Deus Abraham, Deus Isaac, Deus Iacob, Deus et pater domini nostri Iesu Christi, tu, de caelis tuis propitius affavens, hoc sacrificium nostrum indulgentissima pietate prosequere. Descendat, domine, plenitudo maiestatis, divinitatis, pietatis, virtutis, benedictionis et gloriae tuae super hunc panem et super hunc calicem et fiat nobis legitima eucharistia in transformatione corporis et sanguinis domini, ut quicumque et quotiescumque ex hoc pane et ex hoc calice libaverimus, sumamus nobis monimentum fidei, sinceram dilectionem, tranquillam spem resurrectionis atque immortalitatis aeternae in tuo filiique tui ac spiritus sancti nomine, in communione omnium sanctorum, <et> remissionem omnium nostrorum criminum. Credimus, domine, quod haec nobis, indefessa credulitate poscentibus, praestabis.