Deferentes altaribus tuis, domine, oblationum vota, non merita, precamur multarum misericordiarum gloriam tuam, ut illam, quae se omnibus offert, si sit qui eam mereatur accipere, pietatis tuae bonitatem <ostendas>, ut sit rationabile obsequium nostrum et fiat haec oblatio in remissionem peccatorum per viscera misericordiae caritatis divinae faciasque hanc hostiam vivam placentem tibi, sanctam ac benedictam.
Referatur in sacrificio iustitiae, ex quo in excelsis suavitatis odor adscendat et holocaustum, igne fidei ardens, per membra populi dividendum, [quod] omnium sanctorum nobis patrocinia acquirat et per eorum fortissimas preces firmamenta auxilii caelestis obtineat.