respice et flagella tuae iracundiae, quae pro peccatis nostris meremur, averte.
1512	Deus qui culpas ... gratiam sentiamus.
	Deus, qui culpas delinquentium districte feriendo percutis, fletus quoque lugentium non recuses, ut, qui pondus tuae animadversionis cognovimus, etiam pietatis gratiam sentiamus.
1513	Deus qui culpas ... consolatione gaudere.
	Deus, qui culpas nostras piis verberibus percutis, ut nos a nostris iniquitatibus emundes, da nobis et de verbere tuo proficere et de tua citius consolatione gaudere.
1514	Deus qui cum ... regna perducens.
	Deus, qui, cum muneribus nullis indigeas, ipse nobis munera cuncta largiris, accipe propitius, quae de tuis donis tibi nos offerre voluisti, non solum nostrae reputans devotioni, quae tua sunt, sed etiam per haec nos ad caelestia regna perducens.
1515	Deus qui cum ... incitentur exemplo.
	Deus, qui, cum omnes creaturas diligens feceris, in ea indulgentia hominem, ut etiam illum ab impietatibus redemeris, condidisti, da servis tuis hanc caritatis affectum, ut bona pro malis rependere tuo incitentur exemplo.
1516	Deus qui cum ... et renatos.
	Deus, qui, cum salutem hominum semper opereris, nunc tamen populum tuum gratia abundantiori multiplicas, respice propitius ad electionem tuam, ut paternae protectionis auxilio et regenerandos munias et renatos.
1517	Deus qui das ... conferre digneris.
	Deus, qui das orationem oranti ac, diffusa iucunditate benedictionum, annos iusto, adesto, quaesumus, nobis supplicantibus famulis tuis atque hanc oblationem, quam in honorem nominis tui et commemorationem electi tui Sigismundi seu Desiderii episcopi et martyris offerimus pro famulo tuo illi, qui febribus laborat, placatus ac benignus assume atque ei, quaesumus, salutiferam medicinam conferre digneris.
1518	Deus qui de ... intercessionibus adiuvemur.
	Deus, qui de beatae Mariae virginis utero Verbum tuum, angelo nuntiante, carnem suscipere voluisti, praesta supplicibus tuis, ut, qui vere eam genitricem dei credimus, eius apud te intercessionibus adiuvemur.
1519	Deus qui de ... et futurae.
	Deus, qui de his terrae fructibus tua sacramenta constare voluisti, praesta, quaesumus, ut opem nobis et praesentis vitae conferas et futurae.
1520a	Deus qui de ... amplificetur augmentis.
	Deus, qui de vivis et electis lapidibus aeternum maiestati tuae condis habitaculum, auxiliare populo supplicanti, ut, quod ecclesiae tuae corporalibus proficit spatiis, spiritalibus amplificetur augmentis.
1520b	Deus qui de ... auxilium sentiatur.
	Deus, qui de vivis et electis lapidibus aeternum nomini tuo condis habitaculum, da aedificationi huic incrementa iustitiae, ut ab omnibus, hic invocantibus nomen tuum, protectionis tuae auxilium sentiatur.
1521	Deus qui dedisti ... valeamus pervenire.
	Deus, qui dedisti legem Moysi in summitate montis Sinai et in eodem Ioco per angelos tuos corpus beatae Katherinae virginis et martyris mirabiliter collocasti, tribue quaesumus, ut eius meritis et intercessione ad montem, qui Christus est, valeamus pervenire.
1522	Deus qui delicta ... intercessu mirabile.
	Deus, qui delicta nostra Christi morte mortificas et iustificationem nostram Christo resurgente confirmas, salutaria populi sacrificia misericorditer suscipe; bonorum omnium desideria, quae dedisti, celeriter perfice. Sit hoc sabbatum illuminatio deliciis nostris, ut cuncti cum regeneratis infantibus mereamur sacramentis vivificari paschalibus. Coruscet, quaesumus, in pane, quod pependit in cruce; micet in calice, quod manavit ex latere. Fiat, quaesumus, acceptabile, fiat annuae sollemnitatis intercessu mirabile.
1523	Deus qui delinquentes ... ad veniam.
	Deus, qui delinquentes perire non pateris, donec convertantur et vivant, debitam, quaesumus, peccatis nostris, domine, suspende vindictam et praesta propitius, ne dissimulatio cumulet ultionem sed ut potius emendatio prosit ad veniam.
1524	Deus <qui> diei ... diei huius sollemnitatem beati confessoris tui Eparcii atque presbyteri honorabilem nobis consecrasti dona familiae tuae precibus ut cuius hodie festa celebramus eius meritis et
	Deus, <qui> diei huius sollemnitatem beati confessoris tui Eparcii atque presbyteri honorabilem nobis consecrasti, dona familiae tuae precibus, ut, cuius hodie festa celebramus, eius meritis et auxilio sublevemur.
1525a	Deus qui dierum ... nostra cumulentur.
	Deus, qui dierum nostrorum numeros temporumque mensuras maiestatis tuae potestate dispensas, propitius ad humilitatis nostrae respice servitutem, ut tuae pacis abundantia tempora nostra cumulentur.
1525b	Deus qui dierum ... benignus accumula.
	Deus, qui dierum nostrorum numeros mensurasque temporum maiestatis tuae potestate dispensas, ad humilitatis nostrae propitius respice servitutem et tuae pacis abundantia tempora nostra et episcopi nostri tua gratia benignus accumula.
1526	Deus qui dierum ... exhibere famulatum.
	Deus, qui dierum nostrorum temporumque mensuras maiestatis tuae potestate dispensas, ad humilitatis nostrae propitius respice, servitutem et operis tui munera in supplicum tuorum subiectione conserva, ut sine metu et adversantium impulsione devotum pietati tuae possimus exhibere famulatum.
1527	Deus qui digne ... triumphare fecisti.
	Deus, qui digne tibi sacratis virginibus mirandi agonis robur indidisti, quo per martyrii palmam ad supernae contemplationis pertingerent gloriam, da, quaesumus, earum nos intercessionibus adiuvari, quas hodierna die, transcenso mortis stadio, in caelestibus triumphare fecisti.
1528	Deus qui digne ... consortia obtinere.
	Deus, qui digne tibi servientium nos imitari desideras famulatum, da nobis caritatis tuae flamma ardere succensis, ut antistitum decus priorum, qui tibi placuerunt, mereamur consortia obtinere.
1529	Deus qui dignosceris ... evadere adversantis.
	Deus, qui dignosceris ante saecularia tempora futurae creationis esse antecessor et saeculo iam labenti ob nostram redemptionem ex paterna sede per hanc virginem advenisti redemptor, ut nostrum scilicet, quod insolubile, ex Eva retinebamur casu, per huius virginalis uterum, solvendo eum, tuum voluisti adesse ingressum. Per eundem nos dignoscimus partum novae prolis deum destinatum et hominem, quo sic festivum vicibus annum, suum ecclesiae novimus honorare recessum. Quo, sicut isto ex saeculo eiusdem excessu rutilum nobis attulit gaudium, ita se nostris ingerat mentibus, ut attolli valeamus sursum. Qualiter eisdem suffragetur precibus huius sollemnitatulae cunctum concurrenti clerum, ut ex eadem prece detur suffragatio ecclesiarum praesules, largiatur auxilium fidelibus cunctis, adhibeatur universis in commune viventibus christianis atque sentiant se huius diei muscipula evadere adversantis.
1530	Deus qui dilecti ... consequamur societatem.
	Deus, qui dilecti confessoris tui et sacerdotis merita Grimbaldi miraculorum gloria fecisti clarescere, praesta, ut, qui sacratissimae illius depositionis celebramus festivitatem, eius in caelis perennem consequamur societatem.
1531	Deus qui diligendo ... referre valeamus.
	Deus, qui diligendo castigas et castigando nos refoves, praesta, ut de utroque tibi gratias semper referre valeamus.
1532	Deus qui diligentibus ... superant consequamur.
	Deus, qui diligentibus te bona invisibilia praeparasti, infunde cordibus nostris tui amoris affectum, ut, te in omnibus et super omnia diligentes, promissiones tuas, quae omne desiderium superant, consequamur.
1533	Deus qui diligentibus ... temptatione mutari.
	Deus, qui diligentibus te facis cuncta prodesse, da cordibus nostris inviolabilem caritatis affectum, ut desideria, de tua inspiratione concepta, nulla possint temptatione mutari.
1534a	Deus qui diligentibus ... offensione gradiatur.
	Deus, qui diligentibus te misericordiam tuam semper impendis et a servientibus tibi in nulla es regione longinquus, dirige viam famuli tui illius in voluntate tua, ut te protectore et te praeduce per iustitiae semitas sine offensione gradiatur.
1534b	Deus qui diligentibus ... remissione peccatorum.
	Deus, qui diligentibus te misericordiam tuam semper impendis et a servientibus tibi in nulla es regione longinquus, dirige viam famuli tui illius in voluntate tua, quatenus, angelorum tuorum praesidio fultus, intercessione quoque sanctorum munitus, a cunctis adversitatibus tua miseratione salvetur, ut, profectionis et reversionis suae felicitate potitus, et compos reddatur iustorum votorum et de suorum laetetur remissione peccatorum.
1535	Deus qui ad caelos adscendens ... dona concedas.
	Deus, qui, ad caelos adscendens, discipulis tuis spiritum sanctum collaturum te dignatus es polliceri, praesta, quaesumus, ut, sicut apostoli tui multifaria doctrinae caelestis munera perceperunt, ita nobis quoque spiritalia dona concedas.
1536	Deus qui dispersa ... pace gaudere.
	Deus, qui dispersa congregas et congregata conservas, da inviolabilem populo tuo in bona voluntate concordiam, ut, quos fecisti fidem conservare, tua semper facias pace gaudere.
1537	Deus qui diversitatem ... pietas actionum.
	Deus, qui diversitatem gentium in confessione tui nominis adunasti, da, ut renatis fonte baptismatis una sit fides mentium et pietas actionum.
1538	Deus qui dives ... paenitentiam relevemur.
	Deus, qui dives es ad ignoscendum et propterea voluisti carnis humilitatem assumere, ut nobis humilitatis exempla relinqueres et in quibuscumque passionibus nos faceres esse constantes, praesta, ut semper bona, quae a te percipimus, teneamus et, quoties in peccatis labimur, per paenitentiam relevemur.
1539	Deus qui dives ... ad salutem.
	Deus, qui dives es in misericordia, qua mortuos nos peccatis convivificasti Christo filio tuo, ut formam servi acciperet, qui omnia formavit, ut, qui erat in deitate, generaretur in carne, ut involveretur in pannis, qui adorabatur in stellis, ut iaceret in praesepio, qui regnabat in caelo, invocantibus nobis aurem maiestatis tuae propitiatus accommoda, donans hoc per ineffabilem tuae misericordiae caritatem, ut, qui exsultamus de nativitate filii tui, qui et ex virgine natus et ex spiritu sancto generatus est, pareamus praeceptis eius, quibus nos edocuit ad salutem.
1540	Deus qui dives ... miserator indulge.
	Deus, qui dives es in omnibus misericordia, pater gloriae, qui posuisti filium tuum lumen in nationibus praedicare captivis redemptionem, caecis visum, remissionem peccatorum et sortem inter sanctos per fidem, qui es in Christo largus miserator, indulge.
1541	Deus qui divinis ... misericorditer adipisci.
	Deus, qui divinis obsequiis angelorum magnificas dignitatem, extremitatem nostram ad respectum tuae visitationis illustra, ut, quod per illos facis nobis mirabiliter nuntiari, facias nos misericorditer adipisci.
1542	Deus qui divinitatis ... sumere mereamur.
	Deus, qui, divinitatis tuae potentia clarens, divinos ac caelibes ecclesiae tuae Xystum atque Laurentium elegisti gubernatores, cum in uno sacerdotii summam, in altero levitici ordinis contuleris gratiam, intentis te precibus supplicamus, ut in tanti diei sollemnitate conventum familiae tuae placatus ipse accipias et postulatus celer occurras. Xystus, officii sui non immemor, sanctificanda tibi nostra inferat vota; similiter et Laurentius, ministerii sui exsequens curam, supplicantibus nobis subministret remedia postulata. Per illum discamus, quod ipse egit, pro te domino cervices ponere; per istum cremantis saeculi non subrui tempestate. Per illum, maturae discretionis iudicio freti, polleamus seniorum; per istum, validae iuventutis luctamem arripientes, fide exstinguamus incentiva libidinum, quo sic per Xystum sanctificandi tuis altaribus offeramur, ut, tradente nobis Laurentio, calicem salutis in remissionem peccatorum sumere mereamur.
1543	Deus qui divisionem ... pervenimus agnitionem.
	Deus, qui divisionem apostolorum hodierna die fieri tua praeordinasti prudentia, ut in una fidei gratia gentium passim dispersa convocaretur ecclesia, da nobis per supplicationem ipsorum veniam nostrorum promereri peccaminum, per quorum veram praedicationem ad tui nominis pervenimus agnitionem.
1544	Deus qui dixisti ... benigne perficias.
	Deus, qui dixisti: “Domus mea, domus orationis vocabitur”, domum istam, gentium spurcitiis contaminatam, mundare et sanctificare digneris, ut omnium preces et vota, in loco hoc ad te clamantium, clementer exaudias et benigne perficias.
1545	Deus qui dominicae ... dilectione servasti.
	Deus, qui dominicae resurrectionis temporali sollemnitate laetificas, quos ad gaudia sempiternae festivitatis inflammas, hodiernae, quaesumus, congregationis attende conventus et celeriter postulantibus tribue, quidquid sanctus exoptat affectus. Dona singulis temperantiam, repelle tristitiam, fac regeneratos perenniter in fide consistere, fac fideles in caritate proficere. Discant illi vehementer servare per gratiam, quod dedisti; discant isti diligere, quod cottidiana dilectione servasti.
1546	Deus qui dum ... ambitione victoriam.
	Deus, qui, dum opus illud fabricae mundialis, quod sola imperii iussione creaveras, perire non pateris, domum tibi in alvo virginis fabricasti et, ne periret gens, a te plasmata, revelasti saeculis inaudita mysteria, ut, quem caelorum excelsa non capiunt, parvus puellulae alvus includeret, precamur supplices, ut, de quibus et pro quibus suscepisti membra mortalia, intercedente beata Maria genitrice tua, capere facias, devicta saeculi ambitione, victoriam.
1547	Deus qui dum ... ardua consequamur.
	Deus, qui, dum subsellia deitatis adscendis, observare nos pacem evangelica auctoritate non desinis docere, da nobis placidus pacem tuam, ut, dum discordiae prona refugimus, caeli ardua consequamur.
1548	Deus qui ecclesiae ... habere intercessorem.
	Deus, qui ecclesiae tuae beatum Iulianum mirabilem tribuisti doctorem, concede propitius, ut hunc apud te pium mereamur semper habere intercessorem.
1549	Deus qui ecclesiae ... fiat sacrificium.
	Deus, qui ecclesiae tuae filiis assistentium tibi ministrorum dignaris largiri solatium, eorum, quaesumus, meritis suffragantibus, tibi nostrum acceptabile servitium et placabile fiat sacrificium.
1550a	Deus qui ecclesiae ... iugiter secura.
	Deus, qui ecclesiae tuae gloriosi protomartyris tui Stephani non defraudasti artus, da, ut eius supplicatione fiat tibi semper devota et meritis iugiter secura.
1550b	Deus qui ecclesiam ... iugiter secura.
	Deus, qui ecclesiam tuam protomartyris tui Stephani glorificare de inventis dignatus es artubus, da, ut eius supplicatione fiat semper devota et meritis iugiter secura.
1550c	Deus qui ecclesiam ... experiatur auxilio.
	Deus, qui ecclesiam tuam gloriosi protomartyris tui Stephani non defraudasti artus, da, quaesumus, ut eius supplicatione fiat tibi semper devota nostrae mentis intentio et iugi experiatur auxilio.
1551	Deus qui ecclesiae ... interventione secura.
	Deus, qui ecclesiae tuae in sanctis montibus fundamenta posuisti, da, ut nullis errorum subruatur incursibus, nulla mundi perturbatione quatiatur sed apostolica semper et institutione sit firma et interventione secura.
1552	Deus qui ecclesiae ... temptatione sordescant.
	Deus, qui ecclesiae tuae vocibus in tympano laudaris, praesta supplicantibus nobis, ut ieiunia nostra, quae pro remediis peccatorum aguntur, pacis bono permisceantur, ut utriusque rei virtute sic animae nostrae ad meliora proficiant, ne ullo modo vanae gloriae a temptatione sordescant.
1553a	Deus qui ecclesiam ... habere mereamur.
	Deus, qui ecclesiam tuam annua beati Quintini martyris tui sollemnitate laetificas, concede propitius, ut, qui memoriam illius digna servitute veneramur, intercessorem eum semper apud te habere mereamur.
1553b	Deus qui ecclesiam ... in caelis.
	Deus, qui ecclesiam tuam meritis et orationibus pretiosissimi Quintini martyris tui mirifico splendore clarificas, concede propitius, ut, qui memoriam illius veneramur in terris, intercessorem apud te mereamur habere in caelis.
1554	Deus qui ecclesiam ... operibus exsequatur.
	Deus, qui ecclesiam tuam annua quadragesimali observatione purificas, praesta familiae tuae, ut, quod a te obtinere abstinendo nititur, hoc bonis operibus exsequatur.
1555	Deus qui ecclesiam ... adunari consortio.
	Deus, qui ecclesiam tuam annua sanctorum martyrum tuorum Maximiani, Malchi et Martiniani sociorumque eorum sollemnitate laetificas, concede propitius, ut, sicut, in illorum dormitione te mirabilem praedicantes, tua magnalia temporali celebramus officio, sic in caelesti regione eorum perpetuo mereamur adunari consortio.
1556	Deus qui ecclesiam ... remuneratione ditentur.
	Deus, qui ecclesiam tuam apostoli tui Petri fide et nomine consecrasti quique beatum illi Paulum ad praedicandum gentibus gloriam tuam sociare dignatus es, concede, ut omnes, qui ad apostolorum tuorum sollemnia convenerunt, spiritali remuneratione ditentur.
1557	Deus qui ecclesiam ... foveatur auxiliis.
	Deus, qui ecclesiam tuam apostolicis voluisti constare doctrinis, concede propitius, ut intercessione beati Theodori confessoris tui atque pontificis et virtutum semper proficiat incrementis et sempiternis foveatur auxiliis.
1558	Deus qui ecclesiam ... sumpsit exordium.
	Deus, qui ecclesiam tuam apostolorum tuorum Petri et Pauli praedicatione docuisti, da nobis, quaesumus, in omnibus eorum sequi praeceptum, per quos religionis sumpsit exordium.
1559	Deus qui ecclesiam ... proficiat incrementis.
	Deus, qui ecclesiam tuam beati dominici confessoris tui illuminare dignatus es meritis et exemplis, concede, ut eius intercessione temporalibus non destituatur auxiliis et spiritualibus semper proficiat incrementis.
1560	Deus qui ecclesiam ... beneficiis gratulari.
	Deus, qui ecclesiam tuam beati illius apostoli tui praedicatione docuisti et martyrio coronasti, concede fidelibus tuis eius semper meritis adiuvari et beneficiis gratulari.
1561	Deus qui ecclesiam ... participatione gaudere.
	Deus, qui ecclesiam tuam beati Francisci meritis fetu novae prolis amplificas, tribue nobis ex eius imitatione terrena despicere et caelestium donorum semper participatione gaudere.
1562	Deus qui ecclesiam ... imitatione complere.
	Deus, qui ecclesiam tuam beati Thomae de Aquino confessoris tui mira eruditione clarificas et sancta operatione fecundas, da nobis, quaesumus, et, quae docuit, intellectu conspicere et, quae egit, imitatione complere.
1563	Deus qui ecclesiam ... conservare digneris.
	Deus, qui ecclesiam tuam catholicam, quam tuo sancto sanguine redemisti, numquam derelinquis nobisque indignis, in eandem concurrentibus, criminum indulgentiam placatus concedis et qui latronis, tecum in cruce pendentis, confessionem iustificare dignatus es, quaesumus, ut omnium in te credentium fidem augeas, multiplices et solita pietate pacem, quam custodiri iussisti, illibatam in nobis conservare digneris.
1564a	Deus qui ecclesiam ... crediderunt promissis.
	Deus, qui ecclesiam tuam evangelicae exhortatione doctrinae, quae sursum sunt, iubes sapere et ad eam se altitudinem, ad quam salvator mundi conscendit, erigere, da supplicibus tuis subsequi intellectu, quod multi viderunt conspectu, ut in secundo mediatoris adventu ditentur donis, qui tuis crediderunt promissis.
1564b	Deus qui ecclesiam ... promissis crediderunt.
	Deus, qui ecclesiam tuam evangelicae doctrinae exhortatione, quae sursum sunt, iubes sapere et ad eandem se altitudinem, ad quam mundi salvator adscendit, erigere, da populis tuis intellectu capere, quod multi viderunt conspectu, ut in secundo mediatoris adventu ditentur donis, qui promissis crediderunt.
1565	Deus qui ecclesiam ... perfrui claritate.
	Deus, qui ecclesiam tuam eximii confessoris tui atque pontificis Martialis hodierna tribuis sollemnitate gaudere, eius, quaesumus, ita nos exemplis salutaribus instrue, ut sempiternae cum eo beatitudinis mereamur feliciter perfrui claritate.
1566	Deus qui ecclesiam ... transferri mereamur.
	Deus, qui ecclesiam tuam gloriosa beati Thomae confessoris tui atque pontificis translatione glorificas, praesta, quaesumus, ut, eius meritis et intercessione de sepulcro vitiorum sublevati, ad aeternam resurrectionis gloriam transferri mereamur.
1567	Deus qui ecclesiam ... agminibus sociari.
	Deus, qui ecclesiam tuam in beati pontificis tui Thomae angelica puritate et virtutum gloria decorasti, concede nobis famulis tuis, ut, eius suffragantibus meritis, angelorum cum ipso mereamur agminibus sociari.
1568	Deus qui ecclesiam ... voluntate concordet.
	Deus, qui ecclesiam tuam in dilectione tuae divinitatis et proximi cuncta servare caelestia mandata docuisti, da nobis spiritum pacis et gratiae, ut universa familia tua et toto tibi sit corde devota et pura sibi voluntate concordet.
1569	Deus qui ecclesiam ... reparetur interius.
	Deus, qui ecclesiam tuam, ineffabili pretio redemptam, semper mirificis reficis sacramentis, concede propitius, ut, quae de malorum percussionibus gemit exterius, tuis iugiter consolationibus reparetur interius.
1570	Deus qui ecclesiam ... devota suffragium.
	Deus, qui ecclesiam tuam innumeris sanctorum patrociniis et glorificas et tueris, praesta, ut, quorum celebrat conventum, experiatur devota suffragium.
