Confitemur nomini tuo, domine, gemino cordis et vocis obsequio, celebrantes gratiam tuam pro triumphis martyris tui Genesii, qui, perficiens in infirmitate virtutem, aeternam vitam prius lavacro sanguinis quam regenerationis accepit, non adoptatus baptismate sed assumptus, non admiscendus neophytorum turbis sed consortiis angelorum. Huius igitur intercessionibus exaudi nos et adesto, domine, benedicturus his oblationibus nostris, ut te, quem in sanctis tuis colimus, per sanctos tuos interpellare mereamur.