Tuam, domine, in hac martyris tui Genesii sollemnitate gloriam praedicamus, quem et fidei indicem et consummatorem victoriae idem martyr promeruit invenire. Qui, prius fidei voto quam regenerationis praedictus sacramento, te unum et verum, culturis daemonum dando repudium, adsecutus est deum.
Adclines te igitur precibus imploramus, ut haec inspirata a te nostrorum omnium vota subsequatur misericordia tua faciasque, ut, quos praevenisti credulitate, aeterna remuneres ex mercede; huius martyris suffragio praeveniens defunctos ad requiem, cuius cor praeventum est prius fide quam baptismatis tinctione.