Vere sanctus et pius es, domine deus noster, qui tam iustus es ad retribuendum quam misericors ad donandum. Dum vis impendere pro meritis praemia, merita facis esse pro praemiis et nobis dignaris deputare, quod tribuis, dum invenire desideras, quos coronas.
Nam, cum dubium non sit tuum esse, quod vivimus, nostrum iube esse, si vincimus. Sic athletis tuis datur post victoriam corona pro munere, cum impugnanda sit virtus ex munere; ipse praemium exhibens validus, ipse caelum inferens gloriosus, dando et pro remuneratione laudem et pro devotione mercedem.