Te deprecamur, domine, ut adsis precibus cottidianis diebus, quae tuis deferuntur altaribus. Respicere dignare humilitatis nostrae confessionem, cum tuae magnae misericordiae die noctuque deposcimus, deus, pietatem; pro ecclesia tua catholica, quam custodire digneris ab universis scandalis; pro serenitate regia, ut vitam tranquillam possideat; pro sacerdotibus in fungendis officiis, quos ab omni insidia diaboli facias liberari; pro clero et universo populo, quos tu, domine, tua intercedente misericordia, ab imminenti flagello propitius liberare digneris; pro spiritibus famulorum famularumque tuarum, in pace quiescentium, ut remissionem accipiant peccatorum; et salus comitetur per intercessionem sanctorum omnibus in hac vita viventibus.