Deus, qui beatissimum Felicem martyrem tuum ita sancti spiritus calore flammasti, ut contemptu rerum praesentium te sequeretur et promissionis tuae donis caelestibus ditaretur, qui, in genitali solo tepescente persecutionis flamma, dum miles tuus, in quo pro tuo nomine certaretur, inquireret et inexardescentem declinare a civitate in civitatem sciret, zelo tui amoris armatus, non ad otium se elegit abscondere sed in acie, ubi certamen ageretur, immittere.
His itaque patriae cedens, ponti freta transcurrens, te, qui ubique totus es, quaerens, Gerundam usque pervenit, in qua, ut bonus negotiator, pretiosam margaritam, quam, distractis omnibus, comparaverat, cunctis fideliter ponebat, per quam et fortes in fide construeret et dubios fidei fideliter reformaret, non formidando de praesentibus poenis sed properando congaudens praemiis de aeternis.
Unde precamur te, omnipotens Deus, ut eius suffragio nos tuearis de caelis, cuius martyrium cultu tuo celebramus in terris.