Tuam proni, domine, immensam quaesumus maiestatem, quem unum et verum deum praedictus martyr, scientia pollens, studio colens, virtute flagrans, passione triumphans, commissae sibi catervae et verbo praedicavit et sanguine.
Tribue nobis, quod illi tribuisti, et virtutibus salubriter erigi et adversitatibus non noceri, quo, huius martyris beneficio fidelium favens votis, requiem iubeas praestare defunctis.