1571	Deus qui ecclesiam ... propitius unitati.
	Deus, qui ecclesiam tuam inter adversa crescere voluisti, molientium contra eam prosterne superbiam et veritatis tuae subiuga propitius unitati.
1572	Deus qui ecclesiam ... gloriam pervenire.
	Deus, qui ecclesiam tuam meritis beati Richardi confessoris tui atque pontificis fecisti miraculis coruscare gloriosis, concede nos famulos tuos ipsius intercessione ad aeternae beatitudinis gloriam pervenire.
1573	Deus qui ecclesiam ... munere glorietur.
	Deus, qui ecclesiam tuam nova semper prole fecundas, auge eam cottidie credentium puritate et divinae gratiae infusione multiplica, ut, repulsa impugnatione malorum omnium, in tranquillitate pacis et fidei, tuo semper ditata munere, glorietur.
1574	Deus qui ecclesiam ... fide perceperunt.
	Deus, qui ecclesiam tuam novo semper foetu multiplicas, concede famulis tuis, ut sacramentum vivendo teneant, quod fide perceperunt.
1575	Deus qui ecclesiam ... precibus sublevemur.
	Deus, qui ecclesiam tuam sanctorum tuorum praesidiis semper propitius intendis, praesta, quaesumus, ut, qui beati Polycarpi martyris tui atque pontificis sollemnia celebramus, eius precibus sublevemur.
1576	Deus qui ecclesiam ... pervenire mereatur.
	Deus, qui ecclesiam tuam sponsam vocare dignatus es, ut, quae haberet gratiam per fidei devotionem, haberet etiam ex nomine pietatem, da, ut omnis haec plebs, nomini tuo serviens, huius vocabuli consortio digna esse mereatur et ecclesia tua, in templo, cuius natalis est hodie, tibi collecta, te timeat, te diligat, te sequatur, ut, dum iugiter per vestigia tua graditur, ad caelestia promissa, te ducente, pervenire mereatur.
1577	Deus qui ecclesiastici ... esse potestas.
	Deus, qui ecclesiastici regiminis fundamentum in beati Petri principis apostolorum cathedra constituere voluisti, praesta supplicum tuorum precibus, ut eius meritis a peccatorum nexibus liberemur, cui ligandi atque solvendi data creditur esse potestas.
1578	Deus qui effundentia ... adiuvante laetari.
	Deus, qui effundentia martyris tui Cucufati viscera, ob rabiem persecutoris pro nomine tuo dimicantis, introrsus constabiliri iussisti et ob hoc fidei gratiam populis condonasti, praesta nobis ita amorem tuae dulcedinis interius exteriusque fructificare, ut cum eis post huius vitae excursum mereamur, te adiuvante, laetari.
1579	Deus qui Elphegum ... perfruamur aeterna.
	Deus, qui Elphegum summum praesulem populo praefecisti Anglorum, ut caelestis sanctuarii minister fieret et martyr, praesta, quaesumus, ut, illius auxilio et a peccatis liberi et ab hoste securi, tua pace perfruamur aeterna.
1580	Deus qui elisos ... sociare digneris.
	Deus, qui elisos erigis et humilibus das gratiam, qui desperatos revocas et in peccatis labentes conservas, praesta, clementissime pater, fragilitati meae emundationem; non meis meritis te deprecor sed misericordiam tuam supplico, ut paenitentem suscipias et peccata dimittas et, antequam de hac vita discedam, puriorem me esse cognoscas et vulneribus, quae omnibus abscondo, cottidie manifesta medicamenta concedas et sacrificium, quod indignus offero, dignum tibi esse disponas et in futuro una cum famulis tuis, tibi placentibus, me sine querela sociare digneris.
1581	Deus qui emortuam ... donaveris benedicas.
	Deus, qui emortuam vulvam Sarae ita per Abrahae semen fecundare dignatus es, ut ei etiam contra spem suboles nasceretur, preces famulae tuae illius, pro sua sterilitate deprecantis, propitius respice, ut ei iuxta tenorem praecedentium patrum et fecunditatem tribuas et filium, quem donaveris, benedicas.
1582	Deus qui errantibus ... apta sectari.
	Deus, qui errantibus, ut in viam possint redire iustitiae, veritatis tuae lumen ostendis, da cunctis, qui christiana professione censentur, et illa respuere, quae huic inimica sunt nomini, et ea, quae sunt apta, sectari.
1583	Deus qui errata ... valeat famulari.
	Deus, qui errata corrigis et dispersa congregas et congregata conservas, quaesumus, super populum christianum tuae unionis gratiam clementer infunde, ut, divisione reiecta, vero pastori ecclesiae tuae se uniens, tibi digne valeat famulari.
1584	Deus qui es ... latitudinem introire.
	Deus, qui es collator dignitatum, attributor bonorum et sanctificatio sacerdotum, quo accinctus ac roboratus, Babilas sacerdos tuus ecclesiam tuam, quam tuendam acceperat, exemplo erigit, doctrinis erudit aditumque domus tuae Numeriano, locum sanctum calcare volenti, eximius palestra repugnaturus, obstrusit, quo per hoc subiecto gregi obseratis ianuis maneret tuta custodia, per quod a divinis foribus persequentis foret potestas eliminata, assiste precibus supplicantis familiae tuae, ut martyris tui prece inimici suggestio introeundi in nostris cordibus non habeat facultatem, quo, securi intra sinum sanctae ecclesiae residentes, ita claustris dominicis habeamur muniti, ut correctis nobis non pateat ulterius via errandi, quatenus, per angustum gradientes iustitiae callem, regionis aeternae mereamur latitudinem introire.
1585	Deus qui es ... largire subsidium.
	Deus, qui es corona virginum et tuorum gloria sanctorum, ecclesiae tuae supplicanti praesta benignus auditum et, beatae Katerinae intervenientibus meritis, vitae praesentis et aeternae largire subsidium.
1586a	Deus qui es ... dignetur spiritus sanctus.
	Deus, qui es ductor sanctorum et dirigis itinera iustorum, dirige angelum pacis nobiscum, qui nos ad locum destinatum perducat, ut procul sit a nobis malignorum accessus et comes nobis adesse dignetur spiritus sanctus.
1586b	Deus qui es ... esse spiritus sanctus.
	Deus, qui es gloria sanctorum et dirigis viam iustorum, dirige angelum pacis cum famulis tuis, qui eos ad locum, quo pergunt, cum iucunditate, prosperitate et pace sine impedimento animae et corporis ducat et reducat; eisque non possint nocere antiqui hostis insultus; procul sit ab eis omnium malorum accessus et comes eorum dignetur esse spiritus sanctus.
1587	Deus qui es ... vitae repromissos.
	Deus, qui es gloria confessurum splendorque sanctarum animarum, vota nostra placatus suscipe et confessoris tui Pauli meritis ab omni perturbatione fac nos permanere illaesos atque pervenire ad honores aeternae vitae repromissos.
1588	Deus qui es ... sit devota.
	Deus, qui es gloriosus in gloria sanctorum et cunctis, ad eorum patrocinia confugientibus, suae petitionis salutarem praestas effectum, concede plebi tuae, ut, intercedente beato Rocho confessore tuo, quae in eius celebritate se devota exhibet, languore epidemiae, quam in suo corpore pro tui nominis gloria passus est, sit liberata et tuo nomini semper sit devota.
1589a	Deus qui es ... gratiam tuam.
	Deus, qui es initium et finis, concede misericordiam tuam famulo tuo illi, ut sub ope dexterae tuae eum ubique protegas et tuae pietatis consolationem impendas, et auge illi felicitatis tempora ac tribue ei gratiam tuam.
1589b	Deus qui es ... misericordiae tuae.
	Deus, qui es initium et finis, da protectionem famulo tuo illi, pro quo tibi in honorem sancti archangeli Michaelis votorum munera offerimus, ut sub ope dexterae tuae ubique protegatur; mitte ei auxilium de sancto et de Sion tuere eum et auge illi feliciter tempora longaeva; sicut regi Ezechiae, in discrimine posito, ter quinos annos auxisti vitae, ita tribue, domine, gratiam tuam et dele chirographum peccatorum suorum per donum misericordiae tuae.
1589c	Deus qui es ... tuae deleatur.
	Deus, qui es initium et finis, da salutem animae famuli tui illius, pro quo tibi preces indigni fundere ausi sumus, et mitte ei auxilium de sancto et de Sion tuere eum, ut sub ope dexterae tuae protegatur, et chirographum peccatorum eius dono misericordiae tuae deleatur.
1590	Deus qui es ... praemia pervenire.
	Deus, qui es iustorum gloria et misericordia peccatorum, da famulis tuis plenam indulgentiae veniam et paenitentiae locum exoratus indulge, ut, qui praeterita peccata deplorant, futura mala non sentiant neque iam ulterius lugenda committant; dimitte eis, domine, omnia crimina et in semitis tuis iustitiae placitos restaura, ut securi mereantur deinceps benemeritis currere et ad pacis aeternae praemia pervenire.
1591	Deus qui es ... fine possideat.
	Deus, qui es iustorum gloria et misericordia peccatorum, pietatem tuam humili prece deposcimus, ut famulum tuum illum benignus respicias et pietatis tuae custodiam impendas, ut ex toto corde et ex tota mente tibi deserviat et sub tua semper protectione consistat, ut, quando ei extrema venerit dies, societatem sanctorum percipiat et inenarrabilem gloriam sine fine possideat.
1592	Deus qui es ... feliciter sociati.
	Deus, qui es iustus iustorum et pastor piissimus animarum, qui Iustum et Pastorem innocentes in regno tuo martyres suscepisti, tribue nobis innocentiam tenere, dum vivimus, et iustitiam custodire, dum iudicamus, ut, etiam defuncti, in consortio sanctorum tuorum sine fine vivamus, quatenus, eorum vestigiis inhaerentes, non ab illis per mala opera efficiamur exteri, qui te confitendo propter te mortui tibique sunt feliciter sociati.
1592bis	Deus qui es ... fine consortes.
	Deus, qui es iustus iustorum et pastor piissimus animarum, qui Iustum et Pastorem innocentes in regno tuo martyres suscepisti, tribue nobis innocentiam tenere, dum vivimus, et iustitiam custodire, dum iudicamus, ut, etiam defuncti, in consortio sanctorum tuorum sine fine vivamus, quatenus, eorum vestigiis inhaerentes, non ab illis per mala opera efficiamur exteri, qui te confitendo propter te mortui tibique sunt feliciter sociati. Ea fides te nobis reddat propitium, quae illos gloriose provexit ad regnum. Illi tuam contemplantur cottidie gloriam; nos flagitamus per momenta misericordiam. Illis collata est post mortem victoria; nobis eorum interventu donetur facinorum indulgentia, ut, qui illos amicitiae tuae fecisti participes, nos indignos eorum gaudiis efficias sine fine consortes.
1593	Deus qui es ... quos coronas.
	Deus, qui es mirabilis in operibus, iustus in iudiciis, largus in donis, multiplica super nos misericordiam tuam et, quia tu nobis es bonorum causa meritorum, custodi, quod tribuis, ut invenias, quos coronas.
1594	Deus qui es ... protectione securi.
	Deus, qui es mundi creator et rector, da nobis in hac die incarnationis Verbi tui et partus sacrae Mariae virginis pium celebrare consortium, ut, qui per tuam gratiam sunt redempti, tua sint protectione securi.
1595a	Deus qui es ... auxiliante exercuit.
	Deus, qui es omnium sanctorum inseparabilis fortitudo, qui inter mundanae conversationis adversa feminarum nos maxime exemplis consolaris et inter praecipua exempla institutionis vel constantiae beatae Radegundis nos consummatione gloriosa, quam hodie celebramus, accendis, excita, domine, in ecclesia tua illum spiritum, cui ista servivit, ut Studeamus diligere, quod amavit, et opere exercere, quod ipsa in femineo fragilique corpore, te auxiliante, exercuit.
1595b	Domine deus fidelium ... tui indesinenter accendis excita domine in ecclesia tua spiritum cui ille servivit ut studeamus diligere quod amavit et opera exercere
	Domine deus, fidelium insuperabilis fortitudo, qui inter mundanae conversationis adversa sanctorum nos maxime glorificatione solaris <et ad sublimia exempla patientiae triumpho nos sancti> tui indesinenter accendis, excita, domine, in ecclesia tua spiritum, cui ille servivit, ut studeamus diligere, quod amavit, et opera exercere, quod docuit.
1596a	Deus qui es omnium sanctorum tuorum splendor mirabilis quique hunc diem beatorum apostolorum ... meritis adiuvemur.
	Deus, qui es omnium sanctorum tuorum splendor mirabilis quique hunc diem beatorum apostolorum Philippi et Iacobi martyrio consecrasti, da ecclesiae tuae de natalicio tantae festivitatis laetari, ut apud misericordiam tuam et exemplis eorum et meritis adiuvemur.
1596b	Deus qui es ... adiuvemur et meritis.
	Deus, qui es omnium sanctorum tuorum splendor mirabilis quique hunc diem beati apostoli tui illius martyrio consecrasti, da ecclesiae tuae de natalicia tanti pontificis festivitate laetari, ut apud misericordiam tuam et exemplis eius adiuvemur et meritis.
1596c	Deus qui es omnium sanctorum tuorum splendor mirabilis quique hunc diem in honorem ... meritis adiuvemur.
	Deus, qui es omnium sanctorum tuorum splendor mirabilis quique hunc diem in honorem beatorum Mauricii, Exsuperii, Candidi, Victoris, Innocentii et Vitalis cum sociis eorum martyrio consecrasti, da ecclesiae tuae de natalicio tantae festivitatis laetari, ut apud misericordiam tuam exemplis eorum et meritis adiuvemur.
1596d	Deus qui es ... intercessionibus adiuvetur.
	Deus, qui es omnium sanctorum tuorum splendor mirabilis quique hunc diem beati apostoli tui illius martyrio consecrasti, da ecclesiae tuae de natalicio tantae festivitatis laetari, ut, quae apostolorum tuorum praedicatione floruit, eorum exemplis muniatur et intercessionibus adiuvetur.
1596e	Deus qui es ... religionis exordium.
	Deus, qui es omnium sanctorum tuorum splendor mirabilis quique hunc diem beatorum apostolorum tuorum martyrio consecrasti, da ecclesiae tuae eorum in omnibus sequi praeceptum, per quos sumpsit religionis exordium.
1596f	Deus qui es omnium ... eius et meritis adiuvemur.
	Deus, qui es omnium sanctorum tuorum splendor mirabilis quique hunc diem beati Andreae martyrio consecrasti, da ecclesiae tuae de natalicia tanti apostoli tui festivitate laetari, ut apud misericordiam tuam et exemplis eius et meritis adiuvemur.
1597	Deus qui es ... reconciliationem attribuat.
	Deus, qui es pax omnium et concordia vera fidelium, praesta, ut, quos discissio caritatis fraudavit ab invicem, dilectio perfecta reconciliationem attribuat.
1598	Deus qui es ... internaque sanctifices.
	Deus, qui es sanctificator oblationum et substentatio abstinentium, tu benedictione gratiae tuae et appositum tibi sacrificium sanctifica et ieiunantium pectora ab omni contagione delictorum emunda, quo, haec oblata uberius benedicens, horum perceptione inediam nostrae debilitationis sustentes internaque sanctifices.
1599	Deus qui es ... vincentibus largiaris.
	Deus, qui es sanctorum tuorum firmitate mirabilis, ostende nobis misericordiam tuam et, quia humilitas servientium tibi semper est temptationibus obiecta, tribue dimicantibus fortitudinem, ut coronam vincentibus largiaris.
1600	Deus qui es ... perfrui sempiterna.
	Deus, qui es sanctorum tuorum splendor mirabilis atque lapsorum sublevator inenarrabilis, fac nos famulos tuos sanctae dei genitricis semperque virginis Mariae et omnium sanctorum tuorum ubique tueri praesidiis necnon familiaritate atque consanguinitate nobis coniunctis et omni populo christiano, cunctis insidiis fallacis inimici depulsis, concede ad caelestem patriam redeundi aditum ac defunctorum omnium fidelium, sacri baptismatis unda renatorum, animabus quiete perfrui sempiterna.
1601a	Deus qui es sanctorum tuorum splendor mirabilis qui hunc diem ... et meritis.
	Deus, qui es sanctorum tuorum splendor mirabilis, qui hunc diem beati Andreae martyrio consecrasti, da ecclesiae tuae de eius natalicia semper gaudere, ut apud misericordiam tuam exemplis eius protegamur et meritis.
1601b	Deus qui es sanctorum tuorum splendor mirabilis quique hunc diem ... et meritis.
	Deus, qui es sanctorum tuorum splendor mirabilis quique hunc diem in beati Germani confessoris tui atque pontificis depositione consecrasti, da ecclesiae tuae de eius natalicio semper gaudere, ut apud misericordiam tuam exemplis eius protegamur et meritis.
1602	Deus qui es ... societate gaudere.
	Deus, qui es sanctorum tuorum splendor mirabilis quique hodierna die beati Stephani protomartyris tui sanctorumque Nicodemi, Gamalielis atque Abibon venerandas reliquias revelasti, da nobis in aeterna laetitia de eorum societate gaudere.
1603	Deus qui es ... evasisse periculum.
	Deus, qui es temporalis vitae administrator, aeternae quoque auctor atque largitor, miserere supplici regi nostro illi, in tua protectione et defensione fidenti, ut, per virtutem brachii tui omnibus sibi adversantibus superatis, gaudeat se evasisse periculum.
1604	Deus qui es ... periculo transeamus.
	Deus, qui es tuorum antistitum potentissimus illustrator, tribue, quaesumus, ut, beatissimi sacerdotis et confessoris tui Syri magnificis exemplis informati, saeculi istius caliginem sine periculo transeamus.
1605	Deus qui es ... sentiamus intercessorem.
	Deus, qui es tuorum corona fidelium, beati Pontii martyris tui nobis indefessum tribue patrocinium, ut, quem terreni ordinis curia habuit praedicatorem, ipsum apud te continuum habere sentiamus intercessorem.
1606	Deus qui es ... promissionis aeternae.
	Deus, qui es unitas sancta et Trinitas indivisa, adauge in nobis fidei donum et beatae caritatis affectum, quo, utroque a te ditati ex munere, heredes efficiamur promissionis aeternae.
1607	Deus qui es ... perpetua liberentur.
	Deus, qui es vita indeficiens et salus aeterna, exaudi nos clemens et propitius, ut, qui ad beatissimi apostoli tui Matthiae festivitatem conveniunt, eius interventu a morte perpetua liberentur.
1608	Deus qui et feminas ... gratiae consequamur.
	Deus, qui et feminas virtute castitatis armatas victrici martyrio coronasti, praesta, ut beatae Euphemiae virginis et martyris tuae precibus, cuius festa veneramur, dona tuae gratiae consequamur. Deus, qui et iustis praemia meritorum et peccatoribus per ieiunium veniam praebes, miserere supplicibus tuis, ut reatus nostri confessio indulgentiam valeat percipere delictorum. ( . )
1609	Deus qui et ... incolumitate gaudere.
	Deus, qui et libertatis nostrae auctor es et salutis, exaudi supplicantium voces atque eis, quos sanguinis tui effusione redemisti, praesta, ut per te vivere et perpetua in te facias incolumitate gaudere.
1610	Deus qui ex ... meritis adiuvemur.
	Deus, qui ex omni coaptatione sanctorum aeternum tibi condis habitaculum, da aedificationis tuae incrementa caelestia, ut, quorum hic reliquias pio amore complectimur, eorum semper meritis adiuvemur.
1611	Deus qui ex ... in caelis.
	Deus, qui ex Thebaeae legionis ordine gloriosos etiam martyres Gereonem, Victorem, Cassium atque Florentium sociosque eorum hodierna die sanguinis sui coronasti effusione, praesta, quaesumus, ut, quos exsultamus habere patronos in terris, eorum apud te iugem sentiamus interventum in caelis.
1612	Deus qui eximiae ... in caelis.
	Deus, qui eximiae castitatis privilegio famulam tuam Cuthburgam multipliciter decorasti, da nobis famulis tuis, eius promerente intercessione, utriusque vitae prosperitatem, ut, sicut eius festivitas nobiscum agitur in terris, ita per eius interventum nostri memoria apud te semper habeatur in caelis.
1613	Deus qui eximium ... adversitate custodias.
	Deus, qui eximium praeconii tui sacerdotem Grimbaldum hodierna die caelorum regna penetrare fecisti, vota nostra miseratus admitte, ut nos, a peccatorum nostrorum vinculis absolutos, illius pia intercessione ab omni semper adversitate custodias.
1614	Deus qui eximium ... habere intercessorem.
	Deus, qui eximium veritatis tuae praeconem beatum pontificem Dunstanum sanctorum tuorum meritis aequalem gloriosis ostendis miraculis, praesta, quaesumus, ut, quem nobis in terra donasti doctorem, in caelo facias habere intercessorem.
1615	Deus qui exorante ... introire mereamur.
	Deus, qui, exorante apostolo tuo Bartholomaeo, daemoni praecepisti suum funditus diruere simulacrum, peccatorum imagines a nostris mentibus, quaesumus, expelle propitius, ut, eius precibus emundati, regni tui ianuam gaudenter introire mereamur.
1616	Deus qui exuberantem ... quo vivamus.
	Deus, qui exuberantem fontem misericordiae tardus ad vindicta, celeriter ad veniam quem peccatorum nostrorum non ignorantia revocat sed patientiam clementer exspectat, concede propitius a nobis te, intellectum, diligi, dilectum, irreprehensibiliter imitari, ut, vitantes, quo morimur, valeamus accedere, te praevio, quo vivamus.
1617	Deus qui facturae ... praesta medicinam.
	Deus, qui facturae tuae pio semper dominaris affectu, inclina aurem tuam supplicationibus nostris et famulum tuum illum, ex adversa valetudine corporis laborantem, placidus respice et visita in salutari tuo et caelestis gratiae praesta medicinam.
1618	Deus qui famulantibus ... iniquitatibus liberentur.
	Deus, qui famulantibus tibi mentis et corporis subsidia misericorditer largiris, praesta, quaesumus, ut hi, qui pro amore supernae patriae ardenter caelestia praemia per fidem et spem caritatemque adipisci cupiunt, intercedente beato archimandrita consessore tuo Germano, ab omnibus iniquitatibus liberentur.
1619	Deus qui famulis ... tuae fundamus.
	Deus, qui famulis tuis Moysi, Samuel et Stephano protomartyri virtutem patientiae dedisti, ut pro suorum delictis inimicorum aequanimiter exorarent, da nobis, quaesumus omnium meritis sanctorum, ut inimicos nostros verae dilectionis amore diligamus eorumque pro excessibus tota mentis intentione preces assiduas in conspectu maiestatis tuae fundamus.
1620	Deus qui famulo ... ad salutem.
	Deus, qui famulo tuo Ezechiae ter quinos annos ad vitam donasti, ita et famulum tuum illum a lecto aegritudinis tua potentia erigat ad salutem.
1621	Deus qui famulo ... mereatur consortium.
	Deus, qui famulo tuo illi tuae dedisti fidei coniunctionem, concede, ut per temporalem corporis incommoditatem ad supernorum civium pertingere mereatur consortium.
1622	Deus qui famulum ... optabilem laetitiam.
	Deus, qui famulum tuum Aegidium misericordem fecisti intercessorem pro peccatis omnium, da nobis interventu ipsius nostrorum veniam peccatorum et aeternae beatitudinis optabilem laetitiam.
1623	Deus qui famulum ... recedat exemplis.
	Deus, qui famulum tuum illum sacerdotem atque abbatem et sanctificasti unctione misericordiae et assumpsisti consummatione felici, suscipe propitius preces nostras et praesta, ut, sicut ille tecum est meritis, ita a nobis non recedat exemplis.
1624	Deus qui famulum ... postulat confirmetur.
	Deus, qui famulum tuum Isaac, pro sterilitate coniugii sui te deprecantem, exaudire et conceptum Rebeccae donare dignatus es, preces famulae tuae illius pro percipienda prole benignus exaudi, ut firmamentum spei, quod in tua misericordia posuit, ei ex percepto munere, quod postulat, confirmetur.
1625	Deus qui famulum ... esse mereatur.
	Deus, qui famulum tuum pontificem nostrum pastorem ecclesiae tuae praeesse voluisti, praesta, quaesumus, ut, quod humana voce dicitur, in tuis oculis esse mereatur.
1626	Deus qui ferventis ... impertias medicinam.
	Deus, qui ferventis supplicium plumbi, ante oculos illatum Eulaliae virginis tuae, frigidum effecisti, tu e caelis ignem illum tui amoris emitte, qui numquam novit frigescere, quo et hanc, in honorem martyris tuae oblatam, tibi sanctifices hostiam et cordibus nostris consequentis gratiae spiritalem impertias medicinam.
1627	Deus qui fidei ... esse consortes.
	Deus, qui fidei sacramenta in unigeniti tui gloriosa transfiguratione patrum testimonio roborasti et adoptionem filiorum perfectam, voce delapsa in nube lucida, praesignasti, concede propitius, ut ipsius regis gloriae nos coheredes efficias et eiusdem gloriae tribuas esse consortes.
1628	Deus qui fideles ... populus amplietur.
	Deus, qui fideles semper adiuvas populos et regeneratos tibi consectas parvulos, inchoatas in hoc populo perfice sanitates, repellendo adversarias potestates, ut virtute huius sacrificii, dum superbus inimicus eliditur, resurrectionis tuae celebritate adoptivus in pace populus amplietur.
1629	Deus qui fideles ... exsultet ecclesia.
	Deus, qui fideles tuos ad hoc corripis, ut emendes, populum tuum, quaesumus, ne despicias supplicantem, ut tuae virtutis auxilio, omni hostilitate depulsa, et securitas huius regni laetetur et catholica semper exsultet ecclesia.
1630	Deus qui fideles ... gaudia promereri.
	Deus, qui fideles tuos gloriosa beatae virginis tuae Milburgae festivitate laetificas, fac nos per ipsius merita vitae utriusque gaudia promereri.
1631	Deus qui fidelibus ... percipiamus felicitatem.
	Deus, qui fidelibus tuis castitatis exemplum praebuisti, dum de virgine filium tuum dominum nostrum nasci voluisti, sanctae Edithae virginis tuae precibus nobis mentis et corporis tribue puritatem, per quam a te nobis promissam percipiamus felicitatem.
1632	Deus qui fidelium ... laqueis resipiscant.
	Deus, qui fidelium devotione laetaris, populum tuum, quaesumus, sanctis tuis fac esse devotum, ut, qui ab eorum officio impia pravitate mentis abscedunt, per tuam conversi gratiam, diaboli, quibus capti tenentur, laqueis resipiscant.
1633	Deus qui fidelium ... sunt gaudia.
	Deus, qui fidelium mentes unius efficis voluntatis, da populis tuis id amare, quod praecipis, id desiderare, quod promittis, ut inter mundanas varietates ibi nostra fixa sint corda, ubi vera sunt gaudia.
1634	Deus qui fidelium ... miseratione compone.
	Deus, qui fidelium pace laetaris, dona servientibus tibi pacem omnesque eorum actus, qui tibi servire cupiunt, placabili miseratione compone.
1635	Deus qui fidelium ... sentire parcentis.
	Deus, qui fidelium precibus flecteris et humilium confessione placaris, conversis ad te propitiare supplicibus et, quos fecisti iram intellegere castigantis, fac misericordiam sentire parcentis.
1636	Deus qui fidelium ... ad veram vis innocentiam pervenire fac nos per indulgentiam tuam illius participes sanctitatis quae nec sibi noxia nec cuiquam inveniatur
	Deus, qui fidelium tuorum <corda> ad veram vis innocentiam pervenire, fac nos per indulgentiam tuam illius participes sanctitatis, quae nec sibi noxia nec cuiquam inveniatur a versa.
1637	Deus qui fidelium ... et precibus.
	Deus, qui fidelium tuorum multitudinem annua sanctorum martyrum tuorum Dionysii, Rustici et Eleutherii festivitate laetificas, concede propitius, ut, quorum devote inventionem recolimus, eorum tibi meritis commendemur et precibus.
1638	Deus qui filium ... tribuat gaudium.
	Deus, qui filium tuum, pro nostra salute de sancta Maria virgine incarnatum, in hunc mundum misisti, quaesumus, ut huius oblationis mysterium, quod pro ipsius incarnationis sacramento tuae maiestati est oblatum, perpetuae salutis nobis tribuat gaudium.
1639	Deus qui frumenta ... quo pervenit.
	Deus, qui frumenta tui eloquii beatum pontificem tuum Gregorium esurientibus populis dispertire fecisti, concede tuis famulis toto mentis affectu servare, quod docuit, ut illuc quoque, eodem apud te obtinente, mereamur subsequi, quo pervenit.
1640	Deus qui fundasti ... conversatione caelestes.
	Deus, qui fundasti terram super stabilitatem suam, suscipe oblationes et preces populi tui ac, trementis terrae periculis penitus amotis, divinae tuae iracundiae terrores in humanae salutis remedia converte, ut, qui de terra sunt et in terram revertentur, gaudeant se fieri sancta conversatione caelestes.
1641	Deus qui fulgentibus ... adesse digneris.
	Deus, qui fulgentibus margaritis clarum lumen infers mundo, qui beato pontifici Zenoni aeternam in caelis coronam gloriae praeparasti, nobis quoque famulis tuis, adstantibus ante conspectum maiestatis tuae, adesse digneris.
1642	Deus qui gloriaris ... miserere nobis.
	Deus, qui gloriaris in sanctis tuis et in martyribus ecclesiae tuae fundamenta tua constituis a sanguine enim Abel iusti usque ad sanguinem Zachariae filii Barachiae cunctisque prophetis atque apostolis, vel nostris temporibus unus toto orbe praedicatis, ut, dum reliquias vel memoriam eorum veneramur, resurrectionem carnis omnibus approbemus, miserere nobis.
1643	Deus qui glorificaris ... adiuvari mereamur.
	Deus, qui glorificaris in concilio sanctorum martyrum tuorum illorum, respice ad preces humilitatis nostrae et, quorum sollemnia celebramus, eorum precibus adiuvari mereamur.
1644	Deus qui glorificaris ... requiem sempiternam.
	Deus, qui glorificaris in sanctis tuis et Macchabaeorum martyrum tuorum in te perficis gloriosos triumphos, quorum te mundo huic et vita praedicavit et passio quorumque confessioni tu, domine, aperuisti regna caelorum, pateant, quaesumus, supplicationibus nostris aures misericordiae tuae et eam nobis intercessione sanctorum concede fiduciam, ut ad promissiones tuas ipsorum veniamus suffragiis, quorum incitamur exemplis. Et, quia in hoc die congregatas cum Macchabaeorum triumphis victorias celebramus martyris tui Felicis, quaesumus, ut tam illorum suffragio quam istius patrocinio tuearis populum a periculis, patriam conserves in pace, eliminando hostem, conferendo quietem, donans tranquillam viventibus vitam et defunctis requiem sempiternam.
1645	Deus qui gloriosissimum ... iubilationis obtineant.
	Deus, qui gloriosissimum nomen domini nostri Iesu Christi unigeniti filii tui fecisti fidelibus tuis summo suavitatis affectu amabile et malignis spiritibus tremendum atque terribile, concede propitius, ut omnes, qui hoc nomen Iesu devote venerantur in terris, sanctae consolationis dulcedinem in praesenti percipiant et in futuro gaudium exsultationis et interminabilis iubilationis obtineant.
1646	Deus qui gloriosos ... est consequamur.
	Deus, qui gloriosos resurrectionis aeternae praecones septem dormientes magnifice coronasti, praesta, quaesumus, ut eorum precibus resurrectionem sanctam, quae in eis mirabiliter praeostensa est, consequamur.
1647	Deus qui gloriosus ... gloria incarnationis.
	Deus, qui gloriosus es in sanctis et humiliari voluisti in terris, martyrum tuorum prece benedictionem sanctificationis tuae his sacrificiis nostris appone, quo, dum ex his libaverimus, et martyrum subsidiis liberemur a culpis et tuae fulgeamus gloria incarnationis.
1648	Deus qui habitaculum ... consolatione percipiat.
	Deus, qui habitaculum tuum in corde pudico fundasti, respice super famulam tuam illam et, quae castigationibus assiduis postulat, tua consolatione percipiat.
1649	Deus qui hanc ... incendiis liberemur.
	Deus, qui hanc nobis diem beati illius martyris tui atque pontificis martyrio consecrasti, concede propitius, ut omnes, qui martyrii eius merita veneramur, intercessionibus eius ab aeternis gehennae incendiis liberemur.
1650	Deus qui hanc ... alimenta percipiant.
	Deus, qui hanc sacratissimam noctem gloria dominicae resurrectionis illustras, concede populo tuo, originalis delicti errore mundato, post sacratissimum fontem terram tuae promissionis intrare, ut dulcia sacramentorum tuorum alimenta percipiant.
1651	Deus qui hanc ... exhibeant servitutem.
	Deus, qui hanc sacratissimam noctem gloria dominicae resurrectionis illustras, conserva in nova familiae tuae progenie adoptionis spiritum, quem dedisti, ut, corpore et mente renovati, puram tibi exhibeant servitutem.
1652	Deus qui hanc ... verus sanguis.
	Deus, qui hanc sacratissimam noctem per beatae Mariae sacrae virginis partum, sine humana concupiscentia procreatum, veri luminis fecisti illustratione clarescere, da nobis, quaesumus, ut, cuius lucis mysterium in terra cognovimus, eius quoque gaudiis in caelo perfruamur. Ex his quoque sacris libaminibus odor ad te suavitatis adscendat atque in his benedictio a te copiosa descendat, ut per mysterium tuae operationis fiat nobis eucharistia legitima et verus sanguis.
1653	Deus qui hanc ... caelo perfruamur.
	Deus, qui hanc sacratissimam noctem veri luminis fecisti illustratione clarescere, da, quaesumus, ut, cuius lucis mysteria in terra cognovimus, eius quoque gaudiis in caelo perfruamur.
1654	Deus qui hanc ... consequi valeamus.
	Deus, qui hanc sacrosanctam diem pro festivitate beati Gregorii sollemniter nobis celebrandam contulisti, da, quaesumus, supplicibus tuis, ut, meritorum eius patrocinio defensi, et ab omnibus vitae huius periculis liberemur et futurae promissionis praemia consequi valeamus.
1655	Deus qui hanc ... sempiternis caelorum.
	Deus, qui hanc sollemnitatem beati Albani martyris tui populo concessisti Anglorum, eius meritis tribue nobis remissionem peccatorum et cum ipso fac perfrui nos gaudiis sempiternis caelorum.
1656	Deus qui hoc ... perseverantiae fortitudo.
	Deus, qui hoc nobis confers gratia, ut iusti ex impiis et beati efficiamur ex miseris, adesto operibus tuis, adesto muneribus, ut, quibus inest fidei iustificatio, non desit perseverantiae fortitudo.
1657	Deus qui hoc ... sequamur exemplo.
	Deus, qui hoc templum beatae Mariae semper virginis et beatorum apostolorum, martyrum, confessorum, virginum atque omnium simul sanctorum communi voluisti tibi honore dicari, praesta, quaesumus, ut, quorum hic recondita patrocinia debito veneramur obsequio, etiam piae conversationis sequamur exemplo.
1658	Deus qui hodie ... irradiamur exemplis.
	Deus, qui hodie beatae Teclae virginis nos annua sollemnitate laetificas, concede propitius, ut eius meritis adiuvemur, cuius castitatis irradiamur exemplis.
1659	Deus qui hodierna ... gaudia pervenire.
	Deus, qui hodierna die beatae Hildae virginis tuae animam ad ostendendum sanctitatis eius meritum inter agmina angelorum caelum penetrare fecisti, concede nobis ipsius meritis ita innocenter vivere, ut ad eadem mereamur gaudia pervenire.
1660	Deus qui hodierna ... adversitate defendi.
	Deus, qui hodierna die beatam sanctae Potentianae virginis tuae animam caelorum regna penetrare fecisti, concede propitius eius interventu nos a peccatorum nostrorum nexibus solvi et ab omni semper adversitate defendi.
1661	Deus qui hodierna ... confoveri suffragiis.
	Deus, qui hodierna die beatum Aegidium confessorem tuum atque abbatem aulam regni caelestis penetrare fecisti, tribue, quaesumus, ut, cuius devote gloriamur meritis, eius nos sentiamus confoveri suffragiis.
1662	Deus qui hodierna ... tuae consortio.
	Deus, qui hodierna die beatum Albanum martyrem tuum aeternae claritatis candore dealbasti, praesta, quaesumus, ut, venerandam eiusdem victoriam celebrando, digni efficiamur adoptionis tuae consortio.
1663	Deus qui hodierna ... adunari consortiis.
	Deus, qui hodierna die beatum Dunstanum archipraesulem ac confessorem tuum in regnum aeternae beatitudinis voluisti assumere, concede familiae tuae, ut, ipsius adiuvantibus meritis, sanctorum tuorum mereamur adunari consortiis.
1664	Deus qui hodierna ... interveniente consequamur.
	Deus, qui hodierna die beatum Leodegarium martyrem tuum atque pontificem gloria et honore coronasti, tribue nobis propitius, ut, qui gloriam non meremur, indulgentiam, ipso interveniente, consequamur.
1665	Deus qui hodierna ... nos salvifices.
	Deus, qui hodierna die beatum Petrum post te dedisti caput ecclesiae, cum te ille vere confessus sit et ipse a te digne praelatus sit, te supplices exoramus, ut, qui dedisti pastorem, ne quid de ovibus perderes, ut grex effugiat errores, eius intercessione, quem praefecisti, nos salvifices.
1666	Deus qui hodierna ... consolatione gaudere.
	Deus, qui hodierna die corda fidelium sancti spiritus illustratione docuisti, da nobis in eodem spiritu recta sapere et de eius semper consolatione gaudere.
1667	Deus qui hodierna ... adiungi mereamur.
	Deus, qui hodierna die gloriosa beati Marci evangelistae membra tuis famulis revelare dignatus es, concede propitius, ut, qui eius corporis translationem venerando colimus, ipsius beatitudini, te concedente, adiungi mereamur.
1668	Deus qui hodierna ... consistit origo.
	Deus, qui hodierna die in omnem terram tuorum verba apostolorum ob vocationem totius orbis exire fecisti, da nobis, quaesumus, fide et opere eorum servare vestigia, quorum doctrinis sanctae ecclesiae consistit origo.
1669	Deus qui hodierna ... adiuvando prosequere.
	Deus, qui hodierna die per unigenitum tuum aeternitatis nobis aditum, devicta morte, reserasti, vota nostra, quae praeveniendo adspiras, etiam adiuvando prosequere.
1670	Deus qui hodierna ... meruit sublevari.
	Deus, qui hodierna die pro incomparabilibus meritis gloriosissimam Mariam semperque virginem et matrem ad superna gaudia perduxisti, praesta illuc nos quoque tua pietate conscendere, quo ipsa meruit sublevari.
1671	Deus qui hodierna ... perducat misericordia.
	Deus, qui hodierna die sanctum Dunstanum archipraesulem ac confessorem tuum ad aeterna sublevasti gaudia, eius, quaesumus, meritis, illuc tua nos perducat misericordia.
1672	Deus qui hodierna ... pervenire mereamur.
	Deus, qui hodierna die sanctum Ioannem praeconem veritatis angelico concipiendum ministerio praevidisti, concede nobis famulis tuis, ut, qui eius insignia veneramur, ipsius meritis et ab instantibus inimicorum insidiis erui et ad viam veri luminis sine errore pervenire mereamur.
1673	Deus qui hodierna ... celsitudinis perducamur.
	Deus, qui hodierna die unigenitum tuum gentibus stella duce revelasti, concede propitius, ut, qui iam te ex fide cognovimus, usque ad contemplandam speciem tuae celsitudinis perducamur.
1674	Deus qui hodierna ... testatus es.
	Deus, qui hodierna die unigenitum tuum, mirabiliter transformatum, caelitus utriusque testamenti patribus revelasti, da nobis, quaesumus, beneplacitis tibi actibus ad eius semper contemplandam pertingere gloriam, in quo tuae paternitati optime complacuisse testatus es.
1675	Deus qui hodierna ... placere valeamus.
	Deus, qui hodierna die verbum tuum beatae virginis alvo coadunare voluisti, fac nos ita peragere, ut tibi placere valeamus.
1676	Deus qui hodiernae ... numquam excidamus.
	Deus, qui hodiernae diei iucunditatem in Iesu Christi et Mariae laudibus venerari fecisti, praesta, quaesumus, ut, qui eiusdem dei matris gaudiorum recordium celebramus, a piissimi filii tui et matris gratia numquam excidamus.
1677	Deus qui hodiernae ... in caelis.
	Deus, qui hodiernae festivitatis diem beati Udalrici confessoris tui atque pontificis transitu gloriosum fecisti, concede propitius sic tanti patroni atque doctoris merita venerari in terris, ut ipsius apud te patrocinia sentiamus in caelis.
1678	Deus qui hodiernam ... sumpsit exordium.
	Deus, qui hodiernam diem apostolorum tuorum Petri et Pauli martyrio consecrasti, da ecclesiae tuae eorum in omnibus sequi praeceptum, per quos religionis sumpsit exordium.
1679	Deus qui hodiernam ... gaudia consequamur.
	Deus, qui hodiernam diem beati confessoris tui Ethelwoldi episcopi transitu nobis honorabilem dedicasti, concede propitius, ut, cuius eruditione veritatis tuae luce perfundimur, eius intercessione caelestis vitae gaudia consequamur.
1680	Deus qui hodiernam ... gaudiis admisceri.
	Deus, qui hodiernam diem beati Mauri confessoris tui atque abbatis sacro transitu consecrasti, concede nobis propitius inoffensis per eius instituta gressibus pergere, ut eiusdem in regione viventium mereamur gaudiis admisceri.
1681	Deus qui hodiernam ... largiaris aeterna.
	Deus, qui hodiernam diem beatorum martyrum tuorum Gereonis, Victoris, Cassii atque Florentii sociorumque eorum tuis fidelibus venerandam praebuisti, praesta, quaesumus, ut, sicut eos, propriis exigentibus meritis, per triumphum martyrii ad superna caelorum transtulisti, ita nobis praemia largiaris aeterna.
1682	Deus qui hodiernam ... in terris.
	Deus, qui hodiernam diem beatorum martyrum tuorum illorum passione decorasti, praesta, quaesumus, ut eorum suffragia apud te sentiamus in caelis, quorum pio amore sollemnia veneramur in terris.
1683	Deus qui hodiernam ... muniatur suffragiis.
	Deus, qui hodiernam diem sacratissimam nobis beati illius confessoris tui atque pontificis sollemnitate tribuisti, adesto propitius ecclesiae tuae precibus, ut, cuius gloriatur meritis, muniatur suffragiis.
1684	Deus qui hodiernam ... adversitatibus liberari.
	Deus, qui hodiernam diem sanctorum tuorum Sergii et Bacchi martyrio consecrasti, da nobis natalicia votiva digne recolere et eorum suffragio ab omnibus adversitatibus liberari.
1685	Deus qui hodiernam ... sanctissima intercessione.
	Deus, qui hodiernam diem sanctorum tuorum Chrysantii et Dariae martyrio consecrasti, da nobis salutem mentis et corporis, ut et illorum passioni sit veneratio ex nostra devotione et nobis auxilium perveniat de eorum sanctissima intercessione.
1686	Deus qui hominem ... consortia mereantur.
	Deus, qui hominem, delapsum in mortem, conspiciens unigeniti tui adventu redimere voluisti, praesta, quaesumus, ut, qui eius gloriosam incarnationem fatentur, ipsius etiam redemptoris consortia mereantur.
1687	Deus qui homini ... regeneratione caelestes.
	Deus, qui homini, ad imaginem tuam condito, ideo das temporalia, ut largiaris aeterna, ecclesiam tuam spiritali fecunditate multiplica, ut, qui sunt generatione terreni, fiant regeneratione caelestes.
1688	Deus qui homini ... temporalibus sempiterna.
	Deus, qui homini, ad tuam imaginem facto, etiam spiritalem alimoniam praeparasti, concede filio nostro famulo tuo illi, qui in pauperes tuos tua seminat dona, ut veros metat suorum operum fructus et largitatis hodiernae compensatio ipsi perpetua conferatur recipiatque pro parvis magna, pro terrenis caelestia, pro temporalibus sempiterna.
1689	Deus qui honorem ... solidati vivamus.
	Deus, qui honorem pristinum reddidisti per crucis opprobrium, quibus noluisti mortis inferre supplicium, repromissa nobis benedictionum caelestium largire subsidia, ne paschalis adimatur repente laetitia. Da regeneratis ex spiritu bonam vitam, donec veniamus feliciter ad beatam. Sit in oculis tuis acceptabile, quod offerimus, sit salubre, quod poscimus, quo per sanguinem crucis tuae in pace, qua tu es, saepe solidati vivamus.
1690	Deus qui huius ... quod docuit.
	Deus, qui huius diei venerandam sanctamque laetitiam beati apostoli tui Iacobi festivitate tribuisti, da ecclesiae tuae et amare, quod credidit, et praedicare, quod docuit.
1691	Deus qui humanae ... iubeas vastitatem.
	Deus, qui humanae fragilitati necessaria providisti misericors adminicula iumentorum, quaesumus, ut eadem miseris consulendo non subtrahas et, quorum nostris meritis saevit interitus, tua nobis parcendo clementia cessari iubeas vastitatem.
1692a	Deus qui humanae substantiae dignitatem et mirabiliter condidisti et mirabilius reformasti da quaesumus nobis ... est particeps.
	Deus, qui humanae substantiae dignitatem et mirabiliter condidisti et mirabilius reformasti, da, quaesumus, nobis Iesu Christi filii tui divinitatis esse consortes, qui humanitatis nostrae fieri dignatus est particeps.
1692b	Deus qui humanae substantiae dignitatem et mirabiliter condidisti et mirabilius reformasti da quaesumus ut ... est particeps.
	Deus, qui humanae substantiae dignitatem et mirabiliter condidisti et mirabilius reformasti, da, quaesumus, ut eius efficiamur in divina consortes, qui nostrae humanitatis fieri dignatus est particeps.
1692c	Deus qui humanae substantiae dignitatem et mirabiliter condidisti et mirabilius reformasti da nobis quaesumus ... est particeps.
	Deus, qui humanae substantiae dignitatem et mirabiliter condidisti et mirabilius reformasti, da nobis, quaesumus, eius divinitatis esse consortes, qui humanitatis nostrae fieri dignatus est particeps.
1692d	Deus qui humanae ... fieri particeps.
	Deus, qui humanae substantiae dignitatis tuae gratiam contulisti, da nobis Iesu Christi filii tui divinitatis esse consortes, qui fragilitatis nostrae dignatus est fieri particeps.
1693	Deus qui humanam ... benedictionisque conserva.
	Deus, qui humanam naturam supra primae originis praeparas dignitatem, respice ad pietatis tuae ineffabile sacramentum, ut, quos regenerationis mysterio dignatus es innovare, in his dona tuae perpetuae gratiae benedictionisque conserva.
1694	Deus qui humani ... crescere filiorum.
	Deus, qui humani generis es et reparator et rector, da, quaesumus, ecclesiam tuam et nova prole semper augeri et devotione cunctorum crescere filiorum.
1695	Deus qui humani ... reddere moliantur.
	Deus, qui humani generis fida societate laetaris, da, quaesumus, ut et nos liberam praebeamus omnibus caritatem et illi non pro bonis mala reddere moliantur.
1696	Deus qui humani ... per gratiam.
	Deus, qui humani generis ita es conditor, ut sis etiam reformator, propitiare populis adoptivis et novo testamento subolem novae prolis adscribe, ut filii promissionis, quod non potuerunt adsequi per naturam, gaudeant se recepisse per gratiam.
1697	Deus qui humani ... deneges infinita.
	Deus, qui, humani generis miseratus miseriam, in consolationem nostri operum tuorum magnalia extremis etiam temporibus innotescendo mirificas, quo vitae nostrae durae fragilitas, quae suorum meritorum non corrigitur plagis, virtutum saltem provocetur exemplis, respice tuorum supplicum vota, quae tibi ob reverentiam cultoris tui, nostri sine dubitatione patroni Aemiliani sanctissimi, cordis persolvimus obsequela devoti. Da nobis, domine, eodem patrocinante, praesidium, quo ille fultus et diabolum vicit et saeculum. Sit nobis apud te fidelissimus intercessor, qui vitiorum omnium exstitit debellator. Interpellet pro miseris, qui nunc sanctis laetatur cum angelis. Solvat vincula peccaminum, qui iam tuae piae claritatis contemplatur adspectum. Concede, quaesumus, hoc rogante, misericors Deus, puritatem mentibus et sanitatem corporibus; fidelibus custodiam et credendi non credentibus viam; sacerdotibus concordiam et clericis disciplinam; monachis perseverantiam et sacris virginibus sanctimoniam; viduis continentiam et cunctis communiter viventibus in religione cautelam. Sit vita principibus moderata et pax gentibus indisrupta; frugum omnium opulentia rerumque necessarium largitate copia. Et, quia, quantum nostra necessitas expetit, tantum lingua prorogare non sufficit, tu, nostrorum cordium scrutator, omnipotens Deus, et conscientiarum investigabilis iudex, omni condicioni, sexui vel aetati ita commoda concede praesentia, ut beatae vitae gaudia non deneges infinita.
1698	Deus qui humani ... et mentibus.
	Deus, qui humani generis utramque substantiam praesentium munerum et alimento vegetas et renovas sacramento, tribue, quaesumus, ut eorum et corporibus nostris subsidium non desit et mentibus.
1699	Deus qui humano ... consortia mereamur.
	Deus, qui humano generi ad imitandum humilitatis exemplum salvatorem nostrum et carnem sumere et crucem subire fecisti, concede propitius, ut et patientiae eius habere documenta et resurrectionis eius consortia mereamur.
1700	Deus qui humano ... anima sentiat.
	Deus, qui humano generi et salutis remedia et vitae aeternae munera contulisti, conserva famulo tuo illi tuarum dona virtutum et concede, ut medelam tuam non solum in corpore sed etiam in anima sentiat.
1701a	Deus qui humanum genus a ... consortia transferamur.
	Deus, qui humanum genus, a suo principe letaliter sauciatum, Christi tui nativitate salvare dignaris, praesta, quaesumus, ut non haereamus in perditionis auctorem sed ad redemptoris nostri consortia transferamur.
1701b	Deus qui humanum genus principaliter ... consortia transferamur.
	Deus, qui humanum genus, principaliter sauciatum, Christi tui nativitate salvare dignatus es, praesta, quaesumus, ut non haereamus perditionis auctori sed ad redemptoris nostri consortia transferamur.
1702	Deus qui humanum ... praemia consequamur.
	Deus, qui humanum genus tuorum retibus praeceptorum capere consuesti, respice propitius ad tanti sollemnia piscatoris et tribue, ut, natalicio eius munere gratulantes, aeternae vitae praemia consequamur.
1703	Deus qui hunc ... foveamur auxilio.
	Deus, qui hunc diem beati Albani martyrio consecrasti, tribue, quaesumus, ut, cuius annuo gratulamur officio, eius continuo foveamur auxilio.
1704	Deus qui hunc ... meritis adiuvemur.
	Deus, qui hunc diem beati apostoli tui Andreae martyrio consecrasti, da nobis eius festivitate laetari, ut apud misericordiam tuam et exemplis eius et meritis adiuvemur.
1705	Deus qui hunc ... evangelicus praedicator.
	Deus, qui hunc diem beati Marci evangelistae et martyris tui, gloriosae passionis famoso exigente tropheo, sanguinis roseo consecrasti cruore perfusum, praesta, quaesumus, ut ipse apud te pro nobis exsistat praecipuus suffragator, qui unigeniti tui fieri meruit evangelicus praedicator.
1706	Deus qui hunc ... remuneretur caelestibus.
	Deus, qui hunc diem beati Pantaleonis consecrasti martyrio, praesta, quaesumus, ut ipsius interventu hoc in nostris floreat actibus, quod praemiis remuneretur caelestibus.
1707a	Deus qui hunc ... religionis exordium.
	Deus, qui hunc diem beatorum apostolorum Petri et Pauli martyrio consecrasti, da ecclesiae tuae, toto orbe terrarum diffusae, eorum semper magisterio gubernari, per quos sumpsit religionis exordium.
1707b	Deus qui hodierna ... religionis exordium.
	Deus, qui hodierna die beati apostoli tui Petri pontificium consecrasti, da ecclesiae tuae, toto orbe diffusae, eius semper magisterio gubernari, per quem sumpsit religionis exordium.
1708	Deus qui hunc ... cordibus oriatur.
	Deus, qui hunc diem electionis gentium primitiis consecrasti et per luminis tui stellam manifestum te nobis ostendisti, tribue, quaesumus, ut nova caelorum mirabilis claritas in nostris semper cordibus oriatur.
1709	Deus qui hunc ... fieri praecepit.
	Deus, qui hunc diem incarnati Verbi tui transfiguratione tuaeque ad eum missa paternitatis voce consecrasti, tribue, quaesumus, ut, divinis pasti alimoniis, in eius mereamur membra transferri, qui haec in sui memoriam fieri praecepit.
1710	Deus qui hunc ... corrigiam
	Deus, qui hunc diem nativitatis beati Ioannis baptistae, incomparabilis hominibus, consecrasti, praesta nobis de eius meritis illius nos calceamenti sequi vestigium, <cuius se ad solvendam> corrigiam praedicavit indignum.
1711	Deus qui hunc ... celebretur ecclesiis.
	Deus, qui hunc diem ortu praeconis tui atque baptistae Ioannis consecrare dignatus es, cum puerperium mater sterilis et vocem pater mutus accepit, concede propitius, ut illud, quod salvator noster gessit in Iordane mysterium, hoc in omnibus catholicis semper celebretur ecclesiis.
1712	Deus qui hunc ... tur da populo tuo scientiam spiritalium gaudiorum et omnium fidelium mentes dirige in viam salutis et pacis ut quae manifestavit testificatio nuntii impleat
	Deus, qui hunc diem praeconis tui honorabilem nobis in Ioannis nativitate fecisti, ut, gratiae tuae operante virtute, praecursor tuus, <quo inter natos mulierum nullus maior, orire>tur, da populo tuo scientiam spiritalium gaudiorum et omnium fidelium mentes dirige in viam salutis et pacis, ut, quae manifestavit testificatio nuntii, impleat praesentia nuntiati.
1713	Deus qui hunc ... protectione securi.
	Deus, qui hunc diem sacratissimum per incarnationem Verbi tui et partum Mariae virginis consecrasti, da populis tuis in hac celebritate consortium, ut, qui tua gratia sunt redempti, tua sint protectione securi.
1714	Deus qui hunc ... illius confessoris tui translatione decorasti fac nos eius meritis in sanctorum tuorum
	Deus, qui hunc diem sanctissimum <beati> illius confessoris tui translatione decorasti, fac nos eius meritis in sanctorum tuorum societatem transferri.
1715	Deus qui hunc ... adversitatibus liberari.
	Deus, qui hunc praeclarum ac venerabilem diem beati Genesii martyris tui sollemnitate devotissime celebrari tribuisti, praesta plebi tuae, ut, ipso intercedente patrono, ab omnibus mereamur adversitatibus liberari.
1716	Deus qui hunc ... praemia consequamur.
	Deus, qui hunc sacrosanctum diem pro festivitate beati Vigilii martyris tui atque pontificis sollemniter nobis celebrandum contulisti, da, quaesumus, supplicibus tuis, ut, meritis eius defensi, et ab omnibus vitae huius liberemur adversis et aeternae vitae praemia consequamur.
1717	Deus qui id ... semper adscendant.
	Deus, qui id, quod per infantiam videtur exiguum, magnum facis esse per merita, qui primordia adventus tui triumphis glorificas parvulorum, prius eos passionis martyrio, quam aetatis provehis incremento, – felix mors eorum et beatificanda condicio, per quam eis contigit, ut saevitiam crudelissimi Herodis devincerent triumphando et Christum mererentur in praemio, – da huic populo, tuo nomini consecrato, per consimilis gratiae admirationem, meritorum similium dignitatem, ut, qui hanc sanctorum infantium festivitatem pro honore nominis tui celebrant, ad ipsorum infantium beatitudinem profectu fidei semper adscendant.
1718	Deus qui idem ... optabili obsequamur.
	Deus, qui idem ipse es cuiusque anni non deficient, praebe nobis ita hunc annum cum placita tibi servitutis devotione transigere, qualiter et substantiis non privemur et divinis obsequiis devotione optabili obsequamur.
1719	Deus qui ieiunantium ... indulgentia consequamur.
	Deus, qui ieiunantium humilitate placaris et humiliantium se tibi precibus libenter inflecteris, exaudi, quaesumus, preces nostras et, diversorum turbinum, quibus quatimur, tempestate discussa, pacem nobis tuae serenitatis infunde, ut, quam peccatorum nostrorum nimietate perdidimus, tuae pietatis indulgentia consequamur.
1720	Deus qui ieiunium ... holocausta suscipiant.
	Deus, qui ieiunium corporale sanctificas, quando salutarem continentiam donas, possibilitatem nobis tribue continendi, ne remaneamus in caenoso voluptatum gurgite suffocati. Nihil apud tuam bonitatem priora delicta praevaleant, ut saluti animarum ieiunia cottidiana proficiant et sanctae visitationis benedictionem nostra holocausta suscipiant.
1721	Deus qui illuminas ... diligere valeamus.
	Deus, qui illuminas omnem hominem venientem in hunc mundum, illumina, quaesumus, cor nostrum gratiae tuae splendore, ut digne maiestati tuae cogitare et diligere valeamus.
1722	Deus qui imminentem ... interire supplicio.
	Deus, qui imminentem Ninivitis interitum sola misericordia removisti, quibus, ut misericors exsisteres, conversionis paenitentiam praestitisti, respice, quaesumus, populum tuum, ante conspectum misericordiae tuae prostratum, ut, quos unigeniti tui sanguine redemisti, non patiaris propter misericordiam tuam mortalitatis interire supplicio.
1723	Deus qui in ... habeat potestatem.
	Deus, qui in altis habitas et humilia respicis, da restaurationem defunctis et resurgentibus in te largire pietatem, specialiter pro famulo tuo illo, quem in pacem assumere dignatus es; da, ut, quia, in te renovatus, de hoc mundo migravit, mors in eo secunda penitus non habeat potestatem.
1724	Deus qui in ... efficere digneris.
	Deus, qui in ara crucis unius veri sacrificii Christi domini corporali immolatione totius mundi delicta purgasti et humano generi redemptionis gratiam contulisti, quaesumus, ut nos ipsius redemptionis participes efficere digneris.
1725	Deus qui in ... commemoratione laetamur.
	Deus, qui in aula virginali beatae Mariae habitare voluisti nec tamen forma nostrae mortalitatis iura minuisti aeternae deitatis, concede propitius, ut eius precibus adiuvemur, cuius commemoratione laetamur.
1726	Deus qui in ... propitius ministrorum.
	Deus, qui in auxilium generis humani caelestia simul et terrena dispensas, in inferiori mundi parte laborantes, supernorum nos, quaesumus, praesidiis refove propitius ministrorum.
1727	Deus qui in ... gaudia perducamur.
	Deus, qui in beati confessoris tui Benedicti vita laudabili speculum nobis conversationis ac normam rectitudinis ostendisti, concede propitius, ut et praeclaris exemplis eius ad iustitiam informemur et sanctissimis meritis ac precibus ad caelestis regni gaudia perducamur.
1728	Deus qui in ... diem celebramus.
	Deus, qui in beati Donati episcopi et martyris tui manibus poculi fragmenta restaurare dignatus es, munera plebis tuae propitiatus intende, ut eius nobis fiat supplicatio salutaris, pro cuius sollemnitate hodiernam diem celebramus.
1729	Deus qui in ... intercessione donetur.
	Deus, qui in beati Donati martyris tui atque pontificis manibus poculi fragmenta restaurare dignatus es, supplicantium preces benignus exaudi, ut, quod fiducia non habet meritorum, eius nobis intercessione donetur.
1730	Deus qui in ... habere consortium.
	Deus, qui in Christi domini filii tui passione et resurrectione redemptionem et salutem humani generis contulisti, da nobis, quaesumus, ut in eadem redemptione et salute mereamur habere consortium.
1731	Deus qui in ... dilectione multiplices.
	Deus, qui in condicione humani generis, feminam ex masculo creans, unitatem carnis atque dulcedinis ex ipsa formatione inter eos esse constituisti, ad hoc votivum sacrificium propitiatus attende et famulos tuos illos, qui coniugali copulandi sunt foedere, unito vinculo dilectionis adstringe, ut pacem ad invicem servent, foedus coniugale non violent, fructificent caritate sicque eos in tuo timore conserves, ut nos quoque in tua dilectione multiplices.
1732	Deus qui in ... gaudia sempiterna.
	Deus, qui in corde mulieris Samaritanae spiritum tuae sanctificationis dedisti, quo te crederet, quo te inspirata sentiret, quo etiam posset tuae maiestatis potentiam fideli intentione narrare, emitte spiritum tuum de sanctis caelis tuis, quo sanctificentur oblata, suscipiantur vota, expientur delicta et cunctis, ex hoc sumentibus, donetur criminum indulgentia atque aeternae promissionis gaudia sempiterna.
1733	Deus qui in ... deficiamus impende.
	Deus, qui in deserti regione multitudinem populi tua virtute satiasti, in huius quoque saeculi transeuntis excursu victum nobis spiritalem, ne deficiamus, impende.
1734	Deus qui in ... non reatum.
	Deus, qui, in dilectione etiam neglegentium servulorum dignationem piae institutionis assumens, dum nobis nos proficere studes, tibi obtemperare consuescis, variae doctrinae formas exemplis congruis temperando, in quibus, diversos rerum exitus misericordiam tuam iramque significans, sicut pro archangeli deiectione contristas, ita pro meretricis as?sumptione confortas; sicut pro discipuli amissione terrificas, ita pro latronis commotione sublimas... Dum ille aequalitatem iactat supercilio, haec pietatem captat unguento et ita fit, ut ille lapsum habeat, ista suggestum. Dum aurum pascitur electus, deum fatetur appensus; unus ad paradisum venit, alter ad laqueum, ut nec elatio efferat servientem nec desperatio obruat peccatorem. Unde hoc sensibus nostris, domine, provide; etiam clementer indulge, ne nos immensum criminum pondus superbiae, massa avaritiae igne conflantis, datos in desperationis praecipitium, laqueus male cupiditatis appendat sed potius cruci tuae, mortificata saecularitate, confixi, te, qui caput nostrum es, suavitate confessionis atque operis delibato, in tuorum praeceptorum perfectione maculas nostras humilitatis fletibus abluentes, infidelitatis vestigia, sparsis fidei crinibus, abstergamus, sic hac sacri corporis communione vel sanguinis habituri remedium, non reatum.
1735	Deus qui in ... gloriam consequantur.
	Deus, qui in diversis nationum populis praeclaros verae fidei constituisti doctores, concede, quaesumus, ut omnes, qui sanctissimi Augustini confessoris tui atque pontificis implorant auxilium, praesentis prosperitatis gaudium et futurae beatitudinis gloriam consequantur.
1736	Deus qui in ... se ostendat.
	Deus, qui in electis tuis exstinxisti funditus mortem, cum mortem te inferni pronuntias esse, illos solum ex averni claustris erueris, quos tuos in fide et actibus recognoveris, da praesenti christiano conventui, resurrectionis tuae sollemnitate ovanti, legis tuae praeceptis inviolabiliter inhaerere et indesinenter aestu tuae dulcedinis anhelare, ut semper nos tuos operarios ipse cognoscas et, aeternis poenis solutos, secundae resurrectionis felicitate sustollas, quo praesenti sacrificio et, resurrectionis tuae gaudia celebrantibus, se nobis maiestas tua invisa visibilem praebeat et defunctorum spiritibus ad requiem se ostendat.
1737	Deus qui in ... sempiternis perfrui.
	Deus, qui in filii tui humilitate iacentem mundum erexisti, laetitiam concede fidelibus tuis, ut, quos perpetuae mortis eripuisti casibus, gaudiis facias sempiternis perfrui.
1738	Deus qui in ... superbiendo discessimus.
	Deus, qui in filii tui oboedientia nobis contulisti humilitatis exempla, concede propitius, ut illam cordibus nostris dignetur infundere, quam in suo opere dignatus est demonstrare, atque ad illum humilitate redeamus, a quo superbiendo discessimus.
1739	Deus qui in ... qui offerunt intendis magis accipiens in humili spiritu parva de modicis quam in arroganti magna de maximis... Horum domine conscii supplicamus ut haec offerentium nomina liber vitae aeternae in qualibet sui parte scriptura contineat ut qui principales cum sanctis martyribus palmas non meremur saltem vel in posterioribus subiungamur quia apud te domine multae sunt misericordiae multae gratiae multaeque sunt mansiones in quarum quantulacumque parte simus vel infimi dummodo non simus
	Deus, qui in oblationibus supplicantium non rei quantitatem existimas sed, fidei affectum quaerendo, non pretium compensas, non speciem, quae offertur, sed credulitatem <eorum>, qui offerunt, intendis, magis accipiens in humili spiritu parva de modicis quam in arroganti magna de maximis... Horum, domine, conscii supplicamus, ut haec offerentium nomina liber vitae aeternae, in qualibet sui parte scriptura, contineat, ut, qui principales cum sanctis martyribus palmas non meremur, saltem vel in posterioribus subiungamur, quia apud te, domine, multae sunt misericordiae, multae gratiae multaeque sunt mansiones, in quarum quantulacumque parte simus vel infimi, dummodo non simus penitus alieni.
1740	Deus qui in ... devota libertas.
	Deus, qui in omni loco dominationis tuae totus assistis et totus operaris, accepta sacrificium nomini tuo benignus oblatum et huius domus, cuius es fundator, esto protector, ut in virtute spiritus sancti fiat hic semper servientium etiam tibi devota libertas.
1741	Deus qui in ... suffragia consequamur.
	Deus, qui in praeclara salutiferae crucis inventione passionis tuae miracula suscitasti, concede, ut vitalis ligni pretio aeternae vitae suffragia consequamur.
1742	Deus qui in ... patrociniis adiuvemur.
	Deus, qui in praeclari sideris sancti pontificis Ethelwoldi episcopi illustratione novam populis Anglorum tribuisti lucem hodierna die clarescere, tuam suppliciter imploramus clementiam, ut, cuius magisterio totius religionis documenta cognovimus, illius et exemplis informemur et patrociniis adiuvemur.
1743	Deus qui in ... mentibus serviamus.
	Deus, qui in sanctis habitas et pia corda non deseris, libera nos a terrenis desideriis et cupiditate carnali, ut, nullo in nobis regnante peccato, tibi soli domino liberis mentibus serviamus.
1744	Deus qui in ... periculis liberemur.
	Deus, qui in sanctis habitas et pia corda non deseris, suscipe propitius orationem nostram et tribue misericordiam tuam, ut, te custode servati, ab omnibus vitae huius periculis liberemur.
1745	Deus qui in ... aeternorum gaudiorum.
	Deus, qui in sanctis tuis vehementer glorificaris, quorum apud te semper manet nova et perpetua festivitas, supplicationem nostram et hostias, quas in honorem et venerationem dei genitricis Mariae sanctorumque apostolorum, martyrum, consessorum ac virginum omniumque electorum tuorum tuae devoto obsequio deferimus pietati, clemens et benignus suscipe et concede propitius, ut, qui eorum merita recolimus, interventu quoque illorum et absolutionem omnium peccatorum et beatitudinem percipere mereamur aeternorum gaudiorum.
1746	Deus qui in ... tribuas peccatorum.
	Deus, qui, in sanctorum tuorum cordibus sancti caloris tui ignem succendens, usque ad martyrii eos gloriosa certamina sustulisti, ut, in supplicio constituti, persecutores suos, te vincente, despicerent, poenas, te confortante, contemnerent, praemia, te remunerante, perciperent in gloria, per illorum te, domine, triumphum deprecamur, ut nobis remissionem tribuas peccatorum.
1747	Deus qui in ... caelestis adiungi.
	Deus, qui in sanctorum tuorum es virtute laudabilis quique sancto confessori tuo Mauro talem oboedientiae gratiam largiri dignatus es, ut beatissimi patris nostri Benedicti imperio Placidum puerum, gurgite abstractum, redderet terris, concede nobis famulis tuis, ipsius festa devotis animis celebrantibus, ipso interveniente, a peccatorum nostrorum profunditate eripi et gaudiis patriae caelestis adiungi.
1748	Deus qui in ... precibus adiuvari.
	Deus, qui in sanctorum tuorum meritis semper es mirabilis, quaesumus clementiam tuam, ut, sicut beato illi confessori tuo atque abbati eminentem gloriam contulisti, sic ad consequendam misericordiam tuam eius nos facias precibus adiuvari.
1749	Deus qui in ... proficiat sempiternam.
	Deus, qui in sollemnitate paschali mundo remedia contulisti, populum tuum, quaesumus, caelesti dono prosequere, ut et perfectam libertatem consequi mereatur et ad vitam proficiat sempiternam.
1750	Deus qui in ... vetustatis emunda.
	Deus, qui in unigenito tuo novam creaturam nos tibi esse fecisti, respice propitius in opera misericordiae tuae et in adventu filii tui ab omnibus nos maculis vetustatis emunda.
1751a	Deus qui inaestimabili ... redemisti sanguine.
	Deus, qui inaestimabili misericordia animas mortalium ab angustiis transfers ad requiem, propitiare, supplicantibus nobis, animabus famulorum famularumque tuarum, quorum quarumque memoriam specialitatis affectu agimus et quorum quarumque nomina a te inspicienda conscripsimus et pro quibus exorare iussi aut debitores fuimus, et omnium consanguineorum ac familiarium cunctorumque fidelium, ut eos, paradiso restituens, non sinas excruciari tormentis, quos benigni filii tui domini nostri Iesu Christi pretioso redemisti sanguine.
1751b	Deus qui inaestimabili ... sanguine redemisti.
	Deus, qui inaestimabili misericordia animas mortalium ab angustiis transfers ad requiem, propitiare supplicationibus nostris pro anima famuli tui, quem tibi specialitatis affectu commendamus, ut eum, paradiso restituens, non sinas excruciari tormentis, quem benignissimi filii tui domini nostri pretioso sanguine redemisti.
1751c	Deus qui inaestimabili ... sorte iustorum.
	Deus, qui inaestimabili misericordia animas mortalium ab angustiis transfers ad requiem, propitiare supplicationibus nostris pro animabus famulorum famularumque tuarum, quorum quarumque commemorationem speciali devotione agimus et pro quibus orare iussi et debitores sumus, et omnium benefactorum nostrorum necnon consanguineorum ac familiarium nostrorum cunctorumque fidelium, ut eas, paradiso restituens, in tuorum censeas sorte iustorum.
1752	Deus qui ineffabilibus ... destituatur auxiliis.
	Deus, qui ineffabilibus mundum renovas sacramentis, praesta, quaesumus, ut ecclesia tua et aeternis proficiat institutis et temporalibus non destituatur auxiliis.
1753	Deus qui infideles ... inspirante convertas.
	Deus, qui infideles deseris et iuste indevotis irasceris, populum tuum, quaesumus, converte propitius, ut, qui te per duritiam irreligiosae mentis semper offendunt, ad sanctorum beneficia promerenda, tuae miserationis gratia inspirante, convertas.
1754	Deus qui infirmitatis ... gloriae tuae.
	Deus, qui infirmitatis nostrae factus es particeps, fac nos tui regni esse consortes, ut, quibus participari voluisti assumendo hominem, participium conferas gloriae tuae.
1755	Deus qui intemperantiam ... reliquisti sectandam.
	Deus, qui intemperantiam saturitatis tuae abstinentiae dedicatione superasti et puritatem castimoniae, ut cognoscaris, dedisti, serenus nos tuo vultu circumspice et ieiunantibus pacem proximi et tuam largiaris, quam, ad patrem adscendens, nobis reliquisti sectandam.
1756	Deus qui inter ... inhaerere studeamus.
	Deus, qui inter apostolicos ecclesiae doctores sanctum Aldelmum confessorem tuum atque pontificem caelesti splendore fecisti lucere, annue, quaesumus, ut, sicut in eo formam salutis agnovimus, sic eius vestigiis inhaerere studeamus.
1757a	Deus qui inter ... sede potiatur.
	Deus, qui inter apostolicos sacerdotes famulum tuum illum fecisti vigere pontificem, praesta, quaesumus, ut eorum perpetua quoque sede potiatur.
1757b	Deus qui inter ... aggregetur consortio.
	Deus, qui inter apostolicos sacerdotes famulum tuum illum pontificali fecisti dignitate vigere, praesta, quaesumus, ut eorum quoque perpetuo aggregetur consortio.
1757c	Deus qui inter ... in caelis.
	Deus, qui inter apostolicos sacerdotes famulum tuum illum censeri fecisti, praesta, quaesumus, ut, quorum vicem gerebat ad horam in terris, eorum perpetuo consortio laetetur in caelis.
1758	Deus qui inter ... consequamur collegia.
	Deus, qui inter caelestia luminaria praeclarum sacerdotem Iudocum excellenter rutilare fecisti, concede, ut per tanti patris festa temporalia, splendida supernorum consequamur collegia.
1759a	Deus qui inter ... irradiamur exemplis.
	Deus, qui inter cetera potentiae tuae miracula etiam in fragili sexu victoriam castitatis et martyrii contulisti, da, quaesumus, ut beatae et sanctae virginis martyrisque tuae illius adiuvemur meritis, cuius beatitudinis irradiamur exemplis.
1759b	Deus qui inter ... exempla gradiamur.
	Deus, qui inter cetera potentiae tuae miracula etiam in sexu fragili victoriam martyrii contulisti, concede propitius, ut, cuius natalicia colimus, per eius ad te exempla gradiamur.
1760	Deus qui inter ... gloria iucundamur.
	Deus, qui inter innumera gratiae tuae dona etiam in sexu femineo tua operaris miracula, concede propitius, ut beatae Waldpurgae virginis tuae apud misericordiam tuam patrocinia sentiamus, cuius non solum castitatis illustramur exemplis, verum etiam miraculorum gloria iucundamur.
1761	Deus qui invisibili ... in nobis.
	Deus, qui invisibili rore caelesti ad beatae Austrebertae virginis oboedientiam ardentem clibanum exstinxisti, praesta, quaesumus, ut eius meritis gloriosis vitiorum incendia non dominentur in nobis.
1762	Deus qui invisibiliter ... beneficia consequantur.
	Deus, qui invisibiliter omnia contines et tamen pro salute generis humani signa tuae potentiae visibiliter ostendis, templum hoc potentia tuae inhabitationis illustra, ut omnes, qui huc deprecaturi conveniunt, ex quacumque tribulatione ad te clamaverint, consolationis tuae beneficia consequantur.
1763	Deus qui iubar ... felicitatis tripudium.
	Deus, qui iubar aethereum antistitem Swithunum moderno tempore dignatus es mundo revelare, suppliciter tuam imploramus omnipotentiam, quatenus per gloriosa ipsius sancti merita, quem facis coruscare signis miraculorum, praebeas nobis te supplicantibus famulis omnium incrementa virtutum et sempiternae felicitatis tripudium.
1764	Deus qui iusta ... veniam consequamur.
	Deus, qui iusta postulantes exaudis, qui, si qua in nobis bona sunt opera, et ipse insinuas et insinuata consummas, quaesumus, ut et cor nostrum ad expugnandas dilates passiones sensusque nostros ad impugnationum certamina superanda confortes, ut, dum digne vitiis nostris irascimur, pietatis tuae veniam consequamur.
1765	Deus qui iuste ... tuo pervenire.
	Deus, qui iuste corrigis et clementer ignoscis et non vis invenire quod damnes sed potius quod corones, qui etiam peccantium non mortem sed vitam magis desideras, me miserum fragilemque peccatorem, sordibus delictorum plenum, a tua pietate non repellas neque respicias ad peccata et scelera et immunditias turpesque cogitationes meas, quibus tuae misericordiae dulcedinem merito mihi in amaritudinem converti peccatorum, sed ad immensas misericordias tuas, quibus gratuito subvenire consuesti, precorque humiliter, ut immemor sis peccatorum meorum et memor misericordiarum tuarum, vota precesque meas clementer suscipias tibique placita mihi postulare concedas collegioque sanctorum tuorum, qui in hoc ministerio tibi placuerunt, me adscisci digneris atque per eorum exempla facias tibi semper placere et ad te cum fideli grege tuo pervenire.
1766	Deus qui iuste ... propitiatus averte.
	Deus, qui iuste irasceris et clementer ignoscis, afflicti populi lacrimas respice et iram tuae indignationis, quam iuste meremur, propitiatus averte.
1767	Deus qui iustificas ... te separetur.
	Deus, qui iustificas impium et non vis mortem peccatorum, maiestatem tuam suppliciter deprecamur, ut famulum tuum illum, de tua misericordia confidentem, caelesti protegas benignus auxilio et assidua protectione conserves, ut tibi iugiter famuletur et nullis temptationibus a te separetur.
1768	Deus qui iustitiae ... quos redemit.
	Deus, qui iustitiae vindex et pastor pius redemptarum ovium cognosceris esse, propitiatus in hac sollemnitate tuorum infantium Iusti et Pastoris oblationes populi suscipe offerentis; Iusti tui precibus respice miseros et Pastoris suffragio consolare defunctos, quo iustitia pastoris summi, concreta clementiae, et caelesti pascat alimonia, quos creavit, et pietate iustificet, quos redemit.
1769	Deus qui iustitiam ... aequitatem desiderat vultus [tuus] concede propitius nobis beati Iusti martyris tui sic iuste vivere meritis et exemplis ut opibus iustitiae intenti ad iustorum
	Deus, qui iustitiam diligis et <cuius> aequitatem desiderat vultus [tuus], concede propitius nobis beati Iusti martyris tui sic iuste vivere meritis et exemplis, ut, opibus iustitiae intenti, ad iustorum gloriam veniamus.
1770	Deus qui iustitiam ... perversa vitare.
	Deus, qui iustitiam diligis et iniusta condemnas, da nobis, quaesumus, et amare, quae recta sunt, et perversa vitare.
1771	Deus qui iustitiam ... frequentamus praecepta.
	Deus, qui iustitiam legis in cordibus credentium digito tuo scribis quique in Paulo hodierna die vocationis eius de caelis non atramento sed spiritu tuo vivo caritatis tuae fervorem ita scribis, ut proprium quassandum corpus pro ecclesiae tuae tradat membris, qui ipsius ecclesiae olim contriverat membra, sic nobis ipsius interventu doctoris et fidelis magistri fraternae caritatis sincerae consortium dona et de tuae dilectionis, quam ille habuit, multiplicae flamma vel unam scintillam dignare largiri, ut sequamur per dilectionem ferventem magistrum, cuius flagrantia in caritate frequentamus praecepta.
1772	Deus qui iustitiam ... quod praecipis.
	Deus, qui iustitiam tuae legis in cordibus credentium digito tuo scribis, da nobis fidei et spei caritatisque augmentum et, ut mereamur assequi, quod promittis, fac nos amare, quod praecipis.
1773	Deus qui laboribus ... non perire.
	Deus, qui laboribus hominum etiam de mutis animalibus solatia subrogasti, supplices te rogamus, ut, sine quibus non alitur humana condicio, nostris facias usibus non perire.
1774	Deus qui largifluae ... protegamur adversis.
	Deus, qui largifluae bonitatis consilio ecclesiam tuam beati Edmundi confessoris tui atque pontificis praeclarae vitae meritis decorasti et gloriosis laetificasti miraculis, concede propitius nobis famulis tuis, ut et ipsius in melius reformemur exemplis et ab omnibus eius patrocinio protegamur adversis.
1775	Deus qui laticum ... et futuris.
	Deus, qui laticum instar gelidorum plumbi ardorem mutasti, ne gloriosi martyris tui Victoris corpus exureret, tribue, quaesumus, ut, ipso pro nobis interveniente, a praesentibus liberemur periculis et futuris.
1776a	Deus qui legalium ... ad salutem.
	Deus, qui legalium differentias hostiarum unius sacrificii perfectione sanxisti, accipe sacrificium a devotis tibi famulis et pari benedictione sicut munera Abel sanctifica, ut, quod singuli obtulerunt ad maiestatis tuae honorem, cunctis proficiat ad salutem.
1776b	Deus qui legalium ... et futurae.
	Deus, qui legalium differentias hostiarum unius sacrificii perfectione sanxisti, accipe, quaeso, meae servitutis munus oblatum et pari benedictione sicut munera Abel sanctifica, ut per hoc, quod ad maiestatis tuae honorem detuli, et praesentis vitae meae delictis exui iubeas et futurae.
1777	Deus qui licet ... et renatos.
	Deus, qui, licet salutem hominum semper opereris, nunc tamen populum tuum gratia abundantiore laetificas, respice propitius ad electionem tuam, ut paternae protectionis auxilium et regenerandos muniat et renatos.
1778	Deus qui licet ... reatus accusat.
	Deus, qui, licet sis magnus in magnis, mirabilia tamen gloriosius operaris in minimis, concede mihi indigno famulo tuo sacris convenienter servire mysteriis atque in omnibus tua misericordia protegat, quem conscientiae reatus accusat.
1779	Deus qui licet ... non loquentes.
	Deus, qui, licet sis magnus in magnis, mirabilia tamen gloriosius operaris in minimis, da nobis, quaesumus, in eorum celebritate gaudere, qui filio tuo domino nostro testimonium praebuerunt, etiam non loquentes.
1780	Deus qui licet ... ministros offerre.
	Deus, qui, licet universum genus humanum caelesti lege disponas, ecclesiam tamen tuam speciali dispositione moderaris, et dignum tibi nos exhibere ministerium, concede propitius, et dignos per tuam gratiam ministros offerre.
1781	Deus qui ligandi ... interesse mysteriis.
	Deus, qui ligandi solvendique licentiam tuis apostolis contulisti, da, quaesumus, ut per ipsos, a terrenis vitiis expediti, liberi possimus caelestibus interesse mysteriis.
1782	Deus qui loca ... misericordiae sentiatur.
	Deus, qui loca, nomini tuo dicata, sanctificas, effunde super hanc orationis domum gratiam tuam, ut ab omnibus, hic invocantibus te, auxilium tuae misericordiae sentiatur.
1783	Deus qui loca ... praeparetur officio.
	Deus, qui loca, nomini tuo dicata, sanctificas et benedictionibus tuis dicanda praecedis, praesta, quaesumus, ut, quod beato apostolo tuo illi et sanctis martyribus illis famulus tuus ille in hoc aedificio deputavit, digno praeparetur officio.
1784	Deus qui magis ... caritas propagari.
	Deus, qui magis circumcisionem cordis quam corporis diligis et non admittis inductam per litteram praeputii circumcisionem sed fidei innixam cum bono opere caritatem, tu nostras aures deseca, ne audiant sanguinem, corda, ne teneant dolum, oculos, ne invadant alienum, tu in manibus succide, quod polluit, in pedibus, quod ad malum currit, in praeputiis, quod carnalia concupiscit, tu incide, quod laniat, praecide, quod vulnerat, abscide, quod lacerat, excide, quod scandala incrementat, ut, amputato facinore, sola in nobis valeat caritas propagari.
1785	Deus qui magna ... sit gratia.
	Deus, qui magna nimis et de parvis miranda potenter operaris, misericordiae tuae dona in me placatus exsequere, ut, ubi nulla conscientiae meae te digna sunt merita, sola pietatis tuae semper clara sit gratia.
1786	Deus qui magnum ... devotione sectemur.
	Deus, qui magnum salutare dedisti nobis hodie in beati Genesii martyris tui festivitate, praesta, quaesumus, ut et conversationis eius imitemur exempla et fidem congrua devotione sectemur.
1787	Deus qui martyrem ... precamur aptari.
	Deus, qui martyrem tuum Felicem, ab imis fluctibus submersum, ad littora reduxisti, nos quoque famulos tuos, ab imis vitiorum ereptos, virtutum moribus, precamur, aptari.
1788	Deus qui martyrem ... revincebat conventum.
	Deus, qui martyrem tuum Stephanum per apostolorum tuorum impositionem manuum dignum fecisti esse ministrum, tu per fusionem gratiae spiritalis oblatum tibi hoc nostrum sanctifica holocaustum, ut, ex eo sumentes, illo dono spiritus impleamur, quo Stephanus tuus plenus et signa ostendebat in populum et disputantium contra se revincebat conventum.
1789	Deus qui martyres ... semper exoret.
	Deus, qui martyres tuos praemio passionis remunerare consuevisti ita, ut, devictis persecutoribus, coronam martyrii consequantur, praesta, quaesumus, ut beatus sacerdos et martyr tuus Xystus, cuius festivitatem colimus, tuam pro nobis indulgentiam semper exoret.
1790	Deus qui martyrio ... semper adscendant.
	Deus, qui martyrio innocentium parvulorum triumphalem hunc diem esse fecisti et exempla ad augendam ecclesiae tuae fidem proficientibus tribuere dignatus es, dum beatissimi infantes illi etiam passionem pro te hodie prompte vicerunt, da huic populo, tuo nomini consecrato, per consimilis gratiae admirationem meritorum similium dignitatem, ut, qui hanc sanctorum infantium festivitatem pro honore nominis tui celebrant, ad ipsorum infantium beatitudinem profectu fidei et pacis semper adscendant.
1791	Deus qui martyrum ... munere caritatis.
	Deus, qui martyrum tuorum corpora, unius gloriae remuneratione indivise fruentia, divisis in regionibus locaris, et Servandum Auditani situi donas et Germanum Emeritensium civibus commodas, praesta nobis, ut, gratiae tuae luce illuminati, et, corporaliter divisi, unitatem retentemus dulcedinis et, collecti in unum, redundemus munere caritatis.
1792	Deus qui me ... requiem sempiternam.
	Deus, qui me indignum sacris mysteriis corporis et sanguinis filii tui domini nostri confortare dignatus es, te suppliciter deprecor, ut non sit ad iudicium animae meae; praesta, quaeso, domine, indulgentiam mihi peccatori, quam mea non exigunt merita; porrige manum lapso et aperi mihi ianuam regni tui, per quam possim ingredi in requiem sempiternam.
1793	Deus qui mediante ... debite famuletur.
	Deus, qui, mediante beata virgine Maria, mundo succurristi perdito, ipsius gloriosis meritis et precibus intervenientibus, concede placatus, ut, ab ecclesiae tuae regno omnium scandalorum perturbatione remota, in tua semper pace tibi debite famuletur.
1794	Deus qui mentis ... inserant morum.
	Deus, qui mentis puritatem approbas, non ieiunium a cibis, solummodo gloriam humanam captans, dignare oculos cordis nostri in hoc ieiunio ita illuminare introrsum, ut tibi in his, quae homines nesciunt, in occulto a vitiis ieiunio placeamus; quia doni tui est hoc ipsum, quod a cibis abstinemus, sit muneris tui, ut a peccatis etiam cum ieiunio emundemur, et desiderabili fonte ubertatis ita haec munera imbre sancti spiritus perfunde, ut, a ieiunantibus percepta, cuncta vitia mundent et virtutes inserant morum.
1795	Deus qui mirabili ... assequi gaudeamus.
	Deus, qui mirabili dispensatione priscorum patrum glorificatione mundum coruscare sanxisti, concede propitius, ut, qui beati Eliae praecursoris tui suffragium poscimus, aeternitatis compendium interventu eius assequi gaudeamus.
1796	Deus qui mirabilis ... mortuos suscitare.
	Deus, qui mirabilis es in sanctis tuis, cuius cultui deputatur, quidquid amicis tuis honoris impenditur, intenta oratione te poscimus, ut hunc diem, quem sancti et incomparabilis viri Martini illustrat excessio, prosperum nobis et posteris in rebus nationum propitiatus indulgeas tribuasque, ut, cuius veneratores sumus, imitatores effici mereamur. Hunc etiam virum, quem caelicolis adnumerandum martyribus aggregatum aetatis nostrae tempora protulerunt, iubeas auxilium nostris ferre temporibus. Dubium enim non est, quin sit martyr in caelo, qui fuit confessor in saeculo, cum sciatur non Martinum martyrio sed martyrium defuisse Martino. Oramus te, domine, ut, qui tantum potuit tuis aequare virtutibus, ut vitam mortuis redderet, dignetur etiam defunctorum spiritus consolare ac viventes in tribulatione defendere, qui potens fuit mortuos suscitare.
1797	Deus qui mirificis ... tibi regi
	Deus, qui mirificis virtutum tuarum signis salutis nostrae initia declarasti, qui magis, stella praefulgente degressis, adorare et promereri te regem aeternum dominumque perpetuum mysticis muneribus praestitisti, qui, in corpore nostro mirabili baptismi sacramento regeneratus, ex spiritu nos abluis renascendo et, ineffabili potentiae dono hodie aquas in vina mutando, discipulis tuis tuam manifestasti divinitatem, exaudi nos supplices tuos ob diem sacratissimae sollemnitatis et praesta, ut, gloria tua illuminati, saeculo moriamur, <et> tibi regi Christo vivamus.
1798	Deus qui miro ... vita muniatur.
	Deus, qui miro ordine angelorum ministeria hominumque dispensas, concede propitius, ut, quibus, tibi ministrantibus, in caelo semper assistitur, ab his in terra nostra vita muniatur.
1799	Deus qui miro ... defendi mereatur.
	Deus, qui miro ordine omnium dignitatum omniumque regnorum iura dispensas, concede propitius, ut famulus tuus ille cum populo, sibi subiecto, tota tibi semper devotione famuletur, quatenus invincibili potentiae tuae dono iugiter defendi mereatur.
1800	Deus qui miro ... placere valeat.
	Deus, qui miro ordine universa disponis et ineffabiliter gubernas, praesta, quaesumus, ut famulus tuus ille haec in praesenti conventu et in huius saeculi cursu, te adiuvante, peragat et peragenda decernat, unde tibi in perpetuum placere valeat.
1801	Deus qui misericordia ... potiora dependas.
	Deus, qui misericordia tua praevenis non petentes, da nobis affectum maiestatem tuam iugiter deprecandi, ut pietate perpetua supplicibus potiora dependas.
1802	Deus qui misericordiae ... semitis deviemus.
	Deus, qui misericordiae ianuam fidelibus patere voluisti, respice in nos et miserere nostri, ut, qui voluntatis tuae viam, donante te, sequimur, a vitae numquam semitis deviemus.
1803a	Deus qui misericordiae ... sit quieta.
	Deus, qui misericordiae tuae potenti auxilio et prospera tribuis et adversa depellis, universa obstacula, quae servis tuis adversantur, expugna, ut, remoto terrore bellorum, et libertas secura et religio sit quieta.
1803b	Deus qui misericordiae ... actione laudemus.
	Deus, qui misericordiae tuae potenti auxilio et prospera tribuis et adversa depellis, universa obstacula, quae famulo tuo illi adversantur, expugna, ut, remotis temptationibus universis, indefessa te gratiarum actione laudemus.
1804	Deus qui misisti ... nostris habitationem.
	Deus, qui misisti filium tuum et ostendisti creaturae creatorem, respice propitius super nos famulos tuos et praepara hagiae sophiae dignam in cordibus nostris habitationem.
1805	Deus qui multiplicas ... profectibus filiorum.
	Deus, qui multiplicas ecclesiam tuam in subole renascentium, fac eam gaudere propitius de suorum profectibus filiorum.
1806	Deus qui multiplicas ... venia peccatorum.
	Deus, qui multiplicas subolem renascentium, fac eos gaudere propitius de suorum venia peccatorum.
1807	Deus qui multis ... committimus patrociniis.
	Deus, qui multis ostendisti mirabilius sanctum Swithunum pontificem tibi esse pretiosum, ipsius nobis praesta suffragia et concede, ut non ad poenas inferni sed ad coronam deputemur caelestem, qui huius patronis nos committimus patrociniis.
1808	Deus qui multitudinem ... te patrocinia sentiamus.
	Deus, qui multitudinem gentium beati Pauli apostoli praedicatione docuisti, da nobis, quaesumus, ut, cuius natalicia colimus, eius apud te patrocinia sentiamus.
1809	Deus qui multitudinem ... etiam patrocinia sentiamus.
	Deus, qui multitudinem populorum beati Bonifatii pontificis atque martyris instantia ad agnitionem tui sancti nominis vocare dignatus es, concede propitius, ut, cuius sollemnia colimus, etiam patrocinia sentiamus.
1810	Deus qui mysteriorum ... nostra servitia.
	Deus, qui mysteriorum tuorum dignanter operaris effectus, praesta, quaesumus, ut sacris apta muneribus fiant nostra servitia.
1811	Deus qui nativitatis ... perfice mandatorum.
	Deus, qui nativitatis tuae exordium, pro nostra necessarium salvatione, duxisti, respice nos propitius et, quos similes ad imaginem tuam fecisti, similiores observatione perfice mandatorum.
1812	Deus qui nec ... protectione custodis.
	Deus, qui nec ecclesiae tuae usque ad consummationem te saeculi defuturum nec inferni portas apostolicae confessioni praevalituras esse promisisti, in nostra quoque perfice propitius infirmitate virtutem, et divinae pollicitationis effectum, dum etiam infirmis tuis inesse dignaris, ostende, quia praesentiam tuam sine dubitatione sentimus, cum et singulis quibusque temporibus convenienter aptanda dispensas et nos a totius adversitatis incursu perpeti protectione custodis.
1813	Deus qui neminem ... mereamur adversis.
	Deus, qui neminem, in te sperantem, nimium affligi permittis sed pium precibus praestas auditum, pro postulationibus nostris votisque susceptis gratias agimus, te piissime deprecantes, ut per haec, quae sumpsimus, a cunctis eripi mereamur adversis.
1814	Deus qui neophytos ... culparum attribue.
	Deus, qui neophytos tuos maiori animarum quam vestium nitore vestisti, ut plus acciperent, quam habere se noverint, praesta, ut, sicut donum tuum eorum intellectum exsuperat, ita in eis ultra aetatem fides cum intellegentia placitis tibi operibus coalescat. Nobis quoque per mortem Iesu Christi filii tui pacis dona largire et veniam culparum attribue.
1815	Deus qui Ninivitis ... misericordiam largiaris.
	Deus, qui Ninivitis, pro peccatis suis ieiunantibus, pepercisti, te supplices deprecamur, ut et nobis in hoc ieiunio nostrorum indulgentiam per solitam misericordiam largiaris.
1816	Deus qui nobilissimum ... muniamur adversis.
	Deus, qui nobilissimum regem Edwardum necis interitu contemptibilissimae martyrizari permisisti, quo eum sublimiter ad regnum perduceres caeleste, praesta, quaesumus, ut, eiusdem sancti martyris suffragantibus meritis, a cunctis muniamur adversis.
1817	Deus qui nobis ... quod praecipis.
	Deus, qui nobis ad celebrandum paschale sacramentum liberiores animos praestitisti, doce nos et metuere, quo(d) irasceris, et amare, quod praecipis.
1818	Deus qui nobis ... in operibus
	Deus, qui nobis ad relevandos istius vitae labores diversa donorum tuorum solatia et gaudia contulisti, quibus insignes annuis recursibus dies agimus et ecclesiae tuae vota sollemnia praesenti festivitate celebramus... Unde et proxime natalem domini salvatoris peregimus, qui nobis natus in tempore est, qui, de te natus sine tempore, omnium saeculorum et temporum est antecessor et conditor. deinde subsecutum diem circumcisionis octavum, unigeniti luce signatum, pari observantia recolentes, sacrificiis sollemnibus honoravimus. Nunc epiphaniae diem, revelantem in homine divinitatem, excolimus, diversa domini nostri Iesu Christi filii tui in hoc mundo suum adventum manifestantia insignia praedicantes; sive quod stellam, ortus sui nuntiam, misit e caelo, quam stupentibus magis usque ad cunabula suae carnalis infantiae praeviam fecit; sive quod aquas, baptismate suo ad omnium gentium lavationem Iordanis alveum sanctificaturus, intravit, ubi ipsum esse filium unigenitum dilectum tuum spiritu, columbae specie advolante, monstrasti et paterna insuper voce docuisti; sive quod primum in Cana Galilaeae prodidit signum, cum in convivio nuptiali aquas in vinum convertit, alto et admirabili sacramento docens, quod a saeculis sponsae sibi iungendus ecclesiae advenerat et ad vinum prudentiae spiritalis saporis fidem veritatis esse mutandam. Itaque ex his tribus mirabilium tuorum causis fide hodiernae sollemnitatis edita, dominus noster Iesus Christus filius tuus nihilominus tuae virtus operationis et nostrae salutis praeparatio est. Propterea, domine, secundum haec tria magna mirabilia maneat in nobis gratiae spiritalis integritas; sapiat in cordibus nostris vinum prudentiae; fulgeat in operibus
1819	Deus qui no(bi)s ... orationibus adiuvari.
	Deus, qui no(bi)s beatorum apostolorum Petri et Pauli natalicia gloriosa praeire concedis, tribue, quaesumus, eorum nos semper et beneficiis praeveniri et orationibus adiuvari.
1820	Deus qui nobis ... commercio reparati.
	Deus, qui nobis nati salvatoris diem celebrare concedis octavum, fac, quaesumus, nos eius perpetua divinitate muniri, cuius sumus carnali commercio reparati.
1821	Deus qui nobis ... et meritis adiuvemur.
	Deus, qui nobis per beatum Hieronymum confessorem sacerdotemque tuum scripturae sanctae veritatem et mystica sacramenta revelare dignatus es, praesta, quaesumus, ut, cuius natalicia colimus, eius semper et erudiamur doctrinis et meritis adiuvemur.
1822	Deus qui nobis ... semper meritis adiuvemur.
	Deus, qui nobis per beatum Nicolaum confessorem tuum sacerdotemque novarum virtutum gloriosa miracula operari dignatus es, praesta, quaesumus, ut, qui eius natalicia colimus, eius semper meritis adiuvemur.
1823	Deus qui nobis ... operari valeamus.
	Deus, qui nobis per ministerium beati Marci evangelistae et martyris tui veritatem evangelii patefieri voluisti, concede, quaesumus, ut, quod ab illius ore didicimus, gratia tua adiuti, operari valeamus.
1824	Deus qui nobis ... abutamur antiquis.
	Deus, qui nobis per prophetiam praecursoris tui Ioannis obumbratarum significationum figuras, aperta veritatis tuae manifestatione, monstrasti, tribue nobis intellegentiae lumen et pacis perpetuae caritatem, ut, gratia succedente pro gratia, sic gloriemur in novis, ut, in caritatis unitate constituti, non abutamur antiquis.
1825	Deus qui nobis ... impetrasse laetetur.
	Deus, qui nobis per singulos annos huius sancti templi tui consecrationis reparas diem et sacris semper mysteriis repraesentas incolumes, exaudi preces populi tui et praesta, ut, quisquis hoc templum, beneficia petiturus, ingreditur, cuncta se impetrasse laetetur.
1826	Deus qui nobis ... iugiter famulemur.
	Deus, qui nobis salutarem hodierna die in beati Lamperti martyris tui atque pontificis festivitate dedisti laetitiam, praesta, quaesumus, ut et conversationis eius experiamur insignia et intercessione eius placita tibi mente iugiter famulemur.
1827	Deus qui nobis ... et precibus.
	Deus, qui nobis sanctum pontificem Athelwoldum salutis aeternae doctorem tribuisti, concede propitius, ut, cuius annua translationis sollemnia colimus, eius semper meritis adiuvemur et precibus.
1828	Deus qui nobis ... iugiter sentiamus.
	Deus, qui nobis sub sacramento mirabili passionis tuae memoriam reliquisti, tribue, quaesumus, ita nos corporis et sanguinis tui sacra mysteria venerari, ut redemptionis tuae fructum in nobis iugiter sentiamus.
1829a	Deus qui non ... tuae prosperitas.
	Deus, qui non despicis corde contritos et afflictos miseriis, populum tuum, ieiunii ad te devotione clamantem, propitiatus exaudi, ut, quos humiliavit adversitas, attollat reparationis tuae prosperitas.
1829b	Deus qui non ... reparationis prosperitas.
	Deus, qui non despicis contritos corde et afflictos miseriis, populum tuum, ieiunii ad te devotione clamantem, propitiatus exaudi, ut, quos humiliavit adversitas, attollat tuae reparationis prosperitas.
1830	Deus qui non ... flagella amoveas.
	Deus, qui non mortem sed paenitentiam desideras peccatorum, populum tuum, quaesumus, ad te converte propitius, ut, dum tibi devotus exstiterit, iracundiae flagella amoveas.
1831	Deus qui non ... gubernare concede.
	Deus, qui non propriis suffragantibus meritis sed sola ineffabili gratiae largitate me familiae tuae praeesse iussisti, tribue tibi digne persolvere ministerium sacerdotalis officii et ecclesiasticis convenienter servire ministeriis plebemque commissam, te in omnibus protegente, gubernare concede.
1832	Deus qui non ... conscribi praecipias.
	Deus, qui non tantum nos a carnalibus cibis sed ab ipsius animae noxiis delectationibus praecipis ieiunare, sic nobis, quaesumus, indulgentiae tuae praebe subsidium, ut, ieiunando ab illicitis contagiis, ad superna crescamus et nomina, quae recitata sunt, in caelesti pagina conscribi praecipias.
1833	Deus qui non ... poenam effugiant.
	Deus, qui non ultione sed satisfactione delectaris, exaudi preces, quas tuae pietati pro adversariis nostris fundimus, ut, tuo timore compuncti, quos contristant, sua laetificando correctione, malitiae poenam effugiant.
1834a	Deus qui nos a ... consortia consequi mereamur.
	Deus, qui nos a delictorum facinoribus castigas nostrorum, tuorum participatione sacramentorum expias, praesta, quaesumus, ut beati Gregorii meritis et a cunctis vitiorum adversitatibus eruamur et caelestis vitae consortia consequi mereamur.
1834b	Deus qui nos ... deliciis perfruamur.
	Deus, qui nos a delictorum contagiis tuorum expias perceptione sacramentorum, praesta, quaesumus, ut beati Swithuni confessoris tui atque pontificis meritis a cunctis eruamur adversis et caelestis vitae deliciis perfruamur.
1834c	Deus qui nos ... gaudiis perfruamur.
	Deus, qui nos famulos tuos a peccatorum contagiis per receptionem sacramentorum tuorum laetificas, tribue, quaesumus, ut intercessione beatissimi confessoris tui Dubricii atque pontificis a cunctis adversitatibus, quibus incessanter impugnamur, eruamur et caelestibus gaudiis perfruamur.
1834d	Deus qui nos delictorum ... consortia consequi mereamur.
	Deus, qui nos delictorum nostrorum facinoribus castigas, tuorum sacramentorum participatione expias, praesta, quaesumus, ut meritis beati Vigilii martyris tui atque pontificis a cunctis vitiorum adversitatibus eruamur et caelestis vitae consortia consequi mereamur.
1835	Deus qui nos ... promittere pertingamus.
	Deus, qui nos, a saeculi vanitate conversos, ad supernae vocationis bravium accendis, pectoribus nostris purificandis illabere et gratiam nobis, qua in te perseveremus, infunde, ut, protectionis tuae muniti praesidio, quod, te donante, promisimus, impleamus, ut, nostrae professionis exsecutores effecti, ad ea, quae perseverantibus in te dignatus es promittere, pertingamus.
1836	Deus qui nos ... precibus imploremus.
	Deus, qui nos ad anniversarium diem (consecrationis) huius ecclesiae tribuisti venire, concede, quaesumus, ut, quidquid in tuo nomine petituri intraverimus, sanctorum tuorum precibus imploremus.
1837	Deus qui [nos] ... foveamur auxilio.
	Deus, qui [nos] ad celebrandum beatae Fidis virginis et martyris tuae triumphum venerabilem tuorum excitas corda fidelium, da, ut, quam sollemni veneramur officio, eius continuo foveamur auxilio.
1838	Deus qui nos ... sacramentis renovas et praeceptis perfice gressus nostros in semitis tuis ut caritatis donum quod fecisti a nobis sperari per haec quae offerimus facias
	Deus, qui nos ad imaginem tuam <et> sacramentis renovas et praeceptis, perfice gressus nostros in semitis tuis, ut caritatis donum, quod fecisti a nobis sperari, per haec, quae offerimus, facias sacrificia apprehendi.
1839	Deus qui nos ... obtineant hostiarum.
	Deus, qui nos ad imaginem tuam et sacramentis renovas et praeceptis, supplicum preces et munera benignus accepta, ut, quod fiducia non habet meritorum, placationes obtineant hostiarum.
1840a	Deus qui nos ... celebremus officiis.
	Deus, qui nos ad sancti pontificis et martyris tui Xysti natalicia tribuisti pervenire laetantes, praesta, quaesumus, ut, sicut securis eadem mentibus, ita dignis celebremus officiis.
1840b	Deus qui nos ... iuvemur auxiliis.
	Deus, qui nos ad sancti Hilarii confessoris tui atque pontificis depositionem tribuisti pervenire laetantes, praesta, quaesumus, ut, sicut celebramus officiis, ita iuvemur auxiliis.
1841	Deus qui nos ... instruamur exemplis.
	Deus, qui nos annua apostolorum tuorum Philippi et Iacobi sollemnitate laetificas, praesta, quaesumus, ut, quorum gaudemus meritis, instruamur exemplis.
1842	Deus qui nos annua ... conversationis sequamur exemplo.
	Deus, qui nos annua beatae Agnes martyris tuae sollemnitate laetificas, da, quaesumus, ut, quam veneramur officio, etiam piae conversationis sequamur exemplo.
1843	Deus qui nos ... passionis imitemur.
	Deus, qui nos annua beati Cyriaci martyris tui sollemnitate laetificas, concede propitius, ut, cuius natalicia colimus, virtutem quoque passionis imitemur.
1844	Deus qui nos ... ambigamur incendiis.
	Deus, qui nos annua beati confessoris tui David festivitatis exspectatione laetificas, praesta, quaesumus, ut per haec sacrosancta mysteria, quae in eius tibi honorem attulimus, a praeteritis liberemur peccatis et futuris non ambigamur incendiis.
1845	Deus qui nos ... gaudere profectu.
	Deus, qui nos annua beati Hieronymi confessoris tui festivitate laetificas, da nobis, eius intervenientibus meritis, et perpetua proiectione muniri et salutari gaudere profectu.
1846	Deus qui nos ... securitatis augmentum.
	Deus, qui nos annua beati Ioannis baptistae sollemnia frequentare concedis, praesta, quaesumus, ut et devotis eadem mentibus celebremus et, eius patrocinio promerente, plenae capiamus securitatis augmentum.
1847a	Deus qui nos annua ... praebente mereamur in caelis.
	Deus, qui nos annua beati Marci evangelistae et martyris tui celebritate laetificas, pietatis tuae largitate concede, ut, cuius honoris debitum victoriae triumphum pio amore veneramur in terris, societatis eius laetitiam adipisci, te praebente, mereamur in caelis.
1847b	Deus qui nos beati ... mereamur in caelis.
	Deus, qui nos beati Marci evangelistae et martyris tui sollemnitate laetificas, pietatis tuae largitate concede benignus, ut, cuius triumphum pio amore veneramur in terris, societatis eius laetitiam adipisci, te largiente, mereamur in caelis.
1847c	Deus qui nos annua ... largiente mereamur in caelis.
	Deus, qui nos annua beati Marci evangelistae et martyris tui gloriosa passionis sollemnitate laetificas, solita pietatis tuae largitate concede benignus, ut, cuius honoris famosum victoriae triumphum pio amore veneramur in terris, societatis eius laetitiam adipisci, te largiente, mereamur in caelis.
1848	Deus qui nos ... provocemur exemplis.
	Deus, qui nos annua beatorum martyrum tuorum Marcellini et Petri sollemnitate laetificas, praesta, quaesumus, ut, quorum gaudemus meritis, provocemur exemplis.
1849a	Deus qui nos ... nobis adesse sentiamus.
	Deus, qui nos annua beatorum martyrum Timothei et Apollinaris sollemnitate laetificas, eorum, quaesumus, continua intercessione super nos misericordiam tuam multiplica, ut, quorum patrociniis gratulamur, etiam perpetuae salutis auxilium nobis adesse sentiamus.
1849b	Deus qui nos ... auxilium adesse sentiamus.
	Deus, qui nos annua beati Wilfridi confessoris tui atque pontificis sollemnitate laetificas, eius, quaesumus, continua intercessione super nos misericordiam tuam multiplica, ut, cuius patrociniis gratulamur, ipsius suffragiis perpetuae salutis nobis auxilium adesse sentiamus.
1850	Deus qui nos ... habere mereamur.
	Deus, qui nos annua praeclarae inventionis sanctorum tuorum Stephani, Gamalielis, Nicodemi atque Abibon sollemnitate laetificas, praesta, quaesumus, ut, quos, in caelesti gloria sublimatos, miraculis in terra declarasti, apud paternae pietatis tuae clementiam intercessores semper habere mereamur.
1851	Deus qui nos ... accendamur exemplis.
	Deus, qui nos annua sanctorum tuorum Protasii et Gervasii sollemnitate laetificas, concede propitius, ut, quorum gaudemus meritis, accendamur exemplis.
1852	Deus qui nos ... exstitit praedicator.
	Deus, qui nos annua sollemnitate beati illius confessoris tui atque pontificis laetificas, praesta, ut pro nobis pius Intercessor exsistat, qui tui nominis devotus exstitit praedicator.
1853	Deus qui nos ... oboedire mandatis.
	Deus, qui nos beatae illius diem concedis venerari sollemnem, fac nos, eius suffragantibus meritis, tuis semper oboedire mandatis.
1854	Deus qui nos ... semper sequamur exemplo.
	Deus, qui nos beatae Mariae semper virginis et beatorum apostolorum, martyrum, confessorum, virginum atque omnium simul sanctorum continua laetificas sollemnitate, praesta, quaesumus, ut, quos cottidiano veneramur officio, etiam piae conversationis semper sequamur exemplo.
1855	Deus qui nos ... transferre dignare.
	Deus, qui nos beati Andreae apostoli tui veneranda laetificas translatione, eius intercessione ad tuae visionis claritatem nos transferre dignare.
1856	Deus qui nos ... intercessionibus adiuvemur.
	Deus, qui nos beati Deus dedit confessoris tui atque pontificis sollemnia celebrare concedis, eius, quaesumus, semper meritis et intercessionibus adiuvemur.
1857	Deus qui nos ... ad regnum.
	Deus, qui nos beati Edmundi confessoris tui atque pontificis translationem celebrare concedis, te supplices exoramus, ut eius meritis et precibus a vitiis ad virtutes et a carcere transferamur ad regnum.
1858	Deus qui nos ... exempla gradiamur.
	Deus, qui nos beati Eusebii confessoris tui annua sollemnitate laetificas, concede propitius, ut, cuius natalicia colimus, per eius apud te exempla gradiamur.
1859	Deus qui nos ... est redemptio.
	Deus, qui nos beati Eustachii ac sociorum eius sollemnitate laetificas et salutarium sacramentorum perceptione confortas, da, quaesumus, ut ad eum nos sanctorum ducat intercessio, qui nobis fieri dignatus est redemptio.
1860	Deus qui nos ... gratiae consequamur.
	Deus, qui nos beati Georgii martyris tui meritis et intercessione laetificas, concede propitius, ut, qui eius beneficia poscimus, dono tuae gratiae consequamur.
1861	Deus qui nos ... semper patrocinia sentiamus.
	Deus, qui nos beati Gregorii confessoris tui atque pontificis annua sollemnitate laetificas, concede propitius, ut, cuius opere atque doctrina scripturae tuae mysteria multa cognovimus, eius apud te semper patrocinia sentiamus.
1862	Deus qui nos ... pervenire mereamur.
	Deus, qui nos beati Guthlaci confessoris tui annua sollemnitate laetificas, concede propitius, ut, sicut ille per ardua solitariae vitae instituta ad tuae visionis gaudia pervenit, ita ipsius intercessione ad eadem pervenire mereamur.
1863	Deus qui nos beati ... et orationibus adiuvari.
	Deus, qui nos beati Helani confessoris tui natalicia gloriosa celebrare concedis, tribue, quaesumus, eius nos semper et beneficiis attolli et orationibus adiuvari.
1864	Deus qui nos ... intercedere sentiamus.
	Deus, qui nos beati Ignatii martyris tui atque pontificis triumphum venerabilem celebrare concedis, da nobis, quaesumus, in eius veneratione laetitiam, ut, cuius in terris devote sollemnia colimus, eum semper in caelis intercedere sentiamus.
1865	Deus qui nos ... meritis adiuvari.
	Deus, qui nos beati Ioannis baptistae concedis natalicio perfrui, eius nos tribue meritis adiuvari.
1866	Deus qui nos ... quod docuit.
	Deus, qui nos beati Marci evangelistae concedis natalicio perfrui, da ecclesiae tuae, quaesumus, et amare, quod credidit, et praedicare, quod docuit.
1867	Deus qui nos ... actiones imitemur.
	Deus, qui nos beati martyris tui Caesarii annua sollemnitate laetificas, concede propitius, ut, cuius natalicia colimus, etiam actiones imitemur.
1868	Deus qui nos ... nostrum Iesum.
	Deus, qui nos beati protomartyris tui Stephani hodierna inventione laetificas, da nobis per haec sancta, quae sumpsimus, eius benevolentiam interna pace sectari, qui etiam pro inimicis, cum lapidaretur, exoravit dominum nostrum Iesum.
1869	Deus qui nos ... protectione gaudeamus.
	Deus, qui nos beati Stephani martyris tui atque pontificis annua sollemnitate laetificas, concede propitius, ut, cuius natalicia colimus, de eiusdem etiam protectione gaudeamus.
1870	Deus qui nos ... oratione fulciri.
	Deus, qui nos beati Theodori martyris tui confessione gloriosa circumdas et protegis, praesta nobis eius imitatione proficere et oratione fulciri.
1871	Deus qui nos ... gloriam consequamur.
	Deus, qui nos beatorum monachorum tuorum commemoratione laetificas, concede propitius, ut, sanctae conversationis exempla sectantes, eorum intercessionibus remissionem omnium peccatorum et immortalitatis gloriam consequamur.
1872	Deus qui nos ... sine fine.
	Deus, qui nos columbarum simplicitate doces esse mitissimos, effice nos Columbae virginis tuae precibus in caritate perfectos, ut, innocentiam retinentes ad invicem, in pace tua mereamur consistere sine fine.
1873	Deus qui nos ... posse cantare.
	Deus, qui nos concedis alleluiatici cantici deducendi sollemnia celebrare, da nobis in aeterna beatitudine cum sanctis tuis, alleluia cantantibus, perpetuum feliciter alleluia posse cantare.
1874a	Deus qui nos concedis sanctorum martyrum tuorum Felicissimi ... societate gaudere.
	Deus, qui nos concedis sanctorum martyrum tuorum Felicissimi et Agapiti natalicia colere, da nobis in aeterna laetitia de eorum societate gaudere.
1874b	Deus qui nos ... illorum societate gaudere.
	Deus, qui nos concedis hodierna die reliquiarum sanctorum tuorum Stephani, Nicodemi, Gamalielis atque Abibon inventionis sollemnia colere, tribue nobis, quaesumus, in aeterna laetitia de illorum societate gaudere.
1874c	Deus qui nos concedis sanctorum apostolorum martyrum ... societate gaudere.
	Deus, qui nos concedis sanctorum apostolorum, martyrum et confessorum atque omnium simul iustorum continuis sollemnia colere sacramentis, da nobis in aeterna laetitia de eorum societate gaudere.
1874d	Deus qui nos concedis sanctorum tuorum Stephani ... societate gaudere.
	Deus, qui nos concedis sanctorum tuorum Stephani, Nicodemi, Gamalielis et Abibae inventionem gloriosam celebrare, da nobis in aeterna beatitudine de eorum societate gaudere.
1875	Deus qui nos conceptionis ... mereamur in caelis.
	Deus, qui nos conceptionis, nativitatis, annunciationis, visitationis, purificationis et assumptionis beatae et gloriosae virginis Mariae gaudia recolendo laetificas, concede nobis sic laudibus eius et servitio digne insistere, ut eam in omni necessitate et angustia et praecipue in hora mortis praesentem et auxiliatricem sentiamus et tecum post mortem per ipsam et cum ipsa gaudere mereamur in caelis.
1876	Deus qui nos ... exempla restaura.
	Deus, qui nos conspicis ex nostra infirmitate deficere, ad amorem tuum nos misericorditer per sanctorum tuorum exempla restaura.
1877	Deus qui nos ... meremur averte.
	Deus, qui nos conspicis in tot perturbationibus non posse subsistere, afflictorum gemitum propitius respice et mala omnia, quae meremur, averte.
1878	Deus qui nos ... salutaria condonentur.
	Deus, qui nos de praesentibus adiumentis esse vetuisti sollicitos, tribue, quaesumus, ut, pie sectando, quae tua sunt, universa nobis salutaria condonentur.
1879	Deus qui nos ... ad coronam.
	Deus, qui nos de spe misericordiae tuae hac prima ratione voluisti confiteri, ut martyrum tuorum, quorum hic reliquias veneramur, et praesentia et auxilio circumdares, ut haberet et oratio nostra suffragium et vita patrocinium, illorum sanctorum intercessione hoc munere custodi [igitur, quaesumus, domine, ] ecclesiam tuam, custodi locum istum vel omnes convenientes in eum suffragio sancti martyris tui illius; fiatque nobis ipse auxiliator e caelo, qui ad te praesenti migravit e saeculo; sitque haec vicissim retributio muneris tui, ut mereatur hic locus martyris gratiam, qui misit eundem martyrem ad coronam.
1880	Deus qui nos ... etiam patrocinia sentiamus.
	Deus, qui nos devota beati Hrodperti confessoris tui atque pontificis instantia ad agnitionem tui sancti nominis vocare dignatus es, concede propitius, ut, cuius sollemnia colimus, etiam patrocinia sentiamus.
1881	Deus qui nos ... conferat gratiam.
	Deus, qui nos et caelestibus pascere sacramentis et beati confessoris et antistitis tui Syri non desinis fovere praesidiis, praesta, quaesumus, ut, quod illi gloriam contulit sempiternam, nobis optatam conferat gratiam.
1882a	Deus qui nos ... emundatione fulgere.
	Deus, qui nos et sanctorum martyrum sollemnitatibus et consessorum gloria circumdas et protegis, praesta nobis eorum semper et imitatione proficere et emundatione fulgere.
1882b	Deus qui nos ... sanctorum martyrum Augustini et Felicitatis natalicia et sancti confessoris tui Aniani depositionis gloria circumdas et protegis praesta nobis eorum semper <et
	Deus, qui nos <et> sanctorum martyrum Augustini et Felicitatis natalicia et sancti confessoris tui Aniani depositionis gloria circumdas et protegis, praesta nobis eorum semper <et> imitatione proficere et oratione fulgere.
1883	Deus qui nos ... effectibus gratulari.
	Deus, qui nos exsultantibus animis pascha tuum celebrare tribuisti, fac, quaesumus, nos et temporalibus gaudere subsidiis et aeternitatis effectibus gratulari.
1884	Deus qui nos ... exsultet bonitate.
	Deus, qui nos famulos tuos in beatae martyris tuae Caeciliae victoria Valeriani simul et Tiburtii gaudere fecisti triumphis, tribue, quaesumus, maiestatis tuae misericordiam, ut, sicut eos, tyrannorum superata feritate, laetari fecisti, ita et populus tuus tua semper exsultet bonitate.
1885	Deus qui nos ... auxiliante salvemur.
	Deus, qui nos famulos tuos, in hoc loco sub sancta professione degentes, de tempestatibus huius saeculi eruisti et ad portum monasterii et quietis venire fecisti, concede propitius, ut hic et in perpetuum, te auxiliante, salvemur.
1886	Deus qui nos ... iucunditate remunerari.
	Deus, qui nos fecisti gloriosi confessoris tui Aldelmi translationem spirituali gaudio celebrare, ipsius meritis fac nos cum sanctis angelis perpetuae festivitatis iucunditate remunerari.
1887	Deus qui nos ... regno gaudere.
	Deus, qui nos fecisti hodierna die paschalia festa celebrare, fac nos, quaesumus, in caelesti regno gaudere.
1888	Deus qui nos ... facias adimplere.
	Deus, qui nos formam humilitatis ieiunando et orando unigeniti tui domini nostri imitatione docuisti, concede, quaesumus, ut, quod ille iugi ieiuniorum continuatione complevit, nos quoque per partes dierum facias adimplere.
1889	Deus qui nos ... lucem perducas.
	Deus, qui nos gloriosis remediis, in terris adhuc positos, iam caelestium rerum facis esse consortes, tu, quaesumus, in ista, qua vivimus, nos vita guberna, ut ad illam, in qua ipse es, lucem perducas.
1890	Deus qui nos ... et meritis.
	Deus, qui nos hanc diem in honorem sancti Sampsonis confessoris tui atque pontificis venerabilem excolere fecisti, praesta, quaesumus, ut, quem laetis veneramur obsequiis, eius orationibus muniamur et meritis.
1891	Deus qui nos ... castitatis irradiamur exemplis.
	Deus, qui nos hodie beatae et sanctae illius virginis martyrisque annua sollemnitate laetificas, concede propitius, ut eius adiuvemur meritis, cuius castitatis irradiamur exemplis.
1892	Deus qui nos hodierna ... et orationibus adiuvari.
	Deus, qui nos hodierna die beatissimorum martyrum tuorum Hermachorae et Fortunati multiplici facis celebritate gaudere, tribue, quaesumus, eorum nos semper piis defensionibus muniri et orationibus adiuvari.
1893	Deus qui nos ... praemia consequi mereamur.
	Deus, qui nos hodierna die exaltationis sanctae crucis annua sollemnitate laetificas, praesta, ut, cuius mysterium in terra cognovimus, eius redemptionis praemia consequi mereamur.
1894	Deus qui nos ... miseratus auxilium.
	Deus, qui, nos idoneos non esse perspiciens ad magnificentiam tuam, sicut dignum est, exorandam, eorum nobis, qui tibi placuerunt, praesidia contulisti, praesta, ut eorum precibus adiuvemur, quorum providisti nobis miseratus auxilium.
1895	Deus qui nos in ... gaudia aeterna mereamur.
	Deus, qui nos in commemoratione beati Martini sacerdotis tui atque pontificis gratia potiore laetificas, concede propitius, ut et per sancta, quae sumpsimus, et eius pro nobis intervenientia merita, pertingere ad gaudia aeterna mereamur.
1896	Deus qui nos ... auxi io.
	Deus, qui nos in sanctorum martyrum multiplicatione custodis, da, ut, quorum sollemnia frequentamus, incessabili iuvemur auxi io.
1897	Deus qui nos ... sequamur exemplis.
	Deus, qui nos in sanctorum sollemnitate laetificas et imitatione excitas ad profectum, tribue, ut, quos veneramur meritis martyrum, piae conversationis sequamur exemplis.
1898	Deus qui nos ... adiuvante vincamus.
	Deus, qui nos, in tantis periculis constitutos, pro humana scis fragilitate non posse subsistere, da nobis salutem mentis et corporis, ut ea, quae pro peccatis nostris patimur, te adiuvante, vincamus.
1899	Deus qui nos ... submoveat ultionem.
	Deus, qui nos iustus iudex arguis, accepta hoc sacrificium nostrum tuumque a nobis amove flagellum, quo haec merita inter viventes ac defunctos consistens oblatio et a vivis cladem et a mortuis tartaream submoveat ultionem.
1900	Deus qui nos ... mereamur coniungi.
	Deus, qui nos omnium sanctorum commemoratione laetificas, eorum, quaesumus, precibus et meritis fac nos aeternae salvationis praesidiis muniri et concede, ut in eorum beata societate mereamur coniungi.
1901	Deus qui nos omnium ... et intercessione gaudere.
	Deus, qui nos omnium sanctorum tuorum veneranda commemoratione laetificas, da nobis et eorum imitatione proficere et intercessione gaudere.
1902	Deus qui nos ... esse valeamus.
	Deus, qui nos pastores in populo vocari voluisti, praesta, quaesumus, ut hoc, quod humano ore dicimur, in tuis oculis esse valeamus.
1903	Deus qui nos ... fac videre.
	Deus, qui nos patrem et matrem honorare praecepisti, miserere clementer animabus patris et matris meae eorumque peccata dimitte meque eos in aeternae claritatis gaudio fac videre.
1904	Deus qui nos ... remedia largiantur.
	Deus, qui nos per apostolum tuum propriis manibus victum quaerere praecepisti, sanctarum tuarum Iustae et Rufinae precibus spiritalem nobis attribue victum et cottidianum piae miserationis subsidium, ut hae virgines, quae suis manibus et propriae saluti et indigentiae provisores inopum exstiterunt, suis suffragiis tam viventibus quam defunctis congrua remedia largiantur.
1905	Deus qui nos ... sollemnitatem celebrare.
	Deus, qui nos per beatam martyrem tuam illam ad cognitionem nominis tui venire tribuisti, da nobis per eius gloriam passionis sempiternam tuam gratiam amplecti et proficiendo eius sollemnitatem celebrare.
1906	Deus qui nos ... celebrando proficere.
	Deus, qui nos per beatos apostolos tuos ad cognitionem tui nominis venire tribuisti, da nobis eorum gloriam sempiternam et proficiendo celebrare et celebrando proficere.
1907	Deus qui nos ... moribus assequamur.
	Deus, qui nos per huius sacrificii veneranda commercia unius summae divinitatis participes effecisti, praesta, quaesumus, ut, sicut tuam cognoscimus veritatem, sic eam dignis moribus assequamur.
1908	Deus qui nos ... devotionis irradiamur exemplis.
	Deus, qui nos per ineffabilem misericordiam tuam annua sponsae filii tui Glodesindis sollemnitate laetificas, concede propitius, ut, cuius festivitatem laudibus veneramur, etiam piae devotionis irradiamur exemplis.
1909	Deus qui nos ... fideliter teneamus.
	Deus, qui nos per paschalia festa laetificas, concede propitius, ut ea, quae devote agimus, te adiuvante, fideliter teneamus.
1910	Deus qui nos ... quod vivimus.
	Deus, qui nos per temporalia ducis ad aeterna, praetende misericordiam tuam ad caelestia promissa nitentibus et, quia tuum est, quod in te credimus, tuum sit omne, quod vivimus.
1911	Deus qui nos ... fine gaudeamus.
	Deus, qui nos per unigeniti tui membra ad caelestem vitam semper informas, concede propitius, ut, qui beati Alexii confessoris tui sollemnia colimus, de eiusdem in te gloria sine fine gaudeamus.
1912	Deus qui nos ... peccatorum remissione sanctificasti concede ut pietatis eius compunctionem et devotionis habere
	Deus, qui nos per unigenitum tuum beatae Mariae Magdalenae dilectione multa <et> peccatorum remissione sanctificasti, concede, ut pietatis eius compunctionem et devotionis habere praemia mereamur.
1912bis	Deus qui [nos] ... reperire subsidium.
	Deus, qui [nos] per unigenitum tuum beatae Mariae Magdalenae dilectionem multa peccatorum remissione sanctificasti, concede, ut pietatis eius compunctionem et devotionis habere praemia mereamur. Exaudi, domine populum tuum, cum sanctorum tuorum tibi patrocinio supplicantem, ut (et) temporalis vitae nos tribuas pace gaudere et aeternae reperire subsidium.
1913	Deus qui nos ... fraude protegere.
	Deus, qui nos pii confessoris tui Benedicti voluisti magisteriis erudiri, eius meritis dignare ab omni insidiatoris fraude protegere.
1914	Deus qui nos ... iugiter maneamus.
	Deus, qui nos praesentem festivitatem in Iesu Christi filii tui et Mariae virginis matris eius laudibus venerari fecisti, praesta, quaesumus, ut, qui eiusdem virginis humilitatis et gaudiorum, quibus Elizabeth visitavit, sollemnia celebramus, in eorum memoria et gaudiis iugiter maneamus.
1915	Deus qui nos ... securi videamus.
	Deus, qui nos redemptionis nostrae annua exspectatione laetificas, praesta, ut unigenitum filium tuum, quem redemptorem laeti suscepimus, venientem quoque iudicem securi videamus.
1916	Deus qui nos ... aeterna largire.
	Deus, qui nos regendo conservas, parcendo iustificas, et a temporali tribulatione nos eripe et gaudia nobis aeterna largire.
1917	Deus qui nos resurrectionis ... gaudia aeterna mereamur.
	Deus, qui nos resurrectionis dominicae annua sollemnitate laetificas, concede propitius, ut per temporalia festa, quae agimus, pervenire ad gaudia aeterna mereamur.
1918a	Deus qui nos ... suscipere mereamur.
	Deus, qui nos resurrectionis dominicae et ascensionis eius laetabunda sollemnia celebrare fecisti, da famulis tuis, ut advenientis sancti spiritus gratiam purificatis mentibus suscipere mereamur.
1918b	Deus qui nos ... mereamur purificatis.
	Deus, qui nos ascensionis dominicae laetabunda sollemnia officiis praeire fecisti, da nobis famulis tuis, ut gratiam advenientis spiritus sancti mentibus suscipere mereamur purificatis.
1919	Deus qui nos ... munus aptemur.
	Deus, qui nos sacramenti tui participatione contingis, virtutis eius effectus in nostris cordibus operare, ut suscipiendo muneri tuo per ipsum munus aptemur.
1920	Deus qui nos sacramenti ... salutaris mysterii portionem.
	Deus, qui nos sacramenti tui veneranda perceptione purificas, da nobis, quaesumus, patrocinia tuorum continuata sanctorum, quibus capere valeamus salutaris mysterii portionem.
1921	Deus qui nos ... conferat sempiternam.
	Deus, qui nos sacramentis tuis pascere non desistis, tribue, quaesumus, ut eorum nobis indulta refectio vitam conferat sempiternam.
1922	Deus qui nos ... fieri particeps.
	Deus, qui nos sacrum transfigurationis diem devotis hodie laudibus praeire concedis, tribue nobis, quaesumus, ad tuam contemplationem perungere, qui nostrae humanitatis dignatus es fieri particeps.
1923	Deus qui nos ... gaudere suffragiis.
	Deus, qui nos sanctae virginis tuae tribuis communicare memoria, eius nos fac semper gaudere suffragiis.
1924	Deus qui nos ... perfrui mereamur.
	Deus, qui nos sanctarum virginum tuarum illarum temporali facis commemoratione gaudere, concede propitius, ut, earum suffragantibus meritis, ab imminentibus periculis liberemur et aeternis gaudiis perfrui mereamur.
1925	Deus qui nos ... mereamur aeterna.
	Deus, qui nos sancti Zenonis sacerdotis et confessoris tui annua beatae confessionis sollemnitate laetificas, praesta, quaesumus, ut, callida hostis incursione, tua freti virtute, devicta, pervenire ad gaudia, ipso intercedente, mereamur aeterna.
1926	Deus qui nos ... salvatione capiamus.
	Deus, qui nos sanctorum confessorum tuorum Remigii, Vedasti, Bavonis, Piatonis atque Wasnulfi sollemnitate laetificas, eorum, domine, intercessione placatus, praesta, quaesumus, ut, quae temporali celebramus actione, perpetua salvatione capiamus.
1927	Deus qui nos ... pro nobis.
	Deus, qui nos sanctorum martyrum munitione conservas, da ecclesiam tuam digne talium celebrare sollemnia et illos tibi iugiter supplicare pro nobis.
1928	Deus qui nos sanctorum ... conversationis sequamur exemplo.
	Deus, qui nos sanctorum tuorum et sollemnitate laetificas et imitatione suscitas ad profectum, praesta, ut, quos veneramur officio, etiam piae conversationis sequamur exemplo.
1929a	Deus qui nos sanctorum ... et intercessione gaudere.
	Deus, qui nos sanctorum tuorum Processi et Martiniani confessionibus gloriosis circumdas et protegis, da nobis eorum et imitatione proficere et intercessione gaudere.
1929b	Deus qui nos ... defende periculis.
	Deus, qui nos sanctorum tuorum beatissimorum spirituum, angelorum archangelorumque, principum et potestatum, dominationum, virtutum, cherubim et seraphim, patriarcharum, prophetarum, apostolorum, martyrum confessorumque et virginum, anachoritarum, coenobitarum omniumque sanctorum concivium supernorum et intercessionibus gloriosis circumdas et protegis, praesta, quaesumus, eorum et imitatione proficere et interpellatione tueri et, intercedentibus sanctis, a cunctis nos defende periculis.
1930	Deus qui nos ... tua gloriosi.
	Deus, qui nos sanctorum tuorum temporali tribuis commemoratione gaudere, praesta, quaesumus, ut, beato Cuthberto interveniente, in ea numeremur sorte salutis, in qua illi sunt gratia tua gloriosi.
1931	Deus qui nos ... adversitatibus liberari.
	Deus, qui nos spiritali cibo potuque caelesti recreasti, concede nobis, quaesumus, intercessione beati Donati martyris tui atque pontificis ab omnibus absolvi peccatis et a cunctis adversitatibus liberari.
1932	Deus qui nos ... pervenire caelestia.
	Deus, qui nos translationem beatissimi confessoris tui atque pontificis Ricardi sollemniter celebrare concedis, tribue nobis, quaesumus, eius meritis et precibus a mundi huius transire miseria et ad gaudia pervenire caelestia.
1933	Deus qui nos unigeniti ... salutaris mysterii portionem.
	Deus, qui nos unigeniti tui clementer incarnatione redemisti, da nobis patrocinia tuorum continuata sanctorum, quibus capere valeamus salutaris mysterii portionem.
1934	Deus qui nos ... salutis aeternae.
	Deus, qui nos veneranda festivitatis hodiernae sollemnia in honorem beati Augustini Anglorum apostoli celebrare fecisti, concede propitius eius nos apud te patrocinio semper adiuvari, cuius sancta praedicatione cognovimus auctorem salutis aeternae.
1935	Deus qui nostra ... visitatione custodi.
	Deus, qui nostra nos conspicis semper infirmitate destitui, adventus tui nos visitatione custodi.
1936	Deus qui nostram ... praesta timorem ut in tuis vigilantes mandatis placere
	Deus, qui nostram laetitiam in tuo <ponis servitio, sancti nominis tui nobis> praesta timorem, ut, in tuis vigilantes mandatis, placere tibi possimus.
1937	Deus qui nova ... indubitanter tenemus.
	Deus, qui nova cum veteribus una pietate et indissona voluntate coniungis, sic Christi tui martyres sub evangelio locans, ut tamen praeire his sub lege in typici cruoris mysterio Macchabaeos sinas atque genere huius martyrii illic fundamenta iacias, hic perfectionem concedas, dona convenienti plebiculae tuae, ut feliciter cum Felicis tui felicitate congaudeat, ut, cuius amore sita et patrocinio fida, coadunata cum Macchabaeorum, concelebrat festa, mereatur interventu eorum et in singulis percipere necessaria et in omnibus adipisci bonorum promissorum futura. Hic hodie, quaesumus, proveniat reis indulgentia, anxiis laetitia, aegris medicina, oppressis libertas, luxuriosis castitas, petulantibus pudicitia, prodigis frugalitas, dissolutis continentia, gastrimargiis parcitas, invidis benignitas, avaris largitas, iracundis patientia, superbis humilitas, vanitates praesentis saeculi inhiantibus spei solatium de vita beata. Te quaesumus, aeterne, terribilis et clementissime Deus, ut Felicis tui ac Macchabaeorum suffragio dones regibus cum tranquillitate iustitiam, sacerdotibus cum sanctitate doctrinam, levitis cum ministerio digno vitam honestam, divitibus cum rerum praesentium vilitate dilectionem supernam, egenis cum sufficientia praesentium beatitudinem futurorum, continentibus castimoniam, virginibus custodiam, viduis defensionem, orphanis tutelam, ut in omnibus omnino singulis singula et omnibus omnia impertiri largiaris et de promptuariis tuis praebere digneris, quo, his potiti donis, numquam a te deserantur, a quo numquam nisi deserentes deseruntur, ut haec plebs ditetur pietatis tuae vicissitudine, ut, quae eum praemisit ad caelum, mereatur ex te petitionis suae sumere donum. Te autem, ut haec obtineas, beatissime Felix martyr, lacrimosis querelis adimus, gemitibus imploramus; ob honorem tibi debitum deo omnipotenti vota persolvimus, caerimonias exhibemus eique te advocatum prae necessitatum nostrarum aerumnis supplicamus, hostias salutares et sacrificium laudis immolamus, quatenus per mysticam oblationem et sacrificium redemptionis nostrae apud eum remedia inveniamus, pro cuius fide te passum indubitanter tenemus.
1938	Deus qui nudatum ... postulaverit adipiscat.
	Deus, qui nudatum corpus Agnetis virginis tuae caelestis stolae obtexisti ex tegmine, vestiatur, quaesumus, ecclesia tua claris vestibus innocentiae et iustitiae claritate, quo in ea et sacerdotum vita nitore castitatis praepolleat et utriusque sexus condicio ea, quae postulaverit, adipiscat.
1939	Deus qui nullum ... implere praecepta.
	Deus, qui nullum respuis sed, quantumvis peccantibus, per paenitentiam pia miseratione placaris, respice propitius ad preces humilitatis nostrae, illumina corda nostra, ut tua valeamus implere praecepta.
1940	Deus qui ob ... abstinere peccatis.
	Deus, qui ob animarum medelam ieiunii devotione castigari corpora praecepisti, concede, ut corda nostra ita pietatis tuae valeant exercere mandata, quatenus ab omnibus possimus semper abstinere peccatis.
1941	Deus qui ob ... gloria iucundamur.
	Deus, qui ob declarandam virginitatis integritatem et fidei meritum ad tactum sanctae Brigidae virginis lignum aridum virere fecisti, concede propitius, ut eius apud tuam misericordiam precibus adiuvemur, cuius non solum castitatis irradiamur exemplis verum etiam miraculorum gloria iucundamur.
1942	Deus qui ob ... perennis sanctificatio.
	Deus, qui ob nostrae regenerationis sacramentum te manibus hominis in Iordane submisisti baptizandum, tribue, quaesumus, ut tuae humanitatis dispensatio, quam praesentium munerum designat oblatio, sit animarum nostrarum perennis sanctificatio.
1943	Deus qui oblationem ... percipiat gloriam.
	Deus, qui oblationem Abrahae patriarchae in unigenito filio suo Isaac et votum Annae in Samuele propheta consecrasti, concede, quaesumus, huic famulo tuo, qui in primaevo iuventutis suae flore maiestati tuae offertur, ut et iugiter in hac domo tua tibi fideliter serviat et mansuram sine fine percipiat gloriam.
1944	Deus qui offensionibus ... a verbere.
	Deus, qui offensionibus servorum tuorum et iuste irasceris et clementer ignoscis, praesta supplicibus indulgentiam peccatorum, ut, reparato statu tibi subditae libertatis, et correptio ab iniquitate et cessatio fiat a verbere.
1945	Deus qui olim ... atteramur aerumna.
	Deus, qui olim in hoc tempore Israelitico populo per Ieremiam vatem salubre pietatis consilium contulisti, quo pristinos errores abicerent, ne patientem per vindictam cognoscerent, quem prius per monita non audissent, convocatum in ecclesia tua sacerdotum ac populorum conventum placatus attende. Agnoscimus mala, quae fecimus, sed veniam postulamus; de vindicta solliciti, causas publicamus delicti, ne puniamur iustitia, si non confiteamur errata. Quia ergo pius es, miserere lugentibus, parce peccantibus, indulge paenitentibus. Non nos interimas pro peccato, adest enim nostra confessio. Quia voluptuose contra te egimus, amaricati ieiunio ad te redimus. Unde quamlibet sint immensa mala, quae gessimus, sed tu multo plus immensae pietatis es dominus, quam rogamus. Dato ergo te nobis per gratiam, ne redeamus ad culpam et deficiamus in poena, ut, indultae nobis pietatis beneficio parcens, et nostro dones pluviam semini et corda nostra repleas seminibus verbi tui, quo et correpta floreat nostra moribus vita et famis non atteramur aerumna.
1946	Deus qui omne ... proficere sentiamus.
	Deus, qui omne bonum in tui sacri corporis mysterio contineri voluisti, concede propitius, ut hoc munus, quod, [in] beati Geraldi memoriam recolentes, offerimus, ipso intercedente, nobis proficere sentiamus.
1947	Deus qui omne ... de gratia.
	Deus, qui omne meritum vocatorum donis tuae bonitatis anticipas, propitiare animae famuli tui illius, quem in fine istius vitae regenerationis unda mundavit, et, quem fecisti non timere de culpa, fac gaudere de gratia.
1948	Deus qui omne ... intercessor piissimus.
	Deus, qui omne tempus vitae beati Cuthberti maximis glorificasti miraculis, praesta, quaesumus, ut, qui monachus, pontifex et eremita exstitit insignissimus, ante thronum tuum pro nobis assistat intercessor piissimus.
1949	Deus qui omnem ... peccata nostra.
	Deus, qui omnem animam confitentem tibi magis vis emendare quam perdere, averte a nobis iram indignationis tuae et dimitte nobis omnia peccata nostra.
1950	Deus qui omnes ... pietas actionum.
	Deus, qui omnes, in Christo renatos, genus regium et sacerdotale fecisti, da nobis et velle et posse, quod praecipis, ut populo, ad aeternitatem vocato, una sit fides cordium et pietas actionum.
1951	Deus qui omnes ... precibus adiuvemur.
	Deus, qui omnes sanctos et electos tuos pro suis meritis honorari disponis, praesta, quaesumus, ut sanctae Helenae reginae, cuius religionem et studium in sanctae crucis manifestatione veneramur, apud tuam misericordiam meritis et precibus adiuvemur.
1952	Deus qui omnipotentiam ... esse consortes.
	Deus, qui omnipotentiam tuam parcendo maxime et miserando manifestas, multiplica super nos gratiam tuam, ut, ad tua promissa currentes, caelestium bonorum facias esse consortes.
1953	Deus qui omnium ... pueris mereamur.
	Deus, qui omnium nomina temporumque mensuras pia semper largitate dispensas, sanctorum tuorum nos, quaesumus, recitatis nominibus, purifica precibus, absolve a criminibus et salutaris continentiae dita muneribus, ut per hoc sacrae festivitatis ieiunium sincerissimum tibi nostri cordis offeramus holocaustum. Hanc itaque fidelium tuorum oblationem propitius ac sereno vultu, domine, dignare respicere, ut, decurrente iam ieiuniorum nostrorum tempore, haec nos oblatio et a praeieritis delictorum sordibus abluat et a futuris, ut caveamus, te miserante, custodiat, ut, occursuri obviam tuae maiestati non pedum passibus sed contriti cordis nostri gressibus, conclamari tibi puro mentis affectu “Gloria in excelsis deo” cum Hebraeorum pueris mereamur.
1954	Deus qui omnium ... clementiam sentiamus.
	Deus, qui omnium rerum, tibi servientium, naturam per ipsos motus aeris ad cultum tuae maiestatis instituis, tranquillitatem nobis misericordiae tuae remotis largire terroribus, ut, cuius iram expavimus, clementiam sentiamus.
1955	Deus qui opprobrium ... deposcit obtineat.
	Deus, qui, opprobrium sterilitatis a Rachel auferens, dum anxietate prolem quaereret, eam voluit fecundari, concede propitius, ut famula tua illa in earum feminarum, quae tibi placuerunt, sorte fecunditatem accipiat et, quod fideliter a tua pietate deposcit, obtineat.
1956	Deus qui ore ... agere valeamus.
	Deus, qui ore prophetico cogitandam super nos cogitationem pacis, non afflictionis, promisisti, cogita, quaesumus, cogitationem nostrae aeternae redemptionis et educ nos de captivitate tenebrarum, ut videre possimus, quae agenda sunt, et, quae recta sunt, agere valeamus.
1957	Deus qui panem ... beneplacito conformemur.
	Deus, qui panem et vinum in corpus tuum et sanguinem caelesti benedictione convertis, concede nobis per merita sancti Thomae martyris tui atque pontificis, ut, ad tuam misericordiam revertentes, tuo beneplacito conformemur.
1958	Deus qui paschalia ... temporaliter exsultat.
	Deus, qui paschalia nobis remedia contulisti, populum tuum caelesti dono prosequere, ut inde post in perpetuum gaudeat, unde nunc temporaliter exsultat.
1959	Deus qui pascis ... emunda delictis.
	Deus, qui pascis omnem animam carnalibus escis, pasce nos, quaesumus, spiritalibus sacramentis et ab omnibus emunda delictis.
1960	Deus qui passionis ... gloriosa resurrectione.
	Deus, qui passionis filii tui domini nostri Iesu Christi miracula suscitasti, dum vivificum sanguinem, cum aqua mixtum, de latere imaginis suae, Iudaeorum lancea perfossae, copiose produxisti, da nobis famulis tuis, tam mirabilibus signis monstratam, eiusdem passionis virtutem cognoscere, ut fructum eius accipere valeamus in gloriosa resurrectione.
1961	Deus qui peccantium ... consequi mereamur.
	Deus, qui peccantium animas non vis perire sed culpas, contine, quam meremur, iram et, quam precamur, super nos effunde clementiam, ut de maerore gaudium tuae misericordiae consequi mereamur.
1962	Deus qui peccati ... sanctificatione portemus.
	Deus, qui peccati veteris hereditariam mortem, in qua posteritatis genus omne successerat, Christi tui domini nostri passione solvisti, dona, ut, conformes eidem facti, sicut imaginem ’terreni’ naturae necessitate portavimus, ita imaginem ’caelestis’ gratiae sanctificatione portemus.
1963	Deus qui per ... absolve peccatis.
	Deus, qui per angelum tuum Raphaelem iter ostendisti beato paterniano et obitum demonstrasti, exaudi preces, quas in eius tibi sollemnitate deferimus, et, qui digne tibi meruit famulari, eius intercedentibus meritis, ab omnibus nos absolve peccatis.
1964	Deus qui per ... contagiis exuamur.
	Deus, qui per beatae Mariae virginis partum, sine humana concupiscentia procreatum, in filii tui membra venientes paternis fecisti praeiudiciis non teneri, praesta, quaesumus, ut, huius creaturae novitate suscepta, vetustatis antiquae contagiis exuamur.
1965	Deus qui per ... gaudiis admisceri.
	Deus, qui per beati Ambrosii confessoris tui atque pontificis documenta agnitionem nobis veritatis reserasti, fac nos, quaesumus, huius intercessione doctoris et a peccatis omnibus exui et aeternae vitae gaudiis admisceri.
1966	Deus qui <per> ... beatissimum archangelum tuum Michaelem orationes omnium fidelium suscipere es dignatus petimus clementiam tuam ut quas in hoc templo pro nostris facinoribus effundimus preces tu benigne suscipe et
	Deus, qui <per> beatissimum archangelum tuum Michaelem orationes omnium fidelium suscipere es dignatus, petimus clementiam tuam, ut, quas in hoc templo pro nostris facinoribus effundimus preces, tu benigne suscipe et esto propitius.
1967	Deus qui per ... ad exemplum.
	Deus, qui per beatissimum Ioannem praecursorem et martyrem tuum gentibus universis lumen baptismatis intulisti, ut infidelitatem populorum, quam profanae observantiae ritus intulerat, regeneratio caelestis aboleret, praesta, domine, ut intercessio tanti vatis, quae nobis est indulta, per lavacrum purae conscientiae proficiat ad exemplum.
1968	Deus qui per ... crucis affige.
	Deus, qui per beatissimum Sebastianum martyrem tuum tuorum fidelium animos roborasti, dum tibi illum, latentem sub chlamyde, terreni imperii militem perfectum exhibuisti, fac nos semper in tuis laudibus militare. Os nostrum per arma documento iustitiae, cor illustra tuae dilectionis amore atque carnem nostram, erutam libidine, clavis tuae crucis affige.
1969	Deus qui per ... est imitemur.
	Deus, qui per beatum Ioannem baptistam nec cibum nec potum incongrue sumere docuisti, praesta, ut eius instituto et iustitiam, quam praedicando meruit, sentiamus et vitam, quam abstinendo professus est, imitemur.
1970	Deus qui per ... corde curramus.
	Deus, qui per coaeternam tibi sapientiam hominem, cum non esset, condidisti perditumque misericorditer reformasti, praesta, quaesumus, ut, eadem pectora nostra inspirante, te tota mente amemus et ad te toto corde curramus.
1971	Deus qui per ... festivitate laetamur.
	Deus, qui per gloriosa bella certaminis ad immortales triumphos beatos martyres tuos extulisti, concede, quaesumus, ut eorum meritis protegamur, in quorum festivitate laetamur.
1972	Deus qui per ... provocemur exemplis.
	Deus, qui per gloriosa bella certaminis immortalitatis triumphos martyribus condonasti, da cordibus nostris dignam pro eorum commemoratione laetitiam, ut, quorum gaudemus triumphis, provocemur exemplis.
1973	Deus qui per ... gaudia consequamur.
	Deus, qui per gloriosam resurrectionem unigeniti filii tui domini nostri Iesu Christi familiam tuam laetificare dignatus es, praesta, quaesumus, ut per eius venerabilem genitricem virginem Mariam perpetuae vitae gaudia consequamur.
1974	Deus qui per ... sumpsit exordia.
	Deus, qui per huius celebritatis mysterium aeternitatis tuae lumen cunctis gentibus suscitasti, da plebi tuae redemptoris sui plenum cognoscere fulgorem, ut ad perpetuam claritatem per eius incrementa perveniat, per quem eadem sumpsit exordia.
1975	Deus qui per ... virtutum pervenire.
	Deus, qui per inaestimabile munus gratiae tuae sanctos tuos facis esse gloriosos, praesta, quaesumus, ut, interveniente beato Cuthberto consessore tuo atque pontifice, mereamur ad culmen virtutum pervenire.
1976	Deus qui per ... sentiamus supplementum.
	Deus, qui per ineffabile caelestis mysterii sacramentum sanctum Iulianum confessorem tuum ad superna subrogasti, praesta fidelibus tuis, ut, qui eius laudamus meritum, sentiamus supplementum.
1977a	Deus qui per ... mentibus exsequamur.
	Deus, qui per ineffabilem observantiam sacramenti famulorum tuorum praeparas voluntates, donis gratiae tuae corda nostra purifica, ut, quod sancta est devotione tractandum, sinceris mentibus exsequamur.
1977b	Deus qui ad ... mentibus exsequamur.
	Deus, qui ad ineffabilis observantiam sacramenti famulorum tuorum praeparas voluntates, donis tuis corda nostra purifica, ut, quod sancta est devotione tractandum, sinceris mentibus exsequamur.
1978	Deus qui per ... exhibeat medicinam.
	Deus, qui per manus angeli tui argumentum rotarum, quo certatrix Euphemia distendebatur, mirifice confregisti, tu, ad sanctificanda haec oblata tibi libamina, salutis e caelo nuntium mitte, qui et ad te nostrorum vulnerum causas deferat et a te optatam nobis exhibeat medicinam.
1979	Deus qui per ... ut ad caelestia regna
	Deus, qui per mortem filii tui destruxisti mortale saeculum et per crucis eius patibulum nobis resurrectionis gratiam promisisti, <concede nobis famulis tuis>, ut ad caelestia regna transire mereamur.
1980a	Deus qui per os beatae Mariae Magdalenae dominicae resurrectionis gaudia sanctis ... in caelis.
	Deus, qui per os beatae Mariae Magdalenae dominicae resurrectionis gaudia sanctis apostolis innotescere voluisti, tribue, quaesumus, ut eius praesidiis infirmitas nostra roboretur in terris, de cuius profectu angeli gratulantur in caelis.
1980b	Deus qui per os beatae Mariae Magdalenae dominicae resurrectionis gaudium primum ... in caelis.
	Deus, qui per os beatae Mariae Magdalenae dominicae resurrectionis gaudium primum sanctis apostolis praeloquendo innotescere voluisti, ut ipsa in secundo Adam fieret nuntius vitae, quae in primo propinaverat poculum mortis, tribue, quaesumus, ut eius precibus infirmitas nostra roboretur in terris, de cuius profectibus angeli gratulantur in caelis.
1981	Deus qui per ... eruditione capiamus.
	Deus, qui per os beati apostoli tui Ioannis evangelistae Verbi tui nobis arcana reserasti, praesta, quaesumus, ut, quod ille nostris auribus excellenter infudit, intellegentiae competentis eruditione capiamus.
1982	Deus qui per ... adversa defensionem.
	Deus, qui per sanctae crucis ( lacuna ) mirabilium tuorum mundo declarasti multitudinem, tribue nobis per eius insuperabilem munitionem, gloriae tuae perennem contra omnia adversa defensionem.
1983	Deus qui per ... nobis intercedendi.
	Deus, qui per sancti Chrysantii eloquentiam beatam virginem Dariam convertisti, concede, ut, quibus mens una caste vivendi et pro te fuit moriendi, eis una sit pietas maiestatem tuam pro nobis intercedendi.
1984	Deus qui per ... laeti perveniamus.
	Deus, qui per sanctum angelum tuum Raphaelem caecum Tobiam illuminasti filioque suo cum Sara, fugato daemone, matrimonium consummasti ac cum eiusdem filii prospero conductu et multa substantia parentes suos laetificasti, concede propitius, ut, per eundem angelum tuum illuminati, fugatis animae adversariis, cum vitae praesentis prosperitate ad te patrem animarum et sponsum laeti perveniamus.
1985	Deus qui per ... devotione laetamur.
	Deus, qui per sanctum baptismum beatum Ambrosium tui nominis confessorem esse signasti, praesta, quaesumus, ut eius meritis protegamur, in cuius festivitate annua devotione laetamur.
1986	Deus qui per ... supernorum societate.
	Deus, qui per sanctum confessorem tuum antistitem Swithunum mederis languoribus infirmorum, concede nobis tuum iuvamen, per eius implorantibus interventionem praesentis vitae fungi salubritate et civium supernorum societate.
1987	Deus qui per ... unitate laetari.
	Deus, qui per sanguinem Iesu Christi filii tui dedisti pacem hominibus et caelestium collegium angelorum, da nobis et de tuae pacis ubertate repleri et de angelicae societatis unitate laetari.
1988	Deus qui per ... propitiari confidant.
	Deus, qui per tuae legis praeceptum decimas tibi offerri praecipis frugum, ut ex omnibus in tuis sacrariis inferantur, famulos tuos illos, votiva ad te concurrentes devotione et decimas tibi offerentes suarum frugum, attende. Ecce venerunt ad te decimum tibi deferentes substantiae; tu eis occurre et ab eis collatum multiplicium faenore redde. Non eos morbus, non languor atterat, non paupertas deiciat, non divitiae extollant sed sic eos in praesenti vita locupletes redde, ut post istud saeculum de substantiis te sibi propitiari confidant.
1989	Deus qui per ... mentibus deservire.
	Deus, qui per undas regenerationis beatum confessorem tuum Ambrosium a contagione vetusti criminis diluisti, ablutumque purificationis lavacro, doctorem praecipuum atque catholicae fidei propugnatorem efficere dignatus es, praesta, quaesumus, ut, ipso pro nobis intercedente, vitiorum possimus abluere maculas et tibi domino sinceris mentibus deservire.
1990	Deus qui per ... electorum tuorum.
	Deus, qui per unigenitum filium tuum beatum Lazarum, quatriduanum mortuum, resuscitasti a monumento, erige nos propitius de tumulis peccatorum, ut mereamur adipisci consortium electorum tuorum.
1991	Deus qui per ... caelestis aperiat.
	Deus, qui per unigenitum Iesum Christum filium tuum dominum nostrum sanctificationem salutis aeternae aquis regenerantibus praestitisti et, veniente super caput illius spiritali columba, per spiritum sanctum ipse venisti, dona, quaesumus, ut veniat super hanc omnem ecclesiam tuam illa benedictio, quae cunctos iugiter protegat, quae diversos sine cessatione benedicat, quae cursum te sequentium dirigat, quae se exspectationi omnium ianuam regni caelestis aperiat.
1992	Deus qui per ... animae resurgamus.
	Deus, qui per unigenitum tuum aeternitatis nobis aditum, devicta morte, reserasti, da nobis, quaesumus, ut, qui resurrectionis dominicae sollemnia colimus, per innovationem tui spiritus a morte animae resurgamus.
1993	Deus qui per ... facias introire.
	Deus, qui per unigenitum tuum aeternitatis nobis aditum, devicta morte, reserasti, deduc nos ad societatem caelestium gaudiorum, ut, spiritu sancto renatos, regnum tuum facias introire.
1994	Deus qui per ... desideria transeamus.
	Deus, qui per unigenitum tuum aeternitatis nobis aditum, devicta morte, reserasti, erige ad te fidelium corda, ut, a terrenis cupiditatibus liberati, ad caelestia desideria transeamus.
1995	Deus qui per ... iudicaturus adveniat.
	Deus, qui per unigenitum tuum aeternitatis nobis aditum, devicta morte, reserasti, erige nos ad, consedentem in dextera tua, nostrae salutis auctorem, ut, qui iudicandus advenit, pro nobis iudicaturus adveniat.
1996	Deus qui per ... suscepere mysteriis.
	Deus, qui per unigenitum tuum, devicta morte, aeternitatis nobis aditum reserasti, erige ad te tuorum corda credentium, ut omnes regenerati apprehendant meritis, quod suscepere mysteriis.
1997	Deus qui per ... impugnatione conserva.
	Deus, qui per unigenitum tuum, exclusa dominatione diaboli, populum tuum fide aptasti, expelle, quaesumus, a famulo tuo illo cunctas diabolicae illusionis insidias et eum liberatum ab omni impugnatione conserva.
1998	Deus qui per ... pace concordes.
	Deus, qui per Verbum tuum humani generis reconciliationem mirabiliter operaris, praesta, quaesumus, ut sancto ieiunio et tibi toto simus corde subiecti et in tua nos efficiamur pace concordes.
1999	Deus qui perennem ... possideamus aeternam.
	Deus, qui perennem gloriam sanctissimi confessoris tui atque pontificis Audoeni animae contulisti, tribue, quaesumus, eius nos apud te ita patrociniis sublevari, ut cum eo vitam possideamus aeternam.
2000	Deus qui plenitudinem ... peccata mundantur.
	Deus, qui plenitudinem mandatorum in tua et proximi dilectione posuisti, hanc nobis gratiam largire propitius, ut, quia in multis offendimus, tua caritas abundet in nobis, per quam peccata mundantur.