Vere sanctus, vere benedictus dominus noster Iesus Christus filius tuus, qui est sanctorum sanctus et omnium beatorum profusius <beatus> et benedictus, qui et patriarcharum corda fidei plenitudine dedicavit et martyrum victrices victoriosissimus princeps corona iustitiae decoravit. Ille cunctorum munus exstitit confessorum et, in tenebris positus, vitam reddit mortuorum. Qui et saeculi cernitur reparator et omnium gentium, calcata morte, redemptor, qui, assumpto corporis indumento, prostravit dirae mortis interitum, moriendo de pugna palmam obtinuit et resurgens victor ac triumphator ad patris solium remeavit.