Vere sanctus, vere benedictus dominus noster Iesus Christus filius tuus, pro quo Ioannes baptista et martyr mystico vaticinii sui praenuntiavit oraculo, quod illum crescere, se autem minui oporteret. His etenim verbis et suam pariter et domini mortem vivens longe ante praedixit, cum et idem filius tuus elevatus in cruce et iste comminutus sit capite.
Nam ille dominus creaturae sublimitate praelatus est ligni; iste animadversione decisus est gladii. Illius caput crux in altum porrexit; istius cervicem mucro saevus desecuit. Ille spiritum emisit in cruce; hic animam efflavit in carcere. Sed ille in luce, qui vitam redditurus esset omnibus, moritur; iste in abditis, qui, nisi Christo moriente, redempturus esset ex inferis, iugulatur.
Sic, sic plane decuit, ut per has mortium dissimilitudines sacramentorum patescerent qualitates, quo et in illo divinitas se exaltata ostenderet et in isto humilitas se custodita monstraret